Yirari 17 - LAYIDUKURA

Kakalamuso ka koo

¹ O tuma na, mɛlɛkɛ wolonwula minw tun bɛ ni dagaw ye u bolo, olu kelen gwɛrɛla k'a fɔ ne ye ko: “Kakalamuso min tɔgɔ bɔra kosɛbɛ n'a siginin bɛ baaw cɛma, ale bɛna tɔɔrɔ cogo min na a ka kojugu kɔsɔn, na yan n bɛna o yira e la.

² Masaw jɛnna n'ale le ye ka kakalaya kɛ. A y'a kɛ dinyɛ mɔgɔw bɛɛ kɛra kakalaw ye.”

³ O tuma na, Nii Senuman jigira ne kan, mɛlɛkɛ ye ne ta ka taa ni ne ye fɔɔ kongokolon dɔ la. O yɔrɔ la, ne ye muso dɔ siginin ye Sogo wuleman dɔ kan. Sɛbɛli tun b'a yɔrɔ bɛɛ la, o minw ye Ala tɔgɔcɛn kuma ye. A kuun tun ye wolonwula ye, gɔɔn tan.

⁴ Fani wuleman dɔ tun bɛ muso nin kaan na min ka nyi kosɛbɛ. A masirinin tun bɛ ni sanu ye, ni kabakuru sifa dɔ ye i n'a fɔ luluu, ani kɔnɔkisɛw. Filen sanulaman dɔ tun b'a bolo, o fanin tun bɛ fɛnjuguw la, a ka kakalaya tɔnɔ.

⁵ Tɔgɔ dɔ sɛbɛnnin tun b'a teen na min kɔrɔ dogonin lo. A sɛbɛnnin tun bɛ ko: “Babilɔni duguba, kakalaw ni dinyɛ kɔnɔ nyamanyamaw bamuso.”

⁶ Ne y'a ye ko muso nin tun fanin lo Ala ka mɔgɔw ni Yezu seerew joli la. O tun ye ne kabakoya fɔɔ ka tɛmɛ.

⁷ Nga, mɛlɛkɛ y'a fɔ ne ye ko: “Mun na i kabakoyanin lo ten? N bɛna muso nin ka koo kɔrɔ fɔ i ye. A yɛlɛnin bɛ Sogo min kan, n'o kungolo ye wolonwula ye, ani gɔɔn tan, n bɛna o fana kɔrɔ fɔ i ye.

⁸ I ye Sogo min ye, a tun bɛ yen fɔlɔ la, nga sisan a tɛ yen tugu, A bɛna na bɔ Dingɛjugu la ka ta'a halakiyɔrɔ. Kabini dinyɛ dantuma, adamaden minw tɔgɔ tɛ Ala ka sɛbɛ kɔnɔ, olu bɛɛ bɛna Sogo nin ye, ka kabakoya a koo la, bari a tun bɛ yen fɔlɔ la, nga sisan a tɛ yen tugu. O n'a ta bɛɛ, a bɛna na tugu.

⁹ “Fɔɔ i ka kɛ hakilitigi ni lɔnnikɛla ye yan. Sogo nin kuun wolonwula nunu kelen kelen bɛɛ ye kuluw ye, muso nin siginin b'o minw kan. Masa wolonwula lo fana.

¹⁰ O masa nunu na, duuru benna, wɔɔrɔnan b'a ka masaya la, wolonwulanan ma sigi fɔlɔ. Nga n'ale sigira tuma min na, a tɛna mɛn a ka masaya la.

¹¹ Sogo min tun bɛ yen fɔlɔ la n'a tɛ yen tugu, o ye masa nunu seeginan ye, nga a jatinin bɛ masa wolonwula nunu cɛma. A bɛ taara halakiyɔrɔ le.

¹² “I ye gɔɔn tan minw ye, olu ye waati wɛrɛ masaw ye. Sogo nin bɛna masaya d'u ma. U bɛna masaya dumu waati dɔɔni dɔrɔn ni Sogo nin ye.

¹³ O masa nunu ka ;naniya bɛɛ ye kelen ye, ka se k'u ka sebagaya, n'u fanga kɛ nyɔgɔn kan ka baara kɛ Sogo nin ye.

¹⁴ U bɛna Sagaden nin kɛlɛ. Nga Sagaden bɛna se u kɔrɔ, bari ale ye matigiw ka Matigi ye, ani masaw ka Masa. Sagaden n'a ka mɔgɔ weleninw, n'a ka wolomaninw, ni kantigiw, u bɛɛ bɛna see sɔrɔ.”

¹⁵ Mɛlɛkɛ y'a fɔ n ye tugu ko: “Kakalamuso nin siginin bɛ jii min kan, o ye jamanaw n'u kɔnɔna siyaw ye.

¹⁶ Sogo nin, ani a gɔɔn tan nunu bɛna wili kakalamuso nin kama k'a kɔniya. U bɛn'a walaka k'a to lakolon, u bɛn'a sogo nyimi. A tɔɔ min bɛna to, u bɛna o jɛni.

¹⁷ Bari, Ala le ye ;naniya kelen d'u ma waasa u b'u ka fanga fara nyɔgɔn kan ka baara kɛ Sogo nin ye fɔɔ Ala ka kuma fɔnin bɛɛ ka dafa.

¹⁸ “Ayiwa, i ye muso min ye, o ye duguba nin ye, ale min bɛ dugukolo masaw bɛɛ kunna.”