Yirari 4 - LAYIDUKURA

Koo minw bɛ kɛra arijana na

¹ O kɔ, ne ye daa dɔ yɛlɛnin ye sankolo la: Ne tun ye kumakan min mɛn fɔlɔ la i n'a fɔ buru fiyɛkan, o kumakan nin ko ne ma: “Yɛlɛ ka na yan, n bɛna koo nataw yira i la.”

² O yɔrɔnin bɛ, Nii Senuman jigira ne kan. Ne ye masasigilan dɔ ye arijana kɔnɔ. Dɔ tun siginin b'a kan.

³ O tigi tun bɛ manamana i n'a fɔ dakamana kabakuruw u bɛ minw wele ko zasipi ni saaduwani. Sanmuru kɛnin tun bɛ ka masasigilan lamini. O nyaa bɔnin tun bɛ dakamana kabakuru dɔ fɛ u bɛ min wele ko emerodi.

⁴ Sigilan mugan ni naani bilanin tun bɛ ka masasigilan lamini. Cɛkɔrɔba fanigwɛtigiw tun siginin b'u kan. Sanufugulan tun b'u bɛɛ kuun na.

⁵ Saan tun bɛ pɛrɛn ani ka manamana ka bɔ masasigilan yɔrɔ la. Kumakanw tun bɛ bɔ yen fana. Lanpan wolonwula mananin tun bɛ masasigilan nyafɛ. Olu ye Ala ka Nii wolonwula nunu ye.

⁶ Fɛɛn dɔ tun bɛ masasigilan nyafɛ. A kɛra i n'a fɔ baji. O nyaa tun ka nyi kosɛbɛ. Nimanfɛn barikaman naani tun bɛ masasigilan faan bɛɛ la. Olu yɔrɔ bɛɛ tun ye nyadenw ye.

⁷ Nimanfɛn fɔlɔ bɔnin tun bɛ jara fɛ. A filanan bɔnin tun bɛ tura fɛ. A sabanan nyaa bɔnin tun bɛ mɔgɔ nyada fɛ. A naaninan bɔnin tun bɛ sɛgɛn lerutɔ fɛ.

⁸ O nimanfɛn naani nunu bɛɛ tun bɛ ni gaman wɔɔrɔ wɔɔrɔ ye, nyadenw tun bɛ u fari yɔrɔ bɛɛ la. Suu ni tile, u b'a la k'a fɔ ko: “Senuman! Senuman! Senuman! Setigi Ala! An Matigi! E min tun bɛ yen! E min bɛ yen sisan! Ele le bɛna na!”

⁹ Min siginin bɛ masasigilan nin kan, n'a tɛna sa abada, ni nimanfɛn nunu y'a makiri tuma min na,

¹⁰ cɛkɔrɔba mugan ni naani nunu bɛ to k'u ka fugulan fili a nyafɛ k'u kunbiri gwan k'a bato, ale min bɛ yen tuma bɛɛ, ka to k'a fɔ ko:

¹¹ “An Matigi n'an ka Ala, i ka kan ni bonya ni tandoli ye, k'i ka sebagaya koo fɔ! Bari, e le ye fɛɛn bɛɛ dan, a diyara i ye, e y'u bɛɛ dan.”