Rɔmukaw 7 - LAYIDUKURA

An hɔrɔnyanin lo sariya faan fɛ

¹ N balimaw, n y'a lɔn ko aw bɛ sariya koo lɔn. O la, n bɛ nin kuma fɔ aw ye. Aw b'a lɔn ko ni mɔgɔ bɛ nii na, o tuma na a bɛ sariya kɔrɔ.

² Muso min furula, sariya bɛ yen min b'a wajibiya ka to a cɛɛ fɛ n'o bɛ nii na, nga n'a cɛɛ sara, muso nin b'a yɛrɛ sɔrɔ ka bɔ sariya nin kɔrɔ.

³ N'a cɛɛ bɛ nii na n'a taara furu cɛɛ wɛrɛ fɛ, u bɛn'a fɔ ko a ye kakalaya kɛ. Nga n'a cɛɛ sara a ka sɔrɔ ka taa furu, o sariya nin t'a kan tugu, a fana ma kakalaya kɛ.

⁴ N balimaw, aw fana bɛ ten. Krista ka saya barika la, aw y'aw yɛrɛ sɔrɔ ka bɔ sariya kɔrɔ ka kɛ a ta ye sisan, ale min kununna, janko an ka baara sabatinin kɛ Ala ye.

⁵ An fana, tuma min na nigɛjugu tun ye see sɔrɔ an kan, kojugu nigɛ tun b'an minɛ k'an tɔɔrɔ sariya barika la, janko an ka baarajugu kɛ o min bɛ laban ni halakili ye.

⁶ Nga fɛɛn min tun y'an kɛ jɔɔn ye, an hɔrɔnyara ka bɔ ale bolo. Sisan, an bɛ se ka baara kɛ Ala ye cogokura la Nii Senuman barika la, o tɛ kɛ cogokɔrɔ la tugu, o min koo fɔra sariya la.

Sariya ka baara

⁷ An ka mun le fɔ sa? O tuma na sariya kɛra kojugu ye wa? Ayi dɛ! Ne ye kojuguko faamu sariya le barika la. Ne tun tɛn'a lɔn ko n'i nyaa bɔra i tɔnyɔgɔn ka fɛɛn dɔ fɛ, o ye kojugu ye, n'a tun ma fɔ sariya la ko: “I nyaa kana bɔ i tɔnyɔgɔn ka fɛɛn fɛ.”

⁸ O cogo la, kojugu ye sira sɔrɔ ka banba ka nigɛjugu sifa bɛɛ don ne dusu la sariya barika la. Bari ni sariya siginin tɛ yen, kojuguko fana tɛ yen.

⁹ Fɔlɔfɔlɔ, Ala ka sariya tun ma sigi tuma min na, ne tun bɛ hɛrɛ la, nga a nana sigi tuma min na, kojugu ye fanga sɔrɔ.

¹⁰ O cogo la, sariya min ka kan ka hɛrɛ kɛ mɔgɔ ye, ale kɛra ne fɛ halakifɛn ye.

¹¹ Bari kojugu ye sira sɔrɔ sariya barika la k'a kɛ ne filila ka tunu pewu.

¹² O cogo la, sariya ka nyi, Ala ye min fɔ, o fana ka nyi ani a tilennin lo.

Kojugu fanga bɛ adamaden kan

¹³ O tuma na, fɛɛn min ka nyi, ale le kɛra ne fɛ halakifɛn ye wa? Ayi dɛ! Nga kojugu lo, fɛɛn min ka nyi, kojugu ye cogo nyini o le sababu la ka ne halaki, janko a ka se k'a yɛrɛ yira k'a gwɛ kosɛbɛ ko ale ka fari sariya barika la.

¹⁴ An y'a lɔn ko sariya bɔra Ala fɛ, nga ne do ye barikatan ye, ne bɛ kojugu bolo i n'a fɔ jɔɔn.

¹⁵ Ne bɛ min kɛ, ne t'o faamuna. Fɛɛn min ka di ne ye, ne t'o kɛ, nga fɛɛn man di ne ye ne b'o le kɛ.

¹⁶ Fɛɛn min man di ne ye, ni ne b'o le kɛ, o tuma na, ne sɔnna ko sariya ye fɛnnyuman ye.

¹⁷ O la do, fɛɛn min bɛ kɛra, o tɛ ne nɔɔ ye, kojugu min bɛ ne dusu la, ale nɔɔ lo.

¹⁸ Bari ne y'a lɔn ko fɛɛn min bɛ ne dusu la, o ma nyi. Konyumankɛ nigɛ bɛ ne la, nga n tɛ se.

¹⁹ Ne b'a fɛ ka konyuman min kɛ, ne tɛ se k'o kɛ, fɔɔ kojugu ne t'o min fɛ.

²⁰ Fɛɛn min man di ne ye, ni ne b'o le kɛ, o b'a yira k'o tɛ ne nɔɔ ye, nga o ye kojugu nɔɔ ye ale min bɛ ne dusu la.

²¹ Koo min bɛ ne la, ne y'o faamu. Tuma min na ni ne b'a fɛ ka konyuman kɛ, n tɛ se k'o kɛ, fɔɔ kojugu.

²² Ne dusu la kɔni, Ala ka sariya koo ka di ne ye.

²³ Nga n y'a ye, koo min ka di ne ye ni ne b'a fɛ k'o kɛ, fɛɛn dɔ bɛ ne bali k'o kɛ. Ale le bɛ kɛ kojugu bɛ fanga sɔrɔ ne kan.

²⁴ Ne ye sɛgɛnbagatɔ ye! N farisogo bɛ taara halakiyɔrɔ la. Jon le bɛna ne kisi o ma?

²⁵ Ne bɛ barika la Ala ye ale min b'o kɛ an Matigi Yezu Krista sababu la! Ne sɔnnin bɛ Ala ka sariya ma, nga farisogo ka barikatanya le y'a kɛ ne bɛ kojugu bolo.