Rɔmukaw 4 - LAYIDUKURA

Ibrayima le ye jigitigiw faa ye

¹ An bɛna mun le fɔ an bɛma Ibrayima koo la? A ye mun le sɔrɔ adamadenya barika la?

² Ni Ibrayima jatira mɔgɔtilennin ye a ka kɛwaliw barika la, a bɛ se k'a yɛrɛ bonya, nga a tɛ se k'o kɛ Ala nyakɔrɔ.

³ Bari a fɔra Ala ka kuma na ko: “Ibrayima lara Ala la, o la, a jatira mɔgɔtilennin ye.”

⁴ Mɔgɔ min ye baara kɛ, ale ka sara tɛ jati bonyafɛn ye, a ka kan n'a ye le.

⁵ Mɔgɔ min ma kɛwalinyuman kɛ, k'a sɔrɔ a y'a jigi la Ala kan, ale min bɛ sɔn ka mɔgɔkolon kɛ mɔgɔsɛbɛ ye, a bɛna o tigi jati mɔgɔtilennin ye a ka lanaya kɔsɔn.

⁶ Ala bɛ mɔgɔ min jati mɔgɔtilennin ye n'a ma o tigi ka kɛwali jati, masacɛ Dawuda b'o tigi ka dagamuko fɔ ko:

⁷ “Mɔgɔ min ka kojuguw yafara, n'a ka kojuguw yafara pewu pewu, o tigi dagamuna.

⁸ Matigi tɛ mɔgɔ min ka kojugu jati tugu, o tigi dagamuna.”

⁹ Dagamu min koo fɔra dɛ, ale tɛ dan Zuwifuw dama ma, siya wɛrɛw fana niin b'a la. An y'a fɔ ka ban ko Ibrayima lara Ala la, o le y'a to Ala y'a jati mɔgɔtilennin ye.

¹⁰ A jatira mɔgɔtilennin ye tuma jumɛn? A tun ma kɛnɛkɛnɛ tuma min na wa, walima a kɛnɛkɛnɛnin kɔ? O ma kɛ a kɛnɛkɛnɛnin kɔ dɛ, o kɛra n'a ma kɛnɛkɛnɛ fɔlɔ.

¹¹ O kɔ, kɛnɛkɛnɛko nana d'a ma ka kɛ taamasinyɛ ye, k'a yira ko a lara Ala la minkɛ, Ala y'a jati mɔgɔtilennin ye o kɔsɔn k'a to a ka kɛnɛkɛnɛbaliya la. O cogo la fana, kɛnɛkɛnɛbali minw bɛɛ lara Ala la ni olu fana jatira mɔgɔtilenninw ye Ala fɛ, Ibrayima kɛra u bɛɛ faa ye.

¹² A fana kɛra mɔgɔkɛnɛkɛnɛninw faa ye, olu minw ma u jigi la kɛnɛkɛnɛko dama kan, nga u y'u jigi la Ala kan i n'a fɔ an faa Ibrayima y'a kɛ cogo min na k'a sɔrɔ a tun ma kɛnɛkɛnɛ fɔlɔ.

¹³ Ala ye layidu ta Ibrayima ye ko a bɛna dinyɛ di a n'a kɔmɔgɔw ma ka kɛ u ta ye. O ma kɛ sariya labatoli kɔsɔn dɛ, nga a y'o kɛ bari Ibrayima lar'a la, o la, Ala y'a jati mɔgɔtilennin ye.

¹⁴ N'o koo tun bɛ sɔrɔ sariya labatoli fɛ, jigiko tun bɛna kɛ fu ye, layidu fana tun bɛna kɛ fu ye.

¹⁵ Bari dusudimi bɛ sɔrɔ sariya sababu la. Sariya siginin tɛ yɔrɔ min na, sariya cɛnko fana tɛ fɔ o yɔrɔ la.

¹⁶ Ayiwa, Ala ye koo min layidu ta, o sɔrɔko bɛ bɔ jigi le barika la, janko o ka kɛ nɛɛmako ye, Ibrayima kɔmɔgɔw bɛɛ ka se k'u niyɔrɔ sɔrɔ o la. Mɔgɔ minw bɛ sariya labato, olu dama ka koo tɛ, nga mɔgɔ minw b'u jigi la Ala kan i n'a fɔ an bɛɛ faa Ibrayima, olu fana ta lo.

¹⁷ A fɔra Ala ka kuma na ko: “Ne Ala y'i kɛ siya caaman faa ye.” Tinyɛ lo Ala nyakɔrɔ, an faa lo a y'a jigi la ale min kan, ale lo bɛ suuw kunun, fɛɛn bɛɛ danbaga lo fana.

¹⁸ Mɔgɔ tun tɛ se k'a jigi la fɛɛn min kan, a y'a jigi la o kan. O la, a kɛra siya caaman faa ye, ka kɛnyɛ ni Ala tun ye min fɔ a ye ko: “I ka kɔmɔgɔw bɛna caya.”

¹⁹ A tun kɔrɔla kosɛbɛ, a sii tun sera saan kɛmɛ nyɔgɔn ma, a ka muso Sara fana sii tun tɛmɛna denwolo ma, o bɛɛ n'a ta a jigi ma tigɛ, k'a sɔrɔ a tun surunyana saya ma.

²⁰ Ala ka layidu koo ta faan fɛ, a jigi ma tigɛ fewu, nga jigi barika la a ye fanga sɔrɔ ka bonya la Ala kan.

²¹ A lanin tun b'a la kosɛbɛ ko Ala y'a daa di koo min na, ko see b'a ye k'o kɛ.

²² O le y'a to “Ala y'a jati mɔgɔtilennin ye.”

²³ A fɔra Ala ka kuma na ko: “O le y'a to a jatira,” o kuma nin ma fɔ ale dama kɔsɔn dɛ.

²⁴ Nga an fana niin b'o la, Ala bɛna an minw jati mɔgɔtilenninw ye bari an lara Ala la ale min y'an Matigi Yezu kunun.

²⁵ U ye Yezu faga an ka kojugu kɔsɔn, a kununna janko k'an kɛ mɔgɔtilenninw ye.