Yirari 20 - LAYIDUKURA

Sutana minɛko

¹ O kɔ, ne ye mɛlɛkɛ dɔ jigitɔ ye ka bɔ sankolo la ni jɔrɔkɔ barikaman ye, ni Dingɛjugu konnigɛ b'a bolo.

² A ye Sogojugu nin minɛ, o min ye sakɔrɔ nin ye, n'o ye Sutana ye fana. A y'a minɛ ka jɔrɔkɔ kɛ a la, a ka kan ka saan waa kelen kɛ jɔrɔkɔ la.

³ Mɛlɛkɛ y'a ta k'a fili Dingɛjugu nin kɔnɔ k'a datugu, k'a sɔgɔ waasa a kana se ka bɔ ka mɔgɔ si lafili ni saan waa kelen nin ma tɛmɛ. N'o tɛmɛna, a bɛna bɔ ka waati dɔɔni kɛ.

⁴ O kɔ, ne ye masasigilanw ye. Mɔgɔ minw nana sigi u kan, see dira olu ma ka kiti tigɛ. Mɔgɔ minw tun fagara Yezu ni Ala ka kuma kɔsɔn, ani minw tun banna ka Sogo nin taamasinyɛ bila u teen, walima u bolo kan, k'a jaa bato, ne ye olu bɛɛ fana kununnin ye, u sigira ni Krista ye masaya la saan waa kelen.

⁵ Nga suu tɔw ma se ka kunun fɔɔ saan waa kelen nin ka tɛmɛ. O ye suuw kununko fɔlɔ ye.

⁶ Mɔgɔ minw bɛna kɛ o fɔlɔ mɔgɔw ye, olu bɛna saniya, u bɛna dagamu bari saya filanan tɛna se olu ma. Olu bɛna kɛ Ala ni Krista ka sarakalasebagaw ye ka sigi masaya la n'a ye saan waa kelen nin kɔnɔ.

Kɛlɛ laban koo

⁷ Saan waa kelen nin tɛmɛnin kɔ, Sutana bɛna bila ka bɔ a ka kaso la

⁸ ka taa adamadenw lafili dugukolo faan bɛɛ, o ye Gɔgi ni Magɔgi ye. A bɛn'a ka kɛlɛdenw lajɛn. U ka ca i n'a fɔ kɔgɔji daa la cɛncɛn.

⁹ U bɛna dugukolo bɛɛ minɛ, ka jama senuman ni Ala ka diyana dugu lamini. Nga tasuma bɛna bɔ sankolo la k'u bɛɛ halaki.

¹⁰ O tuma na, u ye adamadenw lafilibaga minɛ, n'o ye Sutana ye, k'a fili jahanama kɔnɔ, kiribi mananin b'o min kɔnɔ. A taara Sogo nin n'a yɛrɛ ka kira sɔrɔ yen. U bɛna tɔɔrɔ yen tuma bɛɛ, u tɛna bɔ abada.

Kiti laban

¹¹ O kɔ, ne ye masasigilan belebeleba gwɛman dɔ ye ka mɔgɔ dɔ siginin ye a kan. Sankolo ni dugukolo bɛɛ ye kɛnɛ minɛ ka tunu.

¹² O kɔ, ne ye suuw ye, u bɛɛ kununna, denmisɛn fara mɔgɔkɔrɔbaw kan, u taara lɔ masasigilan nyafɛ. Ayiwa, sɛbɛ dɔw dayɛlɛla. Ala ka mɔgɔw tɔgɔ bɛ sɛbɛ min na, o fana dayɛlɛla. O tuma na, u ye mɔgɔw kiti ka kɛnyɛ n'u ka kɛwaliw ye.

¹³ Jii tun ye minw dumu, dugukolo tun ye minw datugu, minw tun bɛ lahara, u bɛɛ le bɔra. U bɛɛ kitira ka kɛnyɛ n'u ka kɛwaliw ye.

¹⁴ O tuma na, u ye saya ni lahara fifa ka jigi jahanama kɔnɔ. O le bɛna kɛ saya filanan ye.

¹⁵ Mɔgɔ minw bɛɛ tɔgɔ ma sɔrɔ Ala ka sɛbɛ kɔnɔ, u ye olu bɛɛ fifa ka jigi jahanama kɔnɔ.