Yirari 10 - LAYIDUKURA

Mɛlɛkɛ bɛ kitabu di Zan ma

¹ O kɔ, ne ye mɛlɛkɛ fangatigi wɛrɛ jigitɔ ye ka bɔ sankolo la. Sankaba tun kɛnin bɛ k'a lamini, sanmuru tun b'a kuun na. A nyada tun bɛ manamana i n'a fɔ tile, a seenw nyaa bɛ i n'a fɔ tasuma.

² Kitabufitini dɔ dayɛlɛnin tun b'a bolo. A y'a kinibolosen la kɔgɔji kan, k'a numanbolota la dugukolo kan.

³ A ;nunana kosɛbɛ, i n'a fɔ jara. A ;nunana ten minkɛ, saan pɛrɛnna sinyɛ wolonwula k'a jaabi.

⁴ Saan pɛrɛnna sinyɛ wolonwula minkɛ, u ye min fɔ, n ko n b'o sɛbɛn minkɛ, kumakan dɔ bɔra sankolo la ko: “I kana saan pɛrɛnkan wolonwula nunu darakan sɛbɛn, o to i kɔnɔ.”

⁵ O tuma na, n tun ye mɛlɛkɛ min lɔnin ye n'a seen kelen bɛ kɔgɔji kan ni kelen bɛ dugukolo kan, ale y'a kinibolo kɔrɔ ta sanfɛ.

⁶ Ala min bɛ yen tuma bɛɛ, ale min ye sankolo, ni dugukolo ani kɔgɔji n'u kɔnɔnafɛnw bɛɛ dan, mɛlɛkɛ nin kalila n'o tɔgɔ ye ko: “Kɔnɔni t'a la tugu!

⁷ Nga ni mɛlɛkɛ wolonwulanan y'a ka buru fiyɛ loon min na, Ala bɛn'a ka koo dogonin dafa o loon na, i n'a fɔ a tun y'o koo fɔ a ka kiraw ye cogo min na.”

⁸ N tun ye kumakan min mɛn ka bɔ sankolo la, o tigi kumana n fɛ tugu ko: “Mɛlɛkɛ min lɔnin bɛ kɔgɔji ni dugukolo kan, ta'a bolola kitabufitini nin minɛ.”

⁹ N taara mɛlɛkɛ nin dali ko a ka kitabu nin di yan. A ko n ma: “Hɔn, a minɛ k'a nyimi, a bɛna diya i daa la i n'a fɔ lii, nga a bɛna kunanya i kɔnɔ.”

¹⁰ Ayiwa, n ye kitabu nin minɛ mɛlɛkɛ bolo k'a nyimi. A tun ka di n daa la i n'a fɔ lii, nga a ye n kɔnɔ bɛɛ kunanya.

¹¹ O la, u y'a fɔ n ye ko: “I ka kan ka kiraya kɛ tugu, ka Ala ka kuma fɔ siya caaman ye, ni jamanaw, ani masa caaman ye.”