Yirari 13 - LAYIDUKURA

Sogo min bɔra kɔgɔji la batoko

¹ N ye Sogo dɔ bɔtɔ ye kɔgɔji la, a kungolo ye wolonwula ye, a gɔɔn ye tan ye. Masafugulan b'a gɔɔn nunu kelen kelen bɛɛ la. Ala tɔgɔcɛn kuma sɛbɛnnin b'a kuun kelen kelen bɛɛ kan.

² O Sogo nin bɔnin bɛ waraninkala fɛ. A seenw tun bɛ i n'a fɔ surukuwulen ta. A dakala bɛ i n'a fɔ jara ta. Sogojugu nin y'a ka sebagaya n'a ka masaya ani fangaba d'a ma.

³ Sogo nin kungolo kelen mandiminin tun lo kosɛbɛ i n'a fɔ a bɛna sa. Nga a kuun nin nana suma. Adamadenw kabakoyara kosɛbɛ ka tugu a kɔ.

⁴ U ye Sogojugu nin bato bari a ye sebagaya di Sogo dɔ nin ma. U tora ka Sogo dɔ nin bato n'u b'a fɔ ko: “Batofɛn jumɛn ni Sogo nin ka kan? Jon bɛ se ka lɔ a nya kɛlɛ la?”

⁵ Daa dir'a ma waasa ka to k'a yɛrɛ wansun ani ka Ala tɔgɔ cɛn. Fanga dir'a ma waasa a k'a seko kɛ kalo bi naani ni fila kɔnɔ.

⁶ A y'a daminɛ ka Ala tɔgɔ cɛn, ka arijana lɔgɔbɔ, o min ye Ala sigiyɔrɔ ye, ka to ka arijana mɔgɔw bɛɛ nɛni.

⁷ Sira dir'a ma ko a ka Ala ka mɔgɔw kɛlɛ, ani ka se u kɔrɔ. Fanga dir'a ma waasa ka siyaw bɛɛ mara, ni jamanaw bɛɛ.

⁸ U tun ye Sagaden min faga kabini dinyɛ dantuma, mɔgɔ nyanamanw ka tɔgɔ bɛ ale ka sɛbɛ min kɔnɔ, mɔgɔ minw tɔgɔ tɛ o kɔnɔ, olu bɛɛ bɛna sogo nin bato.

⁹ “Ni min b'a fɛ ka faamuli kɛ, o k'a tulo malɔ ka nya.

¹⁰ Mɔgɔ min danna jɔnya kama, o tigi bɛna jɔnya kɛ. Ni min ka kan ka faga ni murujan ye, o tigi bɛna faga ten. O la, Ala ka mɔgɔw ka kan ka kɛ munyulikɛbagaw ni jigitigiw ye.”

Sogo wɛrɛ batoko

¹¹ O kɔ, n ye Sogo wɛrɛ ye min bɛ bɔra dugukolo la. Gɔɔn fila tun b'a la i n'a fɔ saga ta. A bɛ kuma i n'a fɔ sogojugu.

¹² A ye dinyɛ mɔgɔw bɛɛ karaba k'u kɛ Sogo fɔlɔ nin batobagaw ye, Sogo fɔlɔ nin barika la, ale min tun mandiminin b'a kuun na.

¹³ O Sogo nin ye kabakobabaw kɛ, a ye tasuma yɛrɛ jigi ka bɔ sankolo la mɔgɔ bɛɛ nyana.

¹⁴ Sebagaya min dir'a ma, a y'o kɛ ka mɔgɔ caaman lafili Sogo fɔlɔ nin nyana. A y'a fɔ mɔgɔw ye k'u ka Sogo fɔlɔ nin jaa dilan k'a bonya, o Sogo min tun mandimina n'a ma sɔrɔ ka sa.

¹⁵ Sira dir'a ma ko a ka nii don jaa nin na, waasa a ka kuma, ni mɔgɔ min banna k'ale jaa nin bato, a k'o tigi faga fana.

¹⁶ Sogo nin ye mɔgɔw bɛɛ wajibiya ka taamasinyɛ dɔ bila u kinibolo kan walima u teen na: a barikatigiw wo, a barikatanw wo, nafolotigiw ni faantanw, jɔɔnw ni hɔrɔnw bɛɛ.

¹⁷ Ni Sogo nin ka taamasinyɛ, min ye a tɔgɔ ye, walima nimɔrɔ min bɛ bɛn a tɔgɔ ma, n'o tɛ mɔgɔ min kan, o tigi tɛ se ka foyi san, a tɛ se ka foyi feere.

¹⁸ Fɔɔ i ka kɛ hakilitigi ye yan dɛ. Nimɔrɔ min bɛ bɛn Sogo nin tɔgɔ ma, ni min ye lɔnnikɛla ye, o tigi k'o jati minɛ. O nimɔrɔ bɛ bɛn mɔgɔ tɔgɔ ma. O ye kɛmɛ wɔɔrɔ ni bi wɔɔrɔ ni wɔɔrɔ ye.