Yirari 12 - LAYIDUKURA

Sogojugu dɔ bɛ muso kɛlɛ

¹ O kɔ, ne ye kabako dɔ ye sankolo la. Muso dɔ tun lo, tile tun nɔrɔnin b'a kan, a seen lanin tun bɛ kalo kan, lolo tan ni fila kɛnin tun bɛ k'a kuun lamini.

² A kɔnɔman tun lo. A bɛ kulera a ka tiin bolo.

³ Ne ye kabako wɛrɛ ye yen tugu. O tun ye Sogojugu wuleman belebeleba dɔ ye, a bɔnin bɛ banba fɛ. A kungolo ye wolonwula ye, a gɔɔn ye tan ye. Masafugulan b'a kuun nunu bɛɛ la.

⁴ A kuu ye lolow tilan sabanan bɛɛ furan ka jigi duguma. A lɔnin tun bɛ muso nyafɛ, waasa ni muso jigira, a k'a deen nin bɔsi k'a nyimi.

⁵ Ayiwa, muso nin jigira dencɛ la, o min ka kan ka nigɛbere ta ka siyaw bɛɛ kolo n'o ye. Ala ye deen nin ta ka ta'a bila a yɛrɛ gɛrɛfɛ a ka masasigilan kan.

⁶ Muso bolila ka taa kongo kɔnɔ yɔrɔ dɔ la, Ala tun y'o min labɛn a ye ani a daradumuni bɛɛ. A bɛna to yen fɔɔ tile waa kelen ni kɛmɛ fila ni bi wɔɔrɔ.

⁷ O tuma na, kɛlɛ wilila sankolo la. Misɛli n'a ka mɛlɛkɛw ye Sogojugu nin n'a kɔmɔgɔw kɛlɛ.

⁸ Nga olu ma see sɔrɔ, o la, u ma se ka sigi arijana na tugu.

⁹ Misɛli ye Sogojuguba nin n'a kɔmɔgɔw gwɛn ka jigi dugukolo kan. U b'ale Sogojugu nin le wele fana ko sakɔrɔ, jinaw kuntigi, Sutana, dinyɛ nyagamibaga.

¹⁰ O kɔ, pɛrɛnkan dɔ bɔra arijana na ko: “K'a ta bii ma, an ka Ala ka kisili waati n'a ka sebagaya n'a ka masaya waati sera. Ala ka Mɔgɔ wolomanin ka setigiya waati lo, bari an badenw jalakibaga ka fanga nagasira. Ale le tun b'u jalaki suu ni tile k'u lɔ kiti la Ala nyafɛ.

¹¹ Nga an badenw sera a kɔrɔ Sagaden ka joli bɔnnin kɔsɔn, n'u ka seereya kɔsɔn, bari u ma ban k'u nii saraka.

¹² O kama, sigiyɔrɔ b'aw minw fɛ arijana na, aw ka nisɔndiya. Nga bɔnɛ ye aw dinyɛ mɔgɔw ni kɔgɔji kɔnɔ fɛɛnw ta ye, bari Sutana dimininba jigira aw fɛ yen. A b'a lɔn ko a halakilon tɔɔ man jan tugu.”

¹³ Sogojugu nin y'a lɔn tuma min na k'u y'ale gwɛn ka jigi dugukolo kan, a y'a daminɛ ka deen nin bamuso kɔɔ gwɛn.

¹⁴ Nga Ala ye gaman di muso ma, ko a ka pan ka taa kongo kɔnɔ yɔrɔ dɔ la, o min tun labɛnna a ye. A bɛna to yen n'a b'a daradumuni sɔrɔ fɔɔ saan saba ni tilan. Ale ni saa yɔrɔ janyanin bɛna to nyɔgɔn na.

¹⁵ O la, saa nin y'a daji seri muso nɔɔ fɛ, waasa o jii ka muso ta. O jii tun bɛ i n'a fɔ baji.

¹⁶ Nga dugukolo ye muso dɛmɛ. Sogojugu nin tun ye jiba min seri ka bɔ a daa la, dugukolo dayɛlɛla k'o bɛɛ min.

¹⁷ Sogojugu nin tun tɛ sera ka muso nin sɔrɔ minkɛ, a dimina a kɔrɔ kosɛbɛ, ka kɛlɛ nin yɛlɛma k'a sin a deenw ma, o minw bɛ Ala ka kuma labatora n'u sɔnnin bɛ Yezu ka kuma na.

¹⁸ O kɔ, a taara lɔ kɔgɔjida la.