Rɔmukaw 6 - LAYIDUKURA

Ka kɛ mɔgɔ nyanaman ye Yezu Krista barika la

¹ An ka mun le fɔ sa? An ka kan ka to kojugu la janko Ala ka makari bɛ bonya wa?

² Ayi dɛ! An minw kɛra i n'a fɔ suu, kojuguko ta faan fɛ, an bɛ se ka to kojugu la cogo di?

³ Yala aw m'a lɔn ko an minw bɛɛ batizera Yezu Krista tɔgɔ la, ko an batizera ka jɛn n'a ye a ka saya koo la fana wa?

⁴ An batizera ka jɛn n'a ye a ka saya koo la minkɛ, an fana suu donna n'a ye janko Krista kununna Faa Ala ka sebagaya barika la cogo min na, an fana jogo ka yɛlɛma ka kɛ kura ye.

⁵ Bari n'an jɛnna n'ale ye sɛbɛ la a ka saya koo la, an fana bɛna kunun n'a ye.

⁶ An ka nin faamu kosɛbɛ, ko an jogokɔrɔ korila ka gwengwen nyɔgɔn fɛ ni Krista ye, janko o daa ka bila, an fana k'an yɛrɛ sɔrɔ ka bɔ kojugu bolo.

⁷ Bari ni mɔgɔ min sara, o tigi daa tɛ kojuguko la.

⁸ N'an jɛnna ni Krista ye ka sa, an bɛ la a la ko an bɛna to nii na a fɛ.

⁹ Tinyɛ na, an y'a lɔn ko Krista kununna, ale tɛ sa tugu, saya tɛ se a kɔrɔ tugu.

¹⁰ Bari a sara tuma min na, a sara janko ka kojugu nagasi tuma bɛɛ, sisan a nyanaman lo Ala kɔsɔn.

¹¹ O cogo la, aw fana k'aw yɛrɛ jati i n'a fɔ suu, kojuguko ta faan fɛ, ka kɛ mɔgɔ nyanaman ye Ala ta faan fɛ Yezu Krista barika la.

¹² O la, aw farisogo min bɛna toli, aw kana sɔn kojugu ka kuntigiya kɛ ale la tugu, k'aw bila nigɛjugu la.

¹³ Aw kana aw ka farikolo yɔrɔ si kɛ kojugukɛfɛn ye ka to kojugu la. Nga aw ka kɛ i n'a fɔ mɔgɔ min sara ka kunun, k'aw farikolo yɔrɔ bɛɛ kɛ konyumankɛ ta ye, k'u bila Ala ka baara la.

¹⁴ Kojugu tɛna see sɔrɔ aw kan tugu. Bari aw tɛ sariya kɔrɔ tugu, nga aw bɛ nɛɛma le kɔrɔ.

An ka kɛ mɔgɔtilenninw ye

¹⁵ O tuma na, an ka to ka kojugu kɛ bari an tɛ sariya kɔrɔ tugu fɔɔ nɛɛma wa? Ayi dɛ!

¹⁶ Yala aw m'a lɔn ko n'aw y'aw yɛrɛ di fɛɛn min ma ka kɛ i n'a fɔ a ka jɔɔn, ka to ka mɛnni kɛ a fɛ, aw bɛ kɛ o fɛɛn nin ka jɔɔn ye wa? N'a kɛra kojuguko ye, o laban ye halakili ye. Nga Ala sago kɛli bɛ na ni tilenninya ye.

¹⁷ An bɛ barika la Ala ye bari aw tun bɛ kojugu bolo, nga sisan u y'aw kalan min na, aw sɔnna o la n'aw dusukun bɛɛ ye,

¹⁸ k'aw yɛrɛ sɔrɔ ka bɔ kojugu bolo ka kɛ Ala ka jɔɔnw ye ka tilenninyakow kɛ.

¹⁹ Ne bɛ kuma aw fɛ adamaden ka miiriya cogo la, o min bɛ kɛnyɛ n'aw ka barikatanya ye. Aw tun y'aw yɛrɛ di kojugu ma ka kɛ i n'a fɔ a ka jɔɔn ka koferekeninw kɛ, ka muruti Ala ma. Sisan aw ka kɛ Ala ka jɔɔnw ye ka tilenninyako kɛ, ka kɛ a ta ye pewu pewu.

²⁰ Tuma min na aw tun bɛ kojugu bolo, tilenninyako tun tɛ aw ka sira la.

²¹ Aw ye mun le sɔrɔ o la, ni maloya tɛ bii nin na? Bari o bɛɛ laban ye halaki ye.

²² Nga sisan aw y'aw yɛrɛ sɔrɔ ka bɔ kojugu bolo ka kɛ Ala ka jɔɔnw ye, aw bɛ fɛɛn min sɔrɔ o la, o ye dusukun saniyako ye o min laban ye hɛrɛ ye min tɛ ban.

²³ Bari kojugu sara ye halakili ye, nga Ala ka makariko, o bɛ hɛrɛ banbali di an Matigi Yezu Krista barika la.