Tim 2nan 4 - LAYIDUKURA

Pɔli bɛ ladili di Timote ma kibaru diman fɔko la

¹ Krista ka nali n'a ka kuntigiya kɔsɔn, ne b'a nyini e fɛ Ala ni Yezu Krista nyakɔrɔ, ale min bɛna na nyanamanw ni suuw kiti, ko

² i ka Ala ka kuma fɔ tuma bɛɛ, waati nɔgɔman ni waatigwɛlɛn na. Mɔgɔ minw filila, i k'olu jalaki k'u ka filiyɔrɔ yira u la, k'u ladi ni munyuli ye u kalanwaati la.

³ Waati dɔ bɛna se mɔgɔw tɛna sɔn kalansɛbɛ ma, nga olu yɛrɛ ka miirijugu bɛna kɛ u bɛ kalanfa caaman ta u yɛrɛ ye, u bɛ koo minw fɛ, olu bɛna o fɔ u ye.

⁴ U tɛna sɔn tinyɛ ma k'a lamɛn, siirin lamɛnni le bɛna diya u ye.

⁵ Nga ele kɔni, i k'i yɛrɛ minɛ kosɛbɛ koo bɛɛ la. I ka sɛgɛn munyu, k'i ka baara kɛ ka nya min ye kibaru diman fɔli ye.

Pɔli ko ale ka baara dafara

⁶ Ne yɛrɛ kɔni, ne kɛra saraka ye Ala ma ka ban, waati sera ne ka bɔ dinyɛ na.

⁷ Ne ye baara kɛ ka nya, ne sera ne ka boli danyɔrɔ ma, n jigi lanin tora Matigi kan.

⁸ Sisan yɛrɛ, ne ka see sɔrɔli sara bɛ ne makɔnɔna, o ye tilenninya sara ye, Matigi ale min kɛra kititigɛla tilennin ye, a bɛna o di ne ma laban loon na. A tɛna o di ne kelen dama ma dɛ, nga mɔgɔ minw b'a ka nali makɔnɔna ni nisɔndiya ye, a bɛn'a di olu bɛɛ ma fana.

Pɔli ka ladili laban Timote ma

⁹ I ka banba ka na ne fɛ joona.

¹⁰ Demasi faranna ne la bari a ye dinyɛ kanu ka tɛmɛ, a taara Tesaloniki. Keresan taara Galati mara la, Titi fana taara Dalimati mara la.

¹¹ Luka kelen le bɛ ni ne ye yan. N'i bɛ na, i ka na ni Mariki ye. Ale bɛ se ka ne dɛmɛ baara la.

¹² Ne ye Tisiki ci Efɛzi.

¹³ N'i bɛ na, i ka ne ka foroca ta ka na n'o ye, ne y'o min to Karipisi fɛ Torowasi. I ka na ni kitabuw fana ye, ne bɛ minw fɛ yɛrɛ, o ye gololamanw ye.

¹⁴ Numucɛ Alɛkisandiri ye kojugu caaman kɛ ne la dɛ, Matigi le bɛn'a sara ka kɛnyɛ n'a ka koo kɛtaw ye.

¹⁵ Ele, i k'i yɛrɛ kɔlɔsi a la, bari a y'an sɔsɔ kosɛbɛ an ka waajuli kɛtuma na.

¹⁶ Ne ka kiti fɔlɔ loon na, mɔgɔ si ma sɔn ka foyi fɔ ka ne dɛmɛ, u bɛɛ bolila ka ne to. Ne bɛ Ala dali a ka yafa u ma.

¹⁷ Nga Matigi yɛrɛ le tora ne fɛ ka fanga di ne ma, fɔɔ a kɛra ten, ne sera ka Ala ka kuma fɔ u ye ka gwɛ. O cogo la, siya wɛrɛw bɛɛ y'o mɛn, ani ne kisira ka bɔ waraba daa la ten.

¹⁸ Matigi bɛna ne kisi kojugu sifa bɛɛ ma, ka n don arijana na. Bonya ka la ale kan tuma bɛɛ. Amiina.

Pɔli ka foli laban Timote ma

¹⁹ I ka Pirisika ni Akilasi, ani Onezifɔri ka somɔgɔw fo.

²⁰ Erasiti tora Korɛnti, ne ye Torofimu to Mile, bari a tun man kɛnɛ.

²¹ I ka banba ka na yan ni saminya ka don. Ebilisi, ni Pidansi, ani Linisi, ni Kulodiya, ani an balimaw bɛɛ b'i fora.

²² Matigi ka to i fɛ, Ala ka nɛɛma kɛ aw bɛɛ ye.