Yirari 22 - LAYIDUKURA

¹ O kɔ, mɛlɛkɛ ye baji dɔ yira ne la min jii nyaa ka nyi kosɛbɛ n'a bɛ nii don mɔgɔ la. A tun bɛ woyora ka bɔ Ala ni Sagaden ka masasigilan yɔrɔ la,

² ka dugu nin ka siraba nin cɛmancɛ ta. Yiri min bɛ nii don mɔgɔ la, o tun bɛ baa nin daa faan bɛɛ la. O yiri nin bɛ deen kɛ sinyɛ tan ni fila saan kɔnɔ, denko kelen kalo o kalo. A furaburuw bɛ kɛ ka adamadenw furakɛ.

³ Mɔgɔ danganin tɛna kɛ dugu nin kɔnɔ. Ala ni Sagaden ka sigiyɔrɔ bɛna to dugu nin kɔnɔ, Ala batobagaw bɛn'a bato.

⁴ U bɛna Ala ye n'u nyaa ye, a tɔgɔ bɛna sɛbɛn u teen na.

⁵ Suu tɛna ko yen tugu. Olu mako tɛna kɛ lanpan na, walima tile la, bari Matigi Ala bɛn'a ka yeelen bɔ u ye. U bɛna to masaya la tuma bɛɛ.

Yezu bɛ na yan ni dɔɔni

⁶ O kɔ, mɛlɛkɛ y'a fɔ ne ye ko: “Kuma nunu ye tinyɛ kuma ye, mɔgɔ ka kan k'a jigi la a kan. Koo minw bɛna kɛ sisan sisan, Matigi Ala min bɛ lɔnniya di a ka kiraw ma, ale le y'a ka mɛlɛkɛ ci ka na o koow yira a ka baarakɛlaw la.”

⁷ Yezu ko: “N bɛ na yan ni dɔɔni. Kirayakuma min bɛ kitabu nin kɔnɔ, ni mɔgɔ min y'o labato, o tigi bɛna dagamu!”

⁸ Ne Zan le tulo ye kuma nunu mɛn, ani k'a koow bɛɛ ye ni n nyaa ye. Ne y'o bɛɛ mɛn k'o ye tuma min na, mɛlɛkɛ min y'o yira ne la, ne ye n kunbiri gwan a kɔrɔ ko n b'a bato.

⁹ Nga a y'a fɔ ne ye ko: “Ayi! Kana o kɛ, ne fana ye Ala ka baarakɛla le ye i n'a fɔ e n'i tɔnyɔgɔn kiraw, ani minw bɛɛ bɛ kitabu nin kɔnɔna kuma labato. I ka kan ka Ala le bato.”

¹⁰ A y'a fɔ ne ye tugu ko: “I kana kitabu nin kɔnɔna kuma kɛ gundoko ye dɛ, bari a koow kɛtuma surunyana ka ban.

¹¹ Ayiwa, mɔgɔ min ye kojugukɛla ye, o ka jija ka to a ka kojugu la. Mɔgɔ min bɛ to ka kojugu kɛ, o ka banba ka taa n'o ye nya. Mɔgɔ min bɛ nyumanya kɛ, o tigi ka dɔ fara o kan. Mɔgɔ min y'a yɛrɛ di Ala ma, o tigi ka jija ka nɔrɔ Ala la.

¹² “Ayiwa, n bɛ na yan ni dɔɔni. N bɛ na ni bɛɛ ka sara ye n bolo, ka mɔgɔ kelen kelen bɛɛ sara ka kɛnyɛ n'u ka baara ye.

¹³ Ne le ye Alifa ni Omega ye, fɔlɔ ani laban. Ne le ye koo bɛɛ daminɛ n'a laban ye.”

¹⁴ Mɔgɔ minw b'u ka faniw ko, janko u ka don dugu nin kɔnɔ n'a dondaw ye, ka niyɔrɔ sɔrɔ Ala ka arijanayiri deen na, o min bɛ nii don mɔgɔ la, olu bɛna dagamu.

¹⁵ Nga mɔgɔkolonw, ni lagwɛlikɛlaw, ni kakalaw, ni mɔgɔfagalaw, ni josɔnlaw ani galontigɛlaw, olu kɔni bɛna to dugu kɔɔ kan.

¹⁶ “Ne Yezu ye n ka mɛlɛkɛ ci ka na koo nunu bɛɛ fɔ Ala ka jama ye. Ne Dawuda dencɛ lo. Loloba min bɛ manamana dugugwɛdafɛ, ne lo.”

¹⁷ Nii Senuman ni Ala ka jama min ye Krista ka maminɛmuso ye, olu ko: “Na.” Ni mɔgɔ min ye nin mɛn, o tigi k'a fɔ ko: “Na.” Ni minnɔgɔ bɛ min na, o tigi ka na. Jii min bɛ nii don mɔgɔ la, ne bɛna o d'a tigi ma a k'a min n'a tɛ foyi sara.

Zan ka ladili

¹⁸ Ayiwa, kirayakuma minw bɛ kitabu nin kɔnɔ, mɔgɔ minw b'o lamɛnna, ne Zan bɛ kangari la olu ye ko: Ni mɔgɔ o mɔgɔ ye dɔ fara o kan, tɔɔrɔ minw koo fɔra kitabu nin kɔnɔ, Ala bɛna o la a tigi kun.

¹⁹ Ni min ye dɔ bɔ a la, o tigi tɛna don dugu senuman nin kɔnɔ, arijanayiri min bɛ nii don mɔgɔ la, a tɛna o deen nɛnɛ fana, o minw koo fɔnin bɛ kitabu nin kɔnɔ.

²⁰ Min b'a yira ko kuma nunu bɛɛ ye tinyɛ ye, ale ko: “Tinyɛ na, n bɛ na yan ni dɔɔni.” Amiina! Na Matigi Yezu.

²¹ An Matigi Yezu ka nɛɛma kɛ aw bɛɛ ye.