Piy 2nan 2 - LAYIDUKURA

Karamɔgɔjuguw ka sara

¹ Ayiwa, kirajuguw tun bɛ yen fɔlɔ la, mɔgɔw cɛma. O cogo kelen na, karamɔgɔjuguw bɛna bɔ aw fana cɛma ka mɔgɔw kalan ni galon dɔrɔn ye o min bɛ cɛnni kɛ fɔɔ u bɛ taa ban u ka kuntigi la, o min y'u kunmabɔbaga ye. O tuma na sa, u bɛna bari ka halaki.

² Mɔgɔ caaman bɛna sɔn u ka kakalaya ma, o bɛna kɛ sababu ye mɔgɔw bɛna tinyɛ sira tɔgɔ cɛn.

³ U ka warinyini kojugu kɔsɔn, u bɛna galon labɛn k'aw nyagami n'o ye tɔnɔ kama. U kitibaga labɛnnin lo a mɛnna. U halakiwaati tɔɔ man jan.

⁴ Mɛlɛkɛ minw ye kojugu kɛ, Ala ma olu yɛrɛ to, nga a y'u siri ni jɔrɔkɔw ye k'u bila dingɛba kɔnɔ dibi la ka kitilon kɔnɔ.

⁵ Ala ma hinɛ fɔlɔfɔlɔ mɔgɔw la fana. A ye jiba bila ka na Alanyasiranbaliw bɛɛ halaki k'a tɔɔ to Nuhun ye, ale min tun bɛ tilenninya koo fɔ, ani mɔgɔ wolonwula.

⁶ A ye kiti ben Sodɔmu ni Gɔmɔri dugu kan k'u jɛni k'u kɛ bugurigwɛ ye, k'a yira ko Alanyasiranbaliw bɛna na kɛ ten le.

⁷ Lɔti min kɛra mɔgɔnyuman ye, a tɔɔrɔnin tun bɛ a siginyɔgɔnw ka kɛwalijuguw kɔsɔn. Ala y'ale kelenpe kunmabɔ.

⁸ A tun tɔɔrɔla u cɛma, bari mɔgɔ tilennin tun lo, a tun bɛ mɔgɔw yera u ka kɛwalijuguw la, ani ka to k'u ka kuma mɛn loon o loon.

⁹ O cogo la, Matigi bɛ se ka mɔgɔtilenninw kisi tɔɔrɔ ma ka mɔgɔjuguw mara kitilon kama.

¹⁰ Minw bɛ boliboli u ka nigɛlakow kɔ, n'u tɛ Masaba bonya, u jaa ka gwɛlɛ, u daa ka bon. Ka arijana kɔnɔ fɛɛnw nɛni, o tɛ foyi ye olu fɛ.

¹¹ K'a sɔrɔ, mɛlɛkɛw lɔyɔrɔ n'u ka sebagaya ka bon n'u ta ye, olu yɛrɛ tɛ sɔn ka lɔ Matigi nyana ka arijana fɛɛn nunu si dɔgɔya.

¹² O mɔgɔ nunu ka kɛwaliw ni begɛnw ta kɛra kelen ye. U ka laban ni begɛnw ta bɛna kɛ kelen ye. U bɛna halaki. U tɛ fɛɛn min lɔn, u bɛ kumajugu fɔ o le koo la.

¹³ Tɔɔrɔ le bɛna kɛ u sara ye. Bari olu kɛra dɔw tɔɔrɔko sababu ye. Ka kakalaya kɛ tilefɛ, o le ka di u ye. N'aw bɛ dumuniba kɛ n'u ye tuma min na, u b'u ka maloyakow kɛ, ka nisɔndiya.

¹⁴ Kakalaya nigɛ tɛ bɔ u la, u bɛ kojugu kɛ tuma bɛɛ. Fanga tɛ minw na, u bɛ olu kunna cɛn. Wariko le ka di u ye kojugu. U danganin lo.

¹⁵ U ye siranyuman bila ka Bozɔri deen Balamu ka koo nyɔgɔn kɛ. A tun diyara ale min ye ka tilenbaliyako kɛ waasa ka wari sɔrɔ,

¹⁶ a do y'o sara sɔrɔ. Fali kumana a fɛ waasa a k'a ka nalonmanya dabila.

¹⁷ O mɔgɔ nunu bɛ i n'a fɔ kɔlɔnw, jii tɛ minw kɔnɔ, ani sankabaw, fɔnyɔ bɛ taa ni minw ye. Olu kɔni niyɔrɔ ye dibijugu ye.

¹⁸ U b'u daa di kobabaw la k'a sɔrɔ foyi! Minw sera ka bɔsi fɔlɔ taamacogojugu nunu ma sisan sisan, u bɛ olu nigɛ k'u ben n'u fari ka labilali ye, ni nyamɔgɔya ye.

¹⁹ U b'a fɔ olu ye k'u bɛna hɔrɔnya sɔrɔ. K'a sɔrɔ olu kɛra u yɛrɛ ka nigɛlakow ka jɔɔnw ye. Bari fɛɛn min fanga ka bon n'i ta ye, i y'o ka jɔɔn le ye.

²⁰ Ayiwa, ni minw y'u yɛrɛ sɔrɔ ka bɔ dinyɛ nin ka kojugu la an Matigi n'an kisibaga Yezu Krista lɔnko barika la, n'o tigi segira ka don o la, ka kɛ o ka jɔɔn ye, a ka koo tɔɔ bɛ juguya ni fɔlɔta ye.

²¹ N'u tun ma tilenninya sira lɔn, o bele tun ka fisa u ma n'u banko ye Ala ka sariya nin na, o min koo tun fɔra u ye.

²² U ta kɛra i n'a fɔ talen nunu b'a fɔ cogo min na ko: “Wulu le bɛ yɛlɛma k'a fɔɔnɔni dumu.” Ani ko: “Lɛɛ kotɔ, a nɔgɔtɔ.”