Rɔmukaw 16 - LAYIDUKURA

Pɔli ka foli

¹ Ne b'an balimamuso Febe koo kalifa aw ma, ale min bɛ baara kɛ Ala ka jama cɛma Sankere.

² Aw k'a minɛ ka nya i n'a fɔ Ala ka jama bɛ mɔgɔ minɛ cogo min na, n'a mako bɛ aw ka dɛmɛli la koo minw na, aw k'a dɛmɛ o la. Bari a ye mɔgɔ caaman dɛmɛ kosɛbɛ, hali ne yɛrɛ.

³ Aw ka Pirisika ni Akilasi fo, olu ye ne baarakɛnyɔgɔn dɔw ye Yezu Krista ka baara la.

⁴ Olu tun y'u yɛrɛ nii di janko ne ka se ka kisi saya ma. Ne dama tɛ barika la u ye dɛ, Ala ka jama bɛɛ min bɛ siya wɛrɛw cɛma, olu fana bɛ barika la u ye.

⁵ Ala ka jama min bɛ lajɛn u ka soo, aw ka olu fo fana. Aw ka Epenɛti fo, ale min koo ka di ne ye, ale le kɔnna ka la Krista la Azi mara la.

⁶ Aw ka Mariyamu fo ale min jijara aw koo la kosɛbɛ.

⁷ Aw ka Anduronikusi ani Zuniyasi fo, olu minw ye ne ka mɔgɔw ye ani ne ni olu, an bɛɛ ye kaso kɛ nyɔgɔn fɛ. Cidenw lo minw lɔnnin lo kosɛbɛ, u kɔnna ka Krista lɔn ne nya.

⁸ Aw ka Anpiliyasi fo, ale koo ka di ne ye Matigi kɔsɔn.

⁹ Aw ka Urubɛn fo, ale ye ne ka baarakɛnyɔgɔn dɔ ye Krista ka baara la, ani aw ka ne terinyuman Sitasisi fo.

¹⁰ Aw ka Apɛlɛsi fo, ale min sɔnna tɔɔrɔ ma Krista kɔsɔn. Minw bɛ Arisitobuli ka soo, aw ka olu fo.

¹¹ Aw ka ne ka balimacɛ Erodiyɔn fo, ani Krista kɔmɔgɔ minw bɛ Narisisi ka soo kɔnɔ.

¹² Aw ka Tirifɛni ni Tirifɔsi fo, o muso fila nunu ye baara kɛ kosɛbɛ Matigi ye. Aw ka ne ka terimuso Pɛrisi fo, ale fana y'a yɛrɛ di ka baara kɛ Matigi ye.

¹³ Aw ka Urufusi fo, ale min ye Matigi ka baarakɛlanyuman ye, ani a bamuso, ne fana bamuso lo.

¹⁴ Aw ka Asɛnkiriti, ni Filegɔn, ani Ɛrimɛsi, ni Patorobasi, ni Ɛrimɛsi, ani balima minw bɛ n'u ye, ka olu fo.

¹⁵ Aw ka Filologi ani Zuli, ni Nere an'a balimamuso, ni Olɛnpasi ani Ala ka mɔgɔ minw bɛɛ b'u fɛ yen, ka olu fo.

¹⁶ Aw ka nyɔgɔn fo kosɛbɛ ni kɔnɔgwɛ ye. Krista ka jama bɛɛ b'aw fo.

¹⁷ N balimaw, mɔgɔ minw bɛ faranni kɛra, ani ka ban an ka kalan na, ne b'aw dali ko aw k'aw yɛrɛ kɔlɔsi olu la. Aw kana jɛn n'u ye.

¹⁸ O mɔgɔ nunu tɛ baara kɛra an Matigi Krista ye, nga janko u kɔnɔbara ka fa. Fanga tɛ mɔgɔ minw na o bɛ olu kunnacɛn n'u ka kuma diman ye ani u ka nanbarankuma ye.

¹⁹ Aw kɔni, aw sɔnna Ala ta ma cogo min na, mɔgɔ bɛɛ b'o kala ma, o la, ne bɛ nisɔndiya aw kɔsɔn. Halibi, ne b'a fɛ aw ka hakili sɔrɔ ka se ka konyuman kɛ, aw kana kojugu kɛ.

²⁰ Hɛrɛtigi Ala bɛna Sutana ben aw seen kɔrɔ yan ni dɔɔni. An Matigi Yezu Krista ka nɛɛma ka kɛ aw ye!

²¹ Ne ka baarakɛnyɔgɔn Timote b'aw fora, ani Lusiyusi, ni Zazɔn, ani Sozipatorosi, olu minw ye ne ka mɔgɔw ye.

²² Matigi tɔgɔ la ne Teritiyusi b'aw fo, ne min ye nin bataki sɛbɛn.

²³ Ne ka jatigicɛ Gayusi b'aw fo, Ala ka jama bɛ to ka lajɛn ale min fɛ. Erasiti, ale min ye dugu bɛɛ ka nafolo kɔlɔsibaga ye, ale fana b'aw fora, an'an balima Karitusi fana. [

²⁴ An Matigi Yezu Krista ka nɛɛma ka kɛ aw bɛɛ kan, amiina.]

Bonya ka la Ala kan

²⁵ An ka Ala fo, ale min bɛ se ka barika don aw la Yezu Krista ka kibaru diman kɔsɔn, ne b'o min fɔ ka kɛnyɛ ni tinyɛ ye an y'o min lɔn o min tun kɛra gundo ye kabini fɔlɔfɔlɔ.

²⁶ Nga sisan a yirala kɛnɛ kan, siya wɛrɛw bɛɛ bɛ se k'a lɔn kiraw ka sɛbɛ barika la, ka kɛnyɛ ni Ala ka cii ye, janko u ka se ka la Ala la ka mɛnni kɛ a fɛ.

²⁷ Ala kelenpe ye hakilitigi ye. Bonya ka la a kan Yezu Krista barika la tuma bɛɛ la. Amiina.