Piy 2nan 3 - LAYIDUKURA

Matigi ka loon koo

¹ N teriw, n ka bataki ciko filanan le ye nin ye ten aw ma. O sɛbɛ fila nunu bɛɛ la, ne kɔni b'aw hakili jigi ka miiriyanyuman d'aw ma.

² Kiraw ye kuma minw fɔ ka tɛmɛ, aw k'aw hakili to o la an'an Matigi, n'an kisibaga ka ciiw la, a ka cidenw y'o minw lase aw ma.

³ Aw k'a lɔn ko dinyɛ laban na, dɔw bɛna wili ka to k'u diyanakow kɛ k'u nyaa don aw la,

⁴ k'a fɔ ko: “A m'a fɔ ko a bɛna kɔsegi ka na wa? A do bɛ min? An faaw bɛɛ sara ka ban. Halibi koow b'u cogokɔrɔ le la kabini dinyɛ dantuma.”

⁵ O cogo la, u b'a fɛ k'u hakili bɔ a la ko fɔlɔfɔlɔ Ala ye sankolo dan ani ka dugukolo dan ka bɔ jii la, ka to nyɔgɔn fɛ a ka kuma barika la.

⁶ O cogo kelen na, jii le fana ye dugukolo kan fɛɛn bɛɛ dumu.

⁷ Ayiwa, an bɛ sankolo ni dugukolo minw yera ten, u maranin bɛ o kuma kelen le barika la ni tasuma ka kan k'o mana loon dɔ. Nga u bɛ yen ka Alanyasiranbaliw kitilon n'u halakilon le kɔnɔ.

⁸ N teriw, koo kelen bɛ yen, aw kana nyinɛ o kɔ dɛ! Matigi fɛ, tile kelen bɛ i n'a fɔ saan waa kelen. Saan waa kelen bɛ i n'a fɔ tile kelen.

⁹ Matigi y'a daa di koo min na, dɔw ko a ka suma o kɛko la. K'a sɔrɔ a man suma. Nga a bɛ munyu aw le kɔrɔ, a t'a fɛ mɔgɔ si ka halaki, a b'a fɛ bɛɛ ka se ka nimisa ka faran a ka kojuguw la.

¹⁰ Matigi nalon bɛna bari mɔgɔw la i n'a fɔ soon. O loon na, sankolo bɛna tunu ni mankanba ye. Sankolofɛnw bɛɛ bɛna halaki ni tasuma ye pewu! Dinyɛ n'a kɔnɔnafɛnw bɛɛ bɛna ban.

¹¹ Ayiwa, n'o fɛɛn nunu bɛɛ ka kan ka ban ten wo, aw ka taamacogo ka kan ka kɛ di sa? Aw ye nɔrɔ Ala la kosɛbɛ aw taamacogo ka nya,

¹² ka Ala ka loon makɔnɔ ka jija a ka se joona. O loon yɛrɛ lo sankolo bɛna jɛni ka ban pewu, a kɔnɔnafɛnw bɛɛ bɛna yelen.

¹³ A y'a daa di sankolo ni dugukolo kuraman minw koo la, an bɛ olu makɔnɔna. Tilenninyako dama le bɛna kɛ o yɔrɔ la.

An labɛnnin ka Matigi kɔsegitɔ kɔnɔ

¹⁴ Ayiwa, n teriw, o kama, aw labɛnnin ka to o makɔnɔni na, aw ye jija jalakiyɔrɔ kana sɔrɔ aw la Ala fɛ, aw ni Ala ka bɛn.

¹⁵ N'aw y'a ye ko Matigi tɛ kɔsegira ka na joona, o kɛra aw ka kisili kɔsɔn le. An balimacɛ n'an tericɛ Pɔli ye sɛbɛ ci aw ma o koo la. Ala ye lɔnniya min d'a ma, a y'o kɛ k'aw ladi.

¹⁶ A ye bataki minw sɛbɛn, o le fɔra u bɛɛ kɔnɔ. O sɛbɛ nunu yɔrɔ dɔw kɔni faamu ka gwɛlɛ. Kolɔnbaliw ni barikatan dɔw bɛ tintin o yɔrɔ nunu kan k'u kɔrɔ yɛlɛma i n'a fɔ u bɛ deli ka to ka Ala ka kuma tɔw kɛ cogo min na. U b'u yɛrɛ halakiko le kɛra ten.

¹⁷ Ayiwa, n teriw, aw kɔni lasɔmina ka ban. Aw k'aw yɛrɛ kɔlɔsi Alanyasiranbaliw si kana aw kuun nyagami. Aw kana to u b'aw jigi tigɛ ka bɔ fu la.

¹⁸ Nga aw ye jija ka taa nya an Matigi n'an kisibaga Yezu Krista ka nɛɛma barika la ani k'ale Yezu lɔn kosɛbɛ. Bonya ka la ale kan sisan ani tuma bɛɛ. Amiina!