Rɔmukaw 9 - LAYIDUKURA

Ala ye mɔgɔ minw woloma

¹ Krista ka jɛnnyɔgɔnya barika la ne bɛ min fɔ, o ye tinyɛ ye, galon tɛ, Nii Senuman yɛrɛ b'a yira ne dusukun na ko ne bɛ min fɔ, ko tinyɛ lo.

² Dusukasi bɛ ne la kosɛbɛ, ne nii tɔɔrɔnin lo tuma bɛɛ.

³ Bari ne yɛrɛ b'a fɛ n niin ka bɔ Ala ka koo la ka n faran ka bɔ Krista la, ne balimaw kɔsɔn, ne ni minw ye siya kelen ye,

⁴ olu minw ye Isirayɛlidenw ye. Ala ye olu minw minɛ k'o kɛ a ka deenw ye, k'a yɛrɛ yira u la, ka bɛn n'u ye sinyɛ caaman, ka sariya sigi u ye k'a yɛrɛ batocogo yira u la, ka layiduw ta u ye.

⁵ Ibrayima ni Isiyaka ani Yakuba le ye u faaw ye. Krista ni olu ye siya kelen ye, a wolola u ka deen dɔ fɛ. Ala bɛ fɛɛn bɛɛ kunna, a ka tando tuma bɛɛ! Amiina.

⁶ O bɛɛ la, Ala ka layidu dafara, hali ni siya min bɔra Yakuba la, o bɛɛ ma kɛ Isirayɛlidensɛbɛw ye.

⁷ Siya min bɔra Ibrayima la, olu bɛɛ ma wele ko a deenw, bari Ala tun y'a fɔ a ye ko: “I deen Isiyaka kɔmɔgɔw le bɛna wele i deenw.”

⁸ O kɔrɔ ko deen minw wolola ka kɛnyɛ ni farisogo ye, olu ma kɛ Ala deenw ye dɛ. Ayi, fɔɔ deen minw sɔrɔla ka kɛnyɛ ni Ala ka layidu ye, olu le ye Ala deenw ye.

⁹ Bari Ala y'a daa di ko: “Saan wɛrɛ ne bɛna segi nin waati nyɔgɔn na ka n'a sɔrɔ ni deen bɛ Sara bolo.”

¹⁰ O dama tɛ, Erebɛka fana, ale ye dencɛ fila sɔrɔ an bɛma Isiyaka fɛ.

¹¹ Ala tun b'a fɛ a ka koo latigɛnin ka kɛ a ka mɔgɔ wolomani koo la minkɛ, o la, o deen nunu tun ma wolo fɔlɔ, u tun ma sɔrɔ ka konyuman, walima kojugu kɛ fɔlɔ,

¹² a y'a fɔ Erebɛka ye a deen nunu koo la ko: “Kɔrɔcɛman bɛna baara kɛ dɔgɔcɛman ye.” A y'a yira ten ko ale tɛ mɔgɔ woloma ka kɛnyɛ n'o tigi ka kɛwali ye, fɔɔ a yɛrɛ sago.

¹³ I n'a fɔ a fɔra Ala ka kuma na cogo min na ko: “Yakuba koo diyara ne ye, Ezawu koo man di ne ye.”

¹⁴ An bɛna mun fɔ sa? O tuma na, Ala ka koo tilennin tɛ wa? Ayi dɛ!

¹⁵ Bari a y'a fɔ Musa ye ko: “Ne b'a fɛ ka makari mɔgɔ min na, ne bɛ makari o tigi la, ne b'a fɛ ka hinɛ mɔgɔ min na, ne bɛ hinɛ o la.”

¹⁶ O cogo la, o tɛ sɔrɔ mɔgɔ sago barika la, walima mɔgɔ ka jijali sababu la, nga fɔɔ Ala ka makari.

¹⁷ O cogo la fana, Ala y'a fɔ Fara;nɔn ye a ka kuma na ko: “Ne y'i sigi masaya la kuun min na, o ye janko ne ka se ka n ka sebagaya yira, ani ne tɔgɔ ka se ka bɔ dinyɛ faan bɛɛ la.”

¹⁸ O le kɔsɔn, ni Ala b'a fɛ ka makari mɔgɔ min na, a bɛ makari o tigi la, n'a b'a fɛ ka mɔgɔ min dusu gwɛlɛya, a b'o tigi ta fana gwɛlɛya.

Ala ka dimi n'a ka munyu

¹⁹ Dɔw bɛ se k'a fɔ ne ye ko: “Mun na Ala b'an jalaki tugu? Bari mɔgɔ tɛ se ka ban Ala ta ma.”

²⁰ E adamaden, e ye mun ye n'i bɛ sɔsɔli kɛ ni Ala ye? Daga bɛ se k'a fɔ a dilanbaga ye ko: “Mun na e ye ne dilan ten wa?”

²¹ Bɔgɔmana ma kɛ dagadilanbaga ta ye wa? A bɛ se k'o bugɔ kelen nin ta ka daganyuman dilan n'a ye, a bɛ se k'o bugɔ kelen nin ta ka daga wɛrɛ dilan n'a ye, min ma nyi kosɛbɛ.

²² Ala tun b'a fɛ k'a ka sebagaya n'a ka dimi yira, nga a munyuna o daga cɛnta nunu kɔrɔ.

²³ A y'o kɛ janko k'a ka nyumanya dafanin yira dagaw la, a makarila minw na. A tun kɔnna ka olu minw labɛn bonya kama.

²⁴ O kɔrɔ ko a ye an minw wele, a ma weleli kɛ ka bɔ Zuwifuw dama cɛma, nga a ye dɔw fana wele ka bɔ siya wɛrɛw cɛma.

²⁵ I n'a fɔ a fɔra cogo min na Oze ka kitabu kɔnɔ ko: “Mɔgɔ minw tun tɛ ne Ala ka mɔgɔw ye, ne bɛna olu kɛ ne ka mɔgɔw ye, ani minw koo tun man di ne ye, ne bɛna olu koo diya ne yɛrɛ ye.

²⁶ Yɔrɔ min na a tun fɔra u ye ko: ‘Aw ma kɛ ne Ala ka mɔgɔw ye’, o yɔrɔ yɛrɛ la, u bɛna wele ko Ala deenw.”

²⁷ Kira Ezayi fana y'a fɔ Isirayɛlidenw ka koo la ko: “Hali ni Isirayɛlidenw cayara i n'a fɔ bada la cɛncɛn, mɔgɔ damani dɔrɔn le bɛna kisi.

²⁸ Bari Matigi ye kuma min fɔ, a bɛna o bɛɛ kɛ ka dafa teliya la dugukolo kan.”

²⁹ I n'a fɔ Ezayi tun kɔnna k'a fɔ cogo min na ko: “Ni Setigi Ala tun ma dɔɔni to o ka kɛ an sii ye, an tun bɛna halaki i n'a fɔ Sodɔmukaw, walima Gɔmɔrikaw.”

³⁰ An bɛna mun le fɔ? Siya wɛrɛ minw tun ma tilenninya nyini, olu y'a sɔrɔ, jigi min bɛ la Ala kan, o tilenninya bɛ sɔrɔ o barika la.

³¹ Isirayɛlidenw, olu tun bɛ cogo nyinina waasa Ala k'u jati mɔgɔtilenninw ye sariya barika la, nga u ma o sɔrɔ.

³² Mun le y'o kɛ? Bari yan ni olu ka tilenninya nin nyini n'u jigi lanin bɛ Ala kan, u y'a nyini ni kɛwali ye. O la, u talonna kabakuru la.

³³ A fɔra Ala ka kuma na ko: “Ne bɛ seen talon kabakuru bila Siyɔn dugu kɔnɔ, kabakuru min bɛ mɔgɔ ben, ne y'o bila yen. Ni min lar'a la, o tigi tɛna maloya.”