Piy 2nan 1 - LAYIDUKURA

Foli

¹ Ne Simɔn Piyɛri min ye Yezu Krista ka ciden, n'a ka baaraden ye, ne bɛ bataki nin ci aw ma, aw minw ye an ka jigi nyanaman nyɔgɔn sɔrɔ anw ka Ala n'an kisibaga Yezu Krista ka tilenninya kɔsɔn.

² An ka Ala n'an Matigi Yezu lɔnko kama, u ka nɛɛma ni hɛrɛ kɛ aw ye kosɛbɛ.

Kretinyɛ taamacogo

³ Tinyɛ na, an mako bɛ fɛɛn min na, an ka se ka taama Alanyasiran na, Matigi y'o bɛɛ d'an ma a ka setigiya barika la, ale min y'an wele k'a ka nɔɔrɔ ni sebagaya d'an ma, waasa an ka se k'ale lɔn kosɛbɛ.

⁴ Olu kama, Ala tun y'a daa di koo minw na, n'u nafa ka bon kosɛbɛ, an sera k'o sɔrɔ. O barika la, an bɛ jɛn ni Ala ye ka kɛ kelen ye, ani ka kisi dinyɛ n'a kɔnɔ nigɛjugu bɛɛ ma.

⁵ O kama, aw ye jija, jigi min b'aw fɛ, aw ka nyumanya fara o kan, ka lɔnniya fara nyumanya kan,

⁶ ka yɛrɛminɛ fara lɔnniya kan, ka munyu fara yɛrɛminɛ kan, ka Alanyasiran fara munyu kan,

⁷ ka nyɔgɔnkanuya fara Alanyasiran kan, kanuya ka jiidi aw cɛma.

⁸ Bari, ni koo nunu b'aw dusu la kosɛbɛ, aw tɛna kɛ mɔgɔ farifaganinw ye, ani nafatanw ye an Matigi Yezu Krista lɔnko faan fɛ.

⁹ Nga ni koo nunu tɛ mɔgɔ min na, o tigi kɛra i n'a fɔ finyɛntɔ, ka to ka kurutukurutu dibi la. Bari a nyinɛna ko Ala y'a ka fɔlɔfɔlɔ kojuguw yafa.

¹⁰ N badenw, o la sa, aw k'aw timinadiya, Ala y'aw woloma k'aw wele min kama, o ka sabati aw bolo. N'aw tora k'a kɛ ten, aw tɛna ben kojugu la abada.

¹¹ O cogo la, aw bɛna se ka kunbɛn konyuman sɔrɔ an Matigi n'an Kisibaga Yezu Krista ka mara la o min tɛ cɛn ka ye.

Kiraw ka kuma bɔyɔrɔ

¹² N bɛna to k'aw hakili jigi o koow la tuma bɛɛ, hali n'aw b'o koo nunu lɔn ka ban, n'aw nɔrɔnin b'o tinyɛ kuma nin na fana kosɛbɛ.

¹³ Ne y'a ye ko a bɛnnin lo, ka ne to nii na, ne ka kan ka to k'aw hakili jigi tuma bɛɛ.

¹⁴ Bari n y'a lɔn a tora dɔɔni ne bɛ dinyɛ to, an Matigi Yezu Krista le y'o yira ne la ten.

¹⁵ Nga sanni o ka se, n bɛna banba ka kuma aw fɛ waasa n taanin kɔ, n y'aw kalan minw na, o ka to aw hakili la.

¹⁶ An ye Yezu Krista, an Matigi ka setigiya n'a ka nako min koo fɔ aw ye, o ma kɛ siirin koo ye dɛ! Nga anw yɛrɛ nyaa lara a ka nɔɔrɔ kan.

¹⁷ Tuma min na Faa Ala ye kunkɔrɔta ni nɔɔrɔ d'a ma, a tora a ka masaya la, k'a fɔ a ye ko: “Nin ye ne Dencɛ ye, a koo ka di ne ye haali!”

¹⁸ K'an to kulu senuman nin kan n'a ye, an ye kumakan nin mɛn ka bɔ sankolo la.

¹⁹ An bolo lanin bɛ kiraw ka kuma fɔninw kan fana. O kuma nin kɛra i n'a fɔ lanpanmananin, min bɛ yeelen bɔ sufɛ fɔɔ ka taa se dugugwɛ ma, dugugwɛdafɛ lolo ka yeelen bɔ aw ye.

²⁰ Ayiwa, aw k'a lɔn kosɛbɛ ko ka adamaden to a yɛrɛ ma, a tɛ se ka Ala ka kuma kɔrɔ lɔn.

²¹ A ma kɛ i n'a fɔ kirayakuma bɔra mɔgɔw fɛ, nga Nii Senuman yɛrɛ le y'a don u daa la u tora ka kuma Ala tɔgɔ la.