Rɔmukaw 12 - LAYIDUKURA

Batoli nyanaman koo

¹ N balimaw, ne b'aw dali Ala ka makari kɔsɔn ko aw k'aw yɛrɛ kɛ saraka nyanaman ye, min saniyanin lo, n'a ka di Ala ye: o le bɛna kɛ aw ka batoli nyanaman ye.

² Aw kana aw yɛrɛ kɛnyɛ ni bii dinyɛ ye, nga aw ye hakilikura min sɔrɔ, aw jogo ka yɛlɛma ka kɛnyɛ n'o ye, janko aw ka se ka Ala sago lɔn, o min ye konyuman ye, min ka di Ala ye, n'a dafanin bɛ.

Jɛnnyɔgɔnyakura koo

³ Ala ye nɛɛma min kɛ ne ye, o kɔsɔn, ne b'a fɔ aw bɛɛ ye ko aw kana aw yɛrɛ bonya k'a dama tɛmɛ, aw k'aw yɛrɛ majigi ka kɛnyɛ ni jigi ye, Ala y'o min di aw ma ye.

⁴ Yɔrɔ caaman b'an farisogo la, u bɛɛ ka baara tɛ kelen ye fana.

⁵ O cogo la, an minw lara Krista la, an n'an ka caya bɛɛ, an jɛnna ka kɛ farisogo kelen ye.

⁶ Ala makarila an na ka seko minw d'an ma, an bɛɛ ta tɛ kelen ye. Kiraya le dira dɔ ma wa? O tigi k'o kɛ ka kɛnyɛ n'a ka lanaya ye.

⁷ Baara kɛ see le dira dɔ ma wa? O tigi ka banba k'o kɛ. Mɔgɔ kalan see le dira dɔ ma wa? O tigi ka banba ka mɔgɔw kalan.

⁸ Mɔgɔ ladi see dira min ma, o tigi k'o kɛ. Ka mɔgɔw sɔn fɛɛn na, o see dira mɔgɔ min ma, o tigi k'o kɛ, a kana sigasiga. Ka kɛ nyamɔgɔ ye, o see dira min ma, o tigi ka banba k'o kɛ. Mɔgɔ min bɛ makari, o tigi k'o kɛ ni nisɔndiya ye.

⁹ Kanuyasɛbɛ ka sɔrɔ aw dusu la. Aw ka kojugukɛ dabila, ka konyuman kɛ kosɛbɛ.

¹⁰ Kanuya min bɛ badenya la, o sababu la, aw ka nyɔgɔn minɛ, k'aw tɔnyɔgɔnw jati k'u ka fisa n'aw ye.

¹¹ Aw ye jija aw kana kɛ salabagatɔw ye, aw ka banba ka baara kɛ Matigi ye.

¹² Jigi min b'aw fɛ, aw ka nisɔndiya o kɔsɔn, tɔɔrɔ tuma, aw ka munyuli kɛ, aw ye jija ka Ala dali.

¹³ Aw ye banba ka Ala ka mɔgɔw dɛmɛ u dɛsɛyɔrɔ la, ka mɔgɔ wɛrɛw ladon.

¹⁴ Mɔgɔ minw b'aw tɔɔrɔ, aw ka duba kɛ o tigiw ye, aw ka duba kɛ dɔrɔn, aw kana dangali kɛ.

¹⁵ Mɔgɔ minw bɛ nisɔndiya la, aw ye nisɔndiya ni olu ye, minw bɛ kasi, aw ye kasi ni olu ye fana.

¹⁶ Bɛɛn ka sɔrɔ aw ni nyɔgɔn cɛ. Aw kana aw yɛrɛ bonya, k'aw yɛrɛ jati kolɔnbagaw ye, aw k'aw yɛrɛ majigi.

¹⁷ Aw kana kojugu juru sara, aw ye jija ka konyuman kɛ mɔgɔw bɛɛ ye.

¹⁸ Aw k'aw seko bɛɛ kɛ ka to hɛrɛ la ni mɔgɔ bɛɛ ye, n'o bɛ se ka kɛ.

¹⁹ Ne teriw, aw kana aw mɔnɛ bɔ, aw k'o to Ala ma, bari a fɔra Ala ka kuma na ko: “Mɔnɛbɔko ye ne ta ye, ne le bɛ juru sara.” Matigi ko ten.

²⁰ Nga “Ni kɔngɔ b'i jugu la, dumuni d'a ma, ni minnɔgɔ b'a la, jii d'a ma, n'i y'o kɛ, a bɛna maloya kosɛbɛ.”

²¹ I kana i yɛrɛ to kojugu bolo a ka se i kɔrɔ, nga i ka see sɔrɔ kojugu kan konyuman barika la.