Rɔmukaw 14 - LAYIDUKURA

Barikatigiw ni barikatanw ka koo

¹ Mɔgɔ min barika ka dɔgɔ Krista ka sira la, aw k'ale minɛ ka nya, aw kana to a kɔrɔfɔli la.

² Ni jigi bɛ mɔgɔ dɔ fɛ kosɛbɛ o le kɔsɔn a bɛ fɛɛn bɛɛ dumu, ni mɔgɔ min barika ka dɔgɔ Krista ka sira la, n'ale tɛ fɛɛn bɛɛ dumu fɔɔ nankɔfɛn dama,

³ mɔgɔ min bɛ fɛɛn bɛɛ dumu, ale man kan ka dɔ nin dɔgɔya, ani min tɛ fɛɛn bɛɛ dumu, ale fana kan'a tɔnyɔgɔn nin jalaki, bari Ala sɔnna a ma.

⁴ E min bɛ mɔgɔ wɛrɛ ka baaraden jalaki, e ye jon ye? A ye baaranyuman kɛ wo, a m'a kɛ wo, o t'i ka sira la, o ye a tigi ka koo ye. A do bɛna baaranyuman kɛ, bari see bɛ Matigi ye k'o kɛ.

⁵ Mɔgɔ bɛ yen min bɛ loonw jatiminɛ, dɔ fɛ loon bɛɛ ye kelen ye. A daan ye u jigi ka to u ka miiriya kan.

⁶ Mɔgɔ min bɛ loonw jatiminɛ o tigi b'o kɛ Matigi le kɔsɔn, min fana bɛ fɛɛn bɛɛ dumu, o tigi fana b'o kɛ Matigi le kɔsɔn, a fana bɛ barika la Ala ye. Min tɛ fɛɛn bɛɛ dumu, o tigi fana b'o kɛ Matigi le kɔsɔn, a fana bɛ barika la Ala ye.

⁷ O la, mɔgɔ si tɛ to sii la a yɛrɛ kɔsɔn, n'a fana sara, a ma sa a yɛrɛ ma.

⁸ An bɛ sii la wo, an bɛ yen Matigi le kɔsɔn, n'an sara wo, an sara Matigi le kɔsɔn. O la, an tora sii la wo, an sara fana wo, an ye Matigi ta ye.

⁹ Krista sara ka kunun janko a ka kɛ mɔgɔ nyanamanw ni suuw ka Matigi ye.

¹⁰ Ele, mun na i b'i balima jalaki? Mun na i b'i balima dɔgɔya? An bɛɛ le bɛna lɔ Ala ka kiti tigɛyɔrɔ la.

¹¹ Bari a fɔra Ala ka kuma na ko: “Ne Matigi nyanaman lo,” ko: “Mɔgɔ bɛɛ bɛn'a kunbiri gwan ne nyakɔrɔ, ani mɔgɔ bɛɛ bɛna Ala tando.”

¹² O cogo la, an kelen kelen bɛɛ bɛna lɔ n'an kunko ye Ala nyakɔrɔ.

¹³ O la, an ka nyɔgɔn jalakiko dabila sa. Aw k'aw yɛrɛ kɔlɔsi aw kana kɛ sababujugu ye aw balima dɔ ma.

¹⁴ Ne lanin b'a la kosɛbɛ Matigi Yezu barika la ko fɛɛn si tɛ yen min nɔgɔnin bɛ. Nga n'i ye min jati ko a nɔgɔnin lo, ale nɔgɔnin lo i fɛ.

¹⁵ I bɛ dumuni min dumu, n'ale b'i balima nii tɔɔrɔ, o kɔrɔ ko i t'i ka koo kɛ kanuya la tugu. O la do, i k'i yɛrɛ kɔlɔsi, Krista sara i balima min kɔsɔn, i kana kɛ sababu ye k'ale kunnacɛn dumuni kama.

¹⁶ Fɛɛn min ka d'i ye, o kana kɛ sababu ye i tɔgɔ ka cɛn.

¹⁷ Bari ka kɛ Ala ta ye, dumuniko, walima minnifɛn koo t'o la, nga tilenninya ni hɛrɛ ani nisɔndiya koo le kɛra o koo ye, Nii Senuman barika la.

¹⁸ Bari mɔgɔ min bɛ baara kɛ Krista ye o cogo la, o tigi le koo ka di Ala ye, mɔgɔw fana b'a tɔgɔnyuman fɔ.

¹⁹ O la sa, an ka banba ka to hɛrɛ la nyɔgɔn fɛ ani ka nyɔgɔn dɛmɛ ka barika sɔrɔ Krista ka sira la.

²⁰ Aw man kan ka Ala ka baara cɛn dumuni kama. Fɛɛn bɛɛ ka nyi, nga fɛɛn min bɛ kɛ kunnacɛnfɛn ye ne balima fɛ, o dumuko ma nyi.

²¹ Fɛɛn min ka fisa, i kana josɔnsogo nyimi, i kana dɔrɔ min, fɛɛn o fɛɛn min bɛ se ka kɛ sababu ye k'i balima kunnacɛn, i kana o kɛ.

²² Jigi min b'i fɛ o koo la, i k'o to i ni Ala cɛ. Mɔgɔ min tɛ siga a ka kɛtaw la, o tigi ye dubaden ye.

²³ Nga ni mɔgɔ min bɛ sigasiga ni fɛɛn dɔ dumuko ye, n'o tigi y'o dumu, Ala b'o tigi jalaki, bari a m'o koo kɛ ni jigisɛbɛ ye. Koo min ma kɛ ni jigi lanin ye Ala kan, o bɛɛ ye kojugu ye.