Yirari 18 - LAYIDUKURA

Babilɔni halakiko

¹ O kɔ, ne ye mɛlɛkɛ wɛrɛ jigitɔ ye ka bɔ sankolo la. Sebagayaba tun b'a bolo. A ka nɔɔrɔ ye yeelen bɔ dugukolo faan bɛɛ la.

² A pɛrɛnna ko: “A halakira! Babilɔni duguba nin halakira. A yɔrɔ kɛra jinaw ka yɔrɔ ye. Kɔnɔ minw tɛ nyimi, ani minw koo ka go, a kɛra olu ka yɔrɔ ye.

³ Bari ale le kɛra sababu ye, ka siyaw bɛɛ bila kakalaya la. Masaw jɛnna n'ale le ye ka kakalaya kɛ. Jagokɛlaw kɛra nafolotigiw ye ale ka masirifɛnw sababu la.”

⁴ O kɔ, n ye kumakan wɛrɛ mɛn ka bɔ arijana na ko: “N ka jama, aw ye bɔ dugu nin na wo, janko aw kana fara u kan ka kojugu kɛ a ka tɔɔrɔ dɔ kana se aw ma.

⁵ Bari a ka kojugu kɛnin farafarala nyɔgɔn kan fɔɔ ka se sankolo la. Ala ma nyina a ka kɛwalijuguw kɔ.

⁶ A ye aw minɛ cogo min na, aw fana k'a minɛ ten. A ye min kɛ aw la, aw ye o nyɔgɔn fila kɛ a la. A ye dɔrɔjugu min labɛn aw ye, min ka fari n'o ye sinyɛ fila, aw y'o don a ka dɔrɔfiyɛ la.

⁷ A ye fɛnnyumanw ni nafolo kɛ k'a yɛrɛ bonya cogo min na, aw ka tɔɔrɔ ni dusukasi lase a ma ten. Bari a b'a miiri ko a kɛnin bɛ i n'a fɔ masamuso min cɛɛ bɛ sii la, ko sanga tɛna bɔ ale fɛ ka ye.

⁸ O kama, dugu mɔgɔw bɛna tɔɔrɔ dɔw sɔrɔ tile kelen kɔnɔ. U bɛna banajugu sɔrɔ, sanga bɛna bɔ u fɛ, kɔngɔ bɛna don u fɛ. Tasuma bɛna dugu jɛni. O bɛɛ bɛna kɛ bari Matigi Ala min b'a nyaa gwanna, see b'o ye.”

⁹ Masa minw nana kakalaya ni nafolotigiya kɛ dugu nin kɔnɔ, ni olu ye dugu sisi wilinin ye tuma min na, u bɛna kasi kosɛbɛ.

¹⁰ Siranya fɛ, u bɛna lɔ yɔrɔjan waasa a ka balawu dɔ kana se u ma. U bɛna to k'a fɔ ko: “Ebe! Bɔnɛ o bɔnɛ! Duguba nin! Babilɔni duguba! Cɛfaridugu! I nyagwanko ma kɛ baara ye, lɛrɛ kelen dɔrɔn y'o nya.”

¹¹ Jagokɛlaw bɛna kasi a ka bɔnɛko la kosɛbɛ. Mɔgɔ si tɛna nyini a ka jagofɛnw na tugu.

¹² Sanu wo, warigwɛ wo, luluu, kɔnɔkisɛw, lɛnfaniw, faniwulen sɔngɔgwɛlɛnw, tuntunfaniw, wusulanyiriw, samanyinw, yirinyuman bɛ kɛ ka fɛɛn sɔngɔgwɛlɛn minw dilan, ziraw, nigɛw, kabakuru min tɔgɔ ko maaburu,

¹³ nanfɛnw, tulu kasadiman, wusulanw, duvɛn, tulu, mugu, suman, misiw, sagaw, soow, wotorow, ani jɔɔn feeretaw.

¹⁴ Jagokɛla nunu bɛn'a fɔ ko: “E tun bɛ bololafɛn minw nyini, o bɛɛ cɛnna. O nafolo nin, ani dakamanafɛnw bɛɛ tununa i la. I tɛna o si sɔrɔ tugu fewu.”

¹⁵ Dugu nin kɛra sababu ye ka jagokɛla minw kɛ nafolotigiw ye, a ka bɔnɛ siranya fɛ, olu bɛna lɔ yɔrɔjan ka to ka kasi, ka to ka kaba.

¹⁶ U bɛna to k'a fɔ ko: “Ebe! Bɔnɛ o bɔnɛ! Duguba nin! I do masirinin tun bɛ sa! ni lɛnfani ye, ni faniwulen sɔngɔgwɛlɛn ye, ni sanu ni luluu, ani kɔnɔkisɛw ye.

¹⁷ Ebe! O nafolo nunu bɛɛ halakiko ma kɛ baara ye fɔɔ lɛrɛ kelen dɔrɔn.” Kurun kuntigiw, ni kurunbolilaw, ni minw bɛɛ bɛ to ka taa o yɔrɔ la, ani minw bɛɛ b'u daradumuni sɔrɔ kɔgɔji kan, olu bɛɛ bɛna lɔ yɔrɔjan

¹⁸ ka to ka kaba ka dugu nin sisi yɛlɛtɔ filɛ k'a fɔ ko: “Dugu si tun tɛ se ka suma n'o duguba nin ye.”

¹⁹ U bɛna kule, ka ;nuna, ka buguri kɛ u kuun na dusukasi fɛ, k'a fɔ ko: “Ebe! Bɔnɛ o bɔnɛ! Duguba nin! O min ka dakamanafɛnw tun bɛ kuruntigiw bɛɛ kɛ nafolotigiw ye, e halakiko ma kɛ baara ye, lɛrɛ kelen dama kɔnɔ i kɛra tomo ye!

²⁰ “Arijana mɔgɔw, ni mɔgɔ senumanw, ni Yezu ka cidenw ani kiraw, aw ye nisɔndiya dugu nin ka tɔɔrɔ koo la. Bari Ala y'a nyaa gwan k'aw mɔnɛ bɔ.”

²¹ O tuma na, mɛlɛkɛ setigi dɔ ye kabakuru dɔ ta min bonya bɛ wugu belebeleba dɔ bɔ, k'a fili kɔgɔji la k'a fɔ ko: “N ye kabakuru nin bon ni fanga min ye dɛ, Babilɔni duguba nin bɛna bari ka tunu yɔrɔnin kelen ten, a tɛna ye tugu.

²² Kolonjo fɔkan tɛna mɛn yen tugu, ni dɔnkililabaga;nanaw, ni file, ani buru, u si kaan tɛna mɛn Babilɔni tugu. Bololabaarakɛla si tɛna sɔrɔ yen tugu. Wugu kaan tɛna mɛn yen tugu.

²³ Lanpan yeelen tɛna bɔ yen tugu. Kɔnyɔcɛ n'a muso tɛna sɔrɔ yen tugu, bari Babilɔni jagokɛlaw le tun ye dinyɛ kɔnɔ mɔgɔbabaw ye. A ka kirisikow ye siyaw bɛɛ lafili.

²⁴ “Kiraw, ni mɔgɔ senumanw, ani mɔgɔ minw bɛɛ fagara dugukolo kan, olu bɛɛ joli bɔnnin yera dugu nin le kɔnɔ.”