Yirari 21 - LAYIDUKURA

Sankolokura ni dugukolokura

¹ O kɔ, ne ye sankolokura ni dugukolokura ye. Bari sankolo fɔlɔ ni dugukolo fɔlɔ nunu tun tununa. Kɔgɔji tun tɛ yen tugu.

² Zeruzalɛmukura, min ye dugu senuman ye, n y'a jigitɔ ye ka bɔ Ala fɛ arijana na. A labɛnnin bɛ, i n'a fɔ kɔnyɔmuso labɛnnin bɛ taar'a cɛso la.

³ O waati yɛrɛ la, ne ye kumakanba dɔ mɛn ka bɔ masasigilan yɔrɔ la ko: “Ala sigiyɔrɔ filɛ nin ye adamadenw cɛma. A bɛna to u cɛma, u bɛna kɛ a ka mɔgɔw ye, ale bɛna kɛ u ka Ala ye.

⁴ A bɛna u nyaji bɛɛ cɛ. Saya kɔni, o tɛ yen tugu. Mɔgɔ tɛna sa, mɔgɔ tɛna kasi, mɔgɔ tɛna tɔɔrɔ tugu. Bari, dinyɛkura lo, kɔrɔman n'a kɔnɔnafɛnw bɛɛ tununa bugubugu.”

⁵ Mɔgɔ min siginin bɛ masasigilan kan, ale y'a fɔ o tuma na ko: “N bɛ fɛɛn bɛɛ kɛ kura ye.” O kɔ, a y'a fɔ ne ye ko a bɛna min fɔ, ko n k'o sɛbɛn, bari, tinyɛ kuma lo, mɔgɔ ka kan k'a jigi la min kan.

⁶ A y'a fɔ tugu ko: “A bɛɛ dafara sisan. Ne le ye Alifa ni Omega ye. Ne le ye koo bɛɛ daminɛ ni laban ye. Ni minnɔgɔ bɛ min na, jii min bɛ hɛrɛ banbali di mɔgɔ ma, ne bɛna o di o tigi ma, sara t'o min na.

⁷ Min mana see sɔrɔ. n bɛna o kɛ k'o tigi sara, ani ka kɛ a ka Ala ye, a fana ka kɛ n ka deen ye.

⁸ Nga siranbagatɔw kɔni, ani lanabaliw, ni mɔgɔjuguw, ni mɔgɔfagalaw, kakalaw, lagwɛlikɛlaw, josɔnlaw, ani galontigɛlaw bɛɛ, olu kɔni niyɔrɔ ye jahanama le ye. O le ye saya filanan ye.”

Zeruzalɛmukura ka koo

⁹ O tuma na, mɛlɛkɛ wolonwula minw tun bɛ ni tɔɔrɔ sifa wolonwula nunu ye u bolo dagaw kɔnɔ, o kelen nan'a fɔ ne ye ko: “Na yan n bɛ Sagaden ka maminɛmuso yira i la.”

¹⁰ Nii Senuman barika la, ne ye n yɛrɛ ye kulu jamanjanba dɔ kan. Mɛlɛkɛ ye Zeruzalɛmu dugu senuman nin yira ne la, a jigitɔ ka bɔ Ala fɛ arijana na.

¹¹ Ala ka nɔɔrɔ tun b'a kan. A tun bɛ manamana kosɛbɛ.

¹² Kogo jamanjan tun kɛnin bɛ k'a lamini. Donda tan ni fila b'a la, mɛlɛkɛ kelen kelen tun lɔnin bɛ daa nunu bɛɛ la. Isirayɛli deen tan ni fila tɔgɔw sɛbɛnnin bɛ daa nunu kan.

¹³ Dugu nin donda saba tun sinnin bɛ kɔrɔn ma, saba bɛ tileben fɛ, saba bɛ kɔgɔdugu nyafan fɛ, saba bɛ worodugu nyafan fɛ.

¹⁴ Kogo nin juu siginin bɛ kabakuru tan ni fila le kan. Sagaden ka ciden tan ni fila tɔgɔw sɛbɛnnin b'o kabakuru nunu kan kelen kelen.

¹⁵ Mɛlɛkɛ min tun bɛ kumana ni ne ye, sumanikɛnan dɔ minɛnin tun b'a bolo, o tun bɛ i n'a fɔ sanubere. A tun ka kan ka dugu nin bonya suma, k'a dondaw n'a lamini kogo suma.

¹⁶ Dugu nin tun ye nɔnkɔn naani ye. A nɔnkɔnw bɛɛ janya ye kelen ye. A y'a suma ni bere nin ye, nɔnkɔn kelen kelen bɛɛ ye kilo waa fila ni kɛmɛ fila fila ye, ka lɔ ka wili sanfɛ, o n'a nɔnkɔn janya bɛɛ ye kelen ye.

¹⁷ O kɔ, a y'a lamini kogo fana suma ni adamadenw ka sumanikɛnan ye. O janya kɛra mɛtɛrɛ bi wɔɔrɔ ni duuru ye ka wili sanfɛ.

¹⁸ Dugu lamini kogo tun lɔnin bɛ ni luluu le ye, dugu yɛrɛ lɔnin bɛ ni sanu le ye, a bɛ manamana kosɛbɛ.

¹⁹ Dugu lamini kogo juu bɛɛ tun ye dakamana kabakuru sifa bɛɛ ye. Kabakuru fɔlɔ tun ye zasipi ye, a filanan ye safiri ye, a sabanan ye kaliseduwani ye, a naaninan ye emerodi ye,

²⁰ a duurunan ye saaduwani ye, a wɔɔrɔnan ye kɔɔnalini ye, a wolonwulanan ye kirizoliti ye, a seeginan ye berili ye, a kɔnɔntɔnnan ye topasi ye, a tannan ye kirizopirazi ye, a tan ni kelennan ye yasɛnti ye, a tan ni filanan ye ametiisi ye.

²¹ Dugu donda ka koon nunu tun kɛnin bɛ ni dakamana kɔnɔkisɛ tan ni fila ye. Koon kelen kelen bɛɛ ye kɔnɔkisɛ kelen kelen le ye. Dugu nin ka siraba ye sanu le ye, n'a bɛ manamana i n'a fɔ luluu.

²² N ma Alabatoso ye dugu nin na. Matigi Ala, Setigi Ala, ale ni Sagaden le ye dugu ka Alabatoso ye.

²³ Dugu nin mako tɛ tile ni kalo yeelen na, bari Ala ka nɔɔrɔ y'a ka yeelen ye, Sagaden y'a ka lanpan ye.

²⁴ Adamadenw bɛna taama a yeelen fɛ. Masaw bɛna na n'u ka bonya ye.

²⁵ Dugu nin dondaw yɛlɛnin bɛna to tuma bɛɛ, bari suu tɛna ko yen tugu abada.

²⁶ U bɛna na ni adamadenw ka bonyafɛnw n'u ka dawulafɛnw bɛɛ ye a kɔnɔ.

²⁷ Fɛnnɔgɔnin si tɛna don dugu nin kɔnɔ. Kojugukɛla, walima galontigɛla si tɛna don yen. Nga minw tɔgɔ sɛbɛnnin bɛ Sagaden ka sɛbɛ kɔnɔ, olu dama le bɛna kɛ yen.