Yirari 14 - LAYIDUKURA

Sagaden bilasirabagaw

¹ O kɔ, n ko n bɛ filɛli kɛ, ne ye Sagaden nin lɔnin ye Siyɔn kulu kan. Mɔgɔ waa kɛmɛ ni bi naani ni naani tun bɛ n'a ye. A tɔgɔ, n'a Faa tɔgɔ sɛbɛnnin b'u bɛɛ teen na.

² Kumakan dɔ bɔra sankolo la. O kumakan nin tun bɔnin bɛ jiba woyokan fɛ, walima saan pɛrɛnkan fɛ. Kumakan nin bɔnin tun bɛ kolonjofɔla ka kolonjo kaan fɛ.

³ Mɔgɔ nunu tun bɛ masasigilan nyafɛ, ni nimanfɛn naani nunu, ani cɛkɔrɔbaw nyafɛ. U tun bɛ dɔnkilikura dɔ lara, mɔgɔ si tɛ min lɔn fɔɔ mɔgɔ waa kɛmɛ ni bi naani ani naani nunu dɔrɔn. Ala tun ye o minw kunmabɔ dugukolo kan.

⁴ O mɔgɔ nunu tun ma sɔn k'u yɛrɛ nɔgɔ ni musoko ye. Olu kɔni, hakɛ t'u kan. Ni Sagaden taara yɔrɔ o yɔrɔ, u bɛ tugu a kɔ. Olu kisira ka kɛ saraka fɔlɔw ye adamadenw cɛma ka kɛ Ala ni Sagaden ta ye.

⁵ Galon ma bɔ u daa la ka ye. Olu ye jalakibaliw ye.

Mɛlɛkɛ dɔw bɛ kitiko fɔra

⁶ O kɔ, ne ye mɛlɛkɛ dɔ tɛmɛtɔ ye fɔɔ sankolo la. Kibaru diman b'a bolo k'a lase dinyɛ mɔgɔw bɛɛ ma, jamanaw kɔnɔ siyaw bɛɛ ma. O kibaru nin tɛna nagasi abada.

⁷ Mɛlɛkɛ nin tun bɛ pɛrɛnna ka to k'a fɔ ko: “Aw ye siran Ala nya, aw y'a bonya, bari a ka kiti waati sera. Ale min ye sankolo ni dugukolo dan, ka kɔgɔji ni kɔɔw dan, aw k'ale bato.”

⁸ Mɛlɛkɛ wɛrɛ tugura fɔlɔ nin kɔ, n'a b'a fɔra ko: “A halakira! Babilɔni duguba nin halakira! Ale min kɛra sababu ye ka siyaw bɛɛ bila a ka kakalaya la.”

⁹ Mɛlɛkɛ wɛrɛ tugura fila nunu kɔ, n'a bɛ pɛrɛnna k'a fɔ ko: “Mɔgɔ o mɔgɔ bɛ Sogo nin, n'a jaa bato, a ka taamasinyɛ bɛ mɔgɔ o mɔgɔ teen na, walima a bolo kan,

¹⁰ olu kɔni bɛna duvɛn jalan min, o min ye Ala ka dimi ta ye. U bɛna tɔɔrɔ kosɛbɛ kiribi mananin kɔnɔ Ala ka mɛlɛkɛw ni Sagaden nyana.

¹¹ U jɛnitasuma tɛna faga abada. Mɔgɔ minw bɛɛ tun ye Sogo nin n'a jaa bato, ni minw y'a ka taamasinyɛ sɔrɔ, olu si tɛna lafinyɛ sɔrɔ sufɛ, walima tilefɛ abada.”

¹² O kama Ala ka mɔgɔ minw b'a ka kuma labato ani k'u jigi to Yezu kan, olu ka jijawaati sera.

¹³ O kɔ, kumakan dɔ bɔra sankolo la ko ne ma: “A sɛbɛn ko: Mɔgɔ minw bɛ sa k'u jigi lanin to Matigi kan, kabini sisan olu bɛ hɛrɛ la.” Nii Senuman ko: “U bɛna lafinyɛ, bari u ye kɛwalinyumanw kɛ.”

Suman kanwaati

¹⁴ O kɔ, ne ye sankaba gwɛman dɔ ye. Mɔgɔ min tun siginin b'a kan, o bɔnin bɛ mɔgɔ dencɛ fɛ. Masafugulan sanulaman tun b'a kuun na, wɔrɔsɔ dadiman dɔ tun b'a bolo.

¹⁵ Ayiwa, mɛlɛkɛ dɔ wɛrɛ bɔra Alabatosoba kɔnɔ, k'a kaan kɔrɔta k'a fɔ sankaba kan sigibaga ye ko: “Kanni kɛ n'i ka wɔrɔsɔ ye, bari dugukolo suman mɔna, a kantuma sera.”

¹⁶ O tuma na, mɔgɔ min siginin tun bɛ sankaba kan, a y'a ka wɔrɔsɔ kɛ ka dugukolo suman bɛɛ kan.

¹⁷ O kɔ, mɛlɛkɛ wɛrɛ bɔra arijana Alabatoso kɔnɔ, wɔrɔsɔ dadiman tun b'ale fana bolo.

¹⁸ Mɛlɛkɛ wɛrɛ bɔra sarakabɔlan gɛrɛfɛ n'o ye tasumatigi ye. A y'a kaan kɔrɔ ta k'a fɔ wɔrɔsɔtigi ye ko: “I ka wɔrɔsɔ kɛ ka ɛrɛzɛn nunu tigɛ, bari u mɔna.”

¹⁹ O mɛlɛkɛ nin y'a ka wɔrɔsɔ kɛ ka ɛrɛzɛn nunu bɛɛ tigɛ. A y'a bɛɛ don duvɛn lalagayɔrɔ la. N'o ye Ala ka dimi ye.

²⁰ U y'a nɔɔni n'u seen ye dugu kɔɔ kan. A jii nin kɛra joli ye ka woyo fɔɔ ka see kilo kɛmɛ saba ma, min dunya bɛ mɛtɛrɛ kelen ni tilan nyɔgɔn bɔ.