Tite 1 - LAYIDUKURA

Pɔli bɛ Titi fora

¹ Ne Pɔli min ye Ala ka jɔɔn, ani Yezu Krista ka ciden ye, ne welela waasa ka Ala ka mɔgɔwolomaninw dɛmɛ u ka se k'u jigi la Ala kan, ani ka tinyɛ lɔn min bɛ bɛn ni Alanyasiran ye.

² O jigi nin bɛ hɛrɛ banbali kan, Ala tinyɛtigi y'a daa di o min koo la kabini dinyɛ ma dan fɔlɔ.

³ A ka waati latigɛnin sera tuma min na, a y'o yira kibaru diman barika la. An kisibaga Ala le y'o baara kalifa ne ma.

⁴ Ne bɛ bataki nin ci Titi ma ele min ye ne ka deen ye tigitigi jigi koo la Krista la, anw bɛ o min kɔ. Faa Ala ni Yezu Krista an kisibaga ka nɛɛma ni hɛrɛ kɛ i ye.

Pɔli ko Titi ka Kɛrɛti jama senuman ka koo nyanabɔ

⁵ Ne y'i to Kɛrɛti mara la min kama, o ye i ka Ala ka jama ka koo tɔw nyanabɔ ka nyamɔgɔw sigi jama kunna dugu kelen kelen bɛɛ la, k'o kɛnyɛ ni n ka ladili ye.

⁶ I ka mɔgɔ woloma, jalakiyɔrɔ tɛ min na, a ka kɛ muso kelen tigi ye, ani a ka deenw ka kɛ mɔgɔw ye minw jigi bɛ Krista kan, minw tɔgɔjugu tɛ fɔ u ka taamajugu kɔsɔn, walima u ka murutili kama.

⁷ Ala ka jama nyamɔgɔ, ale min ye a ka jama marabaga ye, o ka kan ka kɛ mɔgɔ ye jalakiyɔrɔ tɛ min na. A kana kɛ yɛrɛ sagokɛla ye, a kana kɛ dusutigi ye fana, walima dɔrɔtɔ, walima mɔgɔ fariman ye, ani a kana kɛ mɔgɔ ye min bɛ nanbaran kɛ ka tɔnɔ sɔrɔ.

⁸ O tigi ka kan ka kɛ mɔgɔ ye min bɛ lonan ladon, konyuman ka di a ye, miirinyumantigi, mɔgɔsɛbɛ, mɔgɔ saniyanin, ani yɛrɛminɛla.

⁹ Jigi bɛ sɔrɔ Ala ka kuma min barika la, u nɔrɔnin ka to o la, o min bɛnnin bɛ n'an ka kalan ye. O cogo la, u bɛna se ka mɔgɔw ladi ni kalansɛbɛ ye, minw b'u sɔsɔ, ka olu ka filiyɔrɔ yira u la.

Kalanjugu koo

¹⁰ Mɔgɔ caaman bɛ yan, minw tɛ u yɛrɛ majigi, u kɛra kumakolon fɔbagaw ye dama, u kɛra mɔgɔlafilibagaw ye fana. U caaman ye Zuwifu ye minw sɔnna Krista ma.

¹¹ I ka kan k'u bali u kana kuma. U bɛ se ka faaw n'u deenw kunna cɛn, n'u ka kalanjugu ye u b'o min kɛ tɔnɔjugu kama.

¹² Kɛrɛtika dɔ, min tun kɛra u ka kira dɔ ye, ale tun ye kuma nin fɔ ko: “Kɛrɛtikaw ka galontigɛ ka ca, u ka fari i n'a fɔ kongosogow, nugubatɔw ni salabagatɔw lo.”

¹³ Kuma nin kɛra tinyɛ ye, o le y'a to i k'a gwɛlɛya u ma, janko u ka se ka la Ala la sɛbɛ la.

¹⁴ I b'a fɔ u ye ko u kana nɔrɔ Zuwifuw ka siirinw na tugu, ani mɔgɔ minw banna tinyɛ na, ko u kana sɔn olu ka fɔta ma.

¹⁵ Mɔgɔ minw saniyanin bɛ Ala nyakɔrɔ, fɛɛn bɛɛ saniyanin lo olu fɛ, nga mɔgɔ minw banna Ala la n'u saniyanin tɛ, olu fɛ, fɛɛn bɛɛ saniyanin tɛ, bari u ka miiri n'u ka dusukun bɛɛ finnin lo.

¹⁶ U b'u yɛrɛ kɛ Alalɔnbagaw ye, nga u ka kɛwaliw b'a yira k'u tɛ sɔn Ala ma. U kɛra fɛnjuguw ye, u tɛ mɛnni kɛ, u tɛ se ka konyuman si kɛ.