Rɔmukaw 1 - LAYIDUKURA

Foli

¹ Ne Pɔli min ye Yezu Krista ka jɔɔn ye, a ye ne wele ka kɛ ciden ye, Ala ye ne woloma ka ne kɛ a ka kibaru diman fɔbaga ye.

² Ala yɛrɛ tun y'o kibaru diman nin koo fɔ a ka kuma kɔnɔ a ka kiraw barika la,

³ o y'a Dencɛ ka koo ye, ale min wolola Dawuda kɔmɔgɔw fɛ ka kɛnyɛ ni adamadenya ye.

⁴ Nii Senuman y'a yira ko an Matigi Yezu Krista ye Ala Dencɛ ye, o sebagaya lɔnna a kununni fɛ a sanin kɔ.

⁵ An ye nɛɛma sɔrɔ ale le barika la ka kɛ cidenw ye, waasa ka siya wɛrɛw bɛɛ dɛmɛ u k'u jigi la Krista kan ka mɛnni kɛ a fɛ, janko Ala tɔgɔ ka bonya.

⁶ Yezu Krista ye minw wele aw fana ye u dɔw ye.

⁷ Ala ye aw minw wele ka kɛ a ka jama ye, n'aw koo ka d'a ye n'aw bɛ Ɔrɔmu dugu kɔnɔ, ne bɛ bataki nin ci aw bɛɛ ma. An Faa Ala n'an Matigi Yezu Krista ka nɛɛma ni hɛrɛ kɛ aw ye.

Ɔrɔmu kretinyɛw koo ka di Pɔli ye

⁸ Ne bɛ n ka Ala fo Yezu Krista barika la, aw bɛɛ kɔsɔn, bari aw tɔgɔ sera yɔrɔ bɛɛ la ko aw lara Krista la.

⁹ Ne bɛ Ala min bato ni n dusu ye ani k'a Dencɛ koo fɔ, o min ye kibaru diman ye, ale ye ne seere ye ko ne tɛ nyinɛ aw kɔ abada.

¹⁰ Ne bɛ to ka Ala dali tuma bɛɛ ko n'a kɛra a sago ye, a ka sira di ne ma ka se ka taa aw fɛ yen sisan.

¹¹ Bari ne b'a fɛ kosɛbɛ ka se aw fɛ, ka Nii Senuman ka seko dɔ fɔ aw ye waasa aw ka se ka fanga sɔrɔ,

¹² walima, ka nyɔgɔn jaa gwɛlɛya an jigi barika la.

¹³ N badenw, ne t'a fɛ k'aw to nin koo lɔnbaliya la, sinyɛ caaman ne y'a latigɛ ko ne bɛna taa aw fɛ, waasa ka se ka baara sabatinin kɛ aw cɛma i n'a fɔ n b'a kɛ siya wɛrɛw cɛma cogo min na, nga ne tɛ sira sɔrɔla.

¹⁴ Ne ka kan ka baara kɛ mɔgɔw cɛma minw nyaa yɛlɛma, ni minw ta ma yɛlɛ, ani kolɔnbagaw ni kolɔnbaliw cɛma.

¹⁵ O cogo la, a ka di ne ye kosɛbɛ ka kibaru diman fɔ aw Ɔrɔmukaw ye fana.

Barika min bɛ kibaru diman na

¹⁶ Ne tɛ maloya ka kibaru diman fɔ, bari Ala ka sebagaya koo lo, mɔgɔ minw bɛ la a la, kisili ye olu ta ye, k'a daminɛ Zuwifu ma fɔlɔ, o kɔ siya wɛrɛw.

¹⁷ Kibaru diman le b'a yira ko Ala bɛ mɔgɔ jati mɔgɔtilennin ye a jigi kɔsɔn, a bɛ to o tilenninya la jigi barika la, i n'a fɔ a fɔra cogo min na Ala ka kuma na ko: “Mɔgɔ min y'a jigi la Ala kan, Ala ka sɔrɔ k'a jati mɔgɔtilennin ye, o tigi bɛna kisi.”

Mɔgɔ bɛɛ jalakinin bɛ Ala fɛ

¹⁸ O le kɔsɔn ka Ala to sankolo la, a bɛ dimi mɔgɔw fɛ minw tɛ siran a nya, n'u bɛ tilenbaliyako kɛ ka tinyɛ dogo.

¹⁹ Bari adamaden bɛ se ka Ala ka koo minw faamu, olu yirala u la ka gwɛ: Ala yɛrɛ le y'o yira u la.

²⁰ Tinyɛ na, k'a ta dinyɛ dantuma na, adamadenw bɛ Ala ka koo yebaliw ye ka gwɛ a ka baara fɛ, o min ye a ka sebagaya banbali n'a ka Alaya ye. O la, tinyɛ sɔrɔsira t'u fɛ tugu.

²¹ Bari u ye Ala lɔn, nga u ma sɔn k'a bato i n'a fɔ Ala, ani u ma sɔn ka barika la a ye a cogo la, u filila u ka miiriya la ani ka kɛ nalomanw ye ka tunu dibi la.

²² U b'u yɛrɛ jati kolɔnbagaw ye nga u ye nalomanw ye.

²³ U ma Nɔɔrɔtigi Ala yɛrɛ bato fɔɔ adamaden jaa ni kɔnɔw ni sennaanifɛnw ni fɛɛn minw bɛ fofo duguma, u bɛ olu le bato.

²⁴ O le y'a to Ala y'u to u ka nigɛjuguw la, fɔɔ u bɛ kakalaya kɛ k'u yɛrɛ dɔgɔya u ni nyɔgɔn cɛ.

²⁵ U ye Ala ka tinyɛ to yen, ka tugu galon kɔ, ka danfɛnw le bato ka baara kɛ u ye, u ma Danbaga bato, ale min ka kan ka bonya tuma bɛɛ. Amiina.

²⁶ O le y'a to, Ala y'u to yen nigɛjuguw la o min ye malobaliyako ye. U ka musow tɛ cɛko kɛ n'a nyaa ye tugu. Olu yɛrɛ bɛ la ni nyɔgɔn ye.

²⁷ O cogo la, cɛɛw tɛ musow nyini tugu fɔɔ u b'u cɛnyɔgɔnw kɛ i n'a fɔ musow. O le ka di u ye. O la, u b'o sara sɔrɔ u yɛrɛ ma, o min bɛnnin bɛ u ka kɛta ma.

²⁸ U ma sɔn ka Ala lɔn minkɛ, o la Ala fana y'u to u ka miiriyajugu la, o cogo la, u man kan ka koo minw kɛ, u b'o le kɛ.

²⁹ Tilenbaliyako sifa bɛɛ b'u kɔnɔ: u bɛ kojugu kɛ, u kɛra mɔgɔkolonw ani mɔgɔjuguw ye, nyagoya fana b'u la, nyɔgɔnfagako le b'u kɔnɔ, ni kɛlɛko, ni benkanni, juguya, ani u bɛ mankan ci.

³⁰ U bɛ nyɔgɔn tɔgɔjugu fɔ, Ala juguw lo, u b'u yɛrɛ bonya ka kɛlɛw tigɛ, u daa ka ca, u bɛ se kojugu la kosɛbɛ, u murutinin bɛ u wolobagaw ma.

³¹ U kɛra nalomanw ye, u tɛ lɔ kelen kan, u ka koo ka gwɛlɛ, u fana tɛ makari nyɔgɔn na.

³² U bɛ Ala ka koo latigɛnin lɔn, ko ni mɔgɔ min b'o koo nyɔgɔn kɛ o tigi ka kan ni saya ye, u tɛ dan o kɛli ma, nga u b'o kɛbagaw jaa gwɛlɛya fana.