Matiyu 9 - LAYIDUKURA

Yezu bɛ muruku dɔ kɛnɛya

¹ Yezu donna kurun kɔnɔ ka segi ka baa tigɛ ka ta'a ka dugu la.

² O yɔrɔ la, mɔgɔ dɔw taara Yezu fɛ ni muruku dɔ ye dilan kan. Yezu y'a ye k'o mɔgɔw lara ale la minkɛ, a y'a fɔ muruku nin ye ko: “N teri, kana i jigi tigɛ. Ne y'i ka kojuguw yafa.”

³ O tuma na, sariya karamɔgɔ dɔw y'a daminɛ k'a fɔ u kɔnɔ ko: “Cɛɛ nin bɛ Ala tɔgɔ cɛn.”

⁴ Yezu y'u kɔnɔna ta lɔn minkɛ, a ko: “Mun na miiriyajugu b'aw kɔnɔ ten?

⁵ K'a fɔ muruku ye ko: ‘I ka kojuguw yafara i ma’, walima k'a fɔ a ye ko: ‘Wili ka taama’, o kuma fila la, jumɛn fɔko ka nɔgɔ?

⁶ Ayiwa, n b'a fɛ aw k'a lɔn ko see bɛ Mɔgɔ Dencɛ ye dinyɛ na ka mɔgɔw ka kojuguw yafa.” O la, a y'a fɔ muruku ye ko: “Wili k'i ka dilan ta ka taa soo.”

⁷ Cɛɛ wilila ka taa soo.

⁸ Jama y'o ye tuma min na, u siranna kosɛbɛ. U ye Ala tando bari ale le ye see di adamaden ma ka koo nin nyɔgɔn kɛ.

Yezu bɛ Matiyo wele

⁹ Yezu bɔra o yɔrɔ la n'a bɛ taara nyafɛ. A ye cɛɛ dɔ siginin ye wusuruminɛlaw ka baarakɛyɔrɔ la, a tɔgɔ ko Matiyo. Yezu y'a fɔ a ye ko: “Tugu ne kɔ.” Matiyo wilila ka tugu a kɔ.

¹⁰ O kɔ, Yezu taara Matiyo ka soo. K'u to dumuni na, wusuruminɛlaw ni kojugukɛla wɛrɛw nana sigi n'u bɛ dumuni kɛra ni Yezu n'a ka kalandenw ye. U tun ka ca.

¹¹ Farizinyɛw y'o ye tuma min na, u y'a fɔ a ka kalandenw ye ko: “Mun na aw ka karamɔgɔ bɛ dumuni kɛ ni wusuruminɛlaw ani kojugukɛla wɛrɛw ye?”

¹² Yezu y'u ka kuma mɛn minkɛ, a y'a fɔ ko: “Mɔgɔ minw ka kɛnɛ, olu mako tɛ furakɛla la, banabagatɔw le mako b'a la.

¹³ Aw ye taa miiri Ala ka kuma nin kɔrɔ la. A tun y'a fɔ ko: ‘Ne b'a fɛ ko mɔgɔw ka makari nyɔgɔn na le, nga n tɛ u ka sɔnnifɛnw fɛ,’ bari ne ma na mɔgɔnyumanw wele, nga ne nana kojugukɛlaw wele.”

Yezu bɛ ladili di suun koo la

¹⁴ O kɔ, Zan batizelikɛla ka kalandenw gwɛrɛla Yezu la k'a nyininga ko: “Mun na anw ni Farizinyɛw bɛ to ka suun don, k'a sɔrɔ e ka kalandenw tɛ suun don?”

¹⁵ A y'u jaabi ko: “Aw b'a lɔn ko kɔnyɔcɛ teriw nyaa tɛ se ka sisi k'u ni kɔnyɔcɛ to nyɔgɔn fɛ. Nga, loon dɔ bɛna se, kɔnyɔcɛ bɛna bɔsi u la. U bɛna suun don o tuma na.

¹⁶ N'i y'i ka fani kɔrɔman bari ni fanikura kunkurun ye, kunkurunkura nin bɛna fani kɔrɔman sama k'a faran. A faranyɔrɔ bɛna bonya ni fɔlɔta nin ye.

¹⁷ O cogo kelen na, mɔgɔ si tɛ duvɛnkɛnɛ kɛ foroko kɔrɔman na. Ni mɔgɔ min y'o fana kɛ, a ka foroko bɛna faran duvɛn kɔgɔtuma na. A bɛna bɔnɔ a ka foroko, ni duvɛn na. Mɔgɔw bɛ duvɛnkɛnɛ kɛ forokokura le kɔnɔ. N'u y'a kɛ ten, a tɛ bɔnɔ a si la.”

Yezu bɛ sungurunin dɔ suu kunun

¹⁸ Ka Yezu to o kuma nunu na, Zuwifuw ka kuntigi dɔ nana a kunbiri gwan a kɔrɔ k'a fɔ a ye ko: “N denmuso banna sisan sisan. Nga, sabali ka na i bolo la a kan, a bɛna kunun.”

¹⁹ Yezu n'a ka kalandenw wilila ka tugu a kɔ.

²⁰ O y'a sɔrɔ, muso dɔ tun bɛ yen, a ka koli tun b'a tɔɔrɔla kabini saan tan ni fila. Joli tun tɛ lɔ ka ye. A gwɛrɛla Yezu la a kɔfɛ ka maga a ka fani dakun na,

²¹ bari a tun y'a fɔ a yɛrɛ kɔnɔ ko: “Ni n sera ka maga a ka fani dɔrɔn na, n bɛna kɛnɛya.”

²² Yezu y'a nyaa yɛlɛma kɔfɛ ka muso nin ye. A y'a fɔ a ye ko: “N dɔgɔmuso, i jigi kana tigɛ. I kɛnɛyara ka ban bari i lara ne la.” O yɔrɔnin bɛ, muso nin kɛnɛyara.

²³ Yezu taara se Zuwifuw ka kuntigi nin ka soo tuma min na, a ye jamaba ye. Dɔw tun bɛ fɔli kɛra, dɔw tun bɛ kasira.

²⁴ A y'a fɔ u ye ko: “Aw ye bɔ yan, bari sungurunin nin ma sa, nga a bɛ sinɔgɔra le.” U yɛlɛla Yezu ma.

²⁵ U ye jama bɔ kɛnɛma tuma min na, Yezu donna ka suu bolo minɛ, a kununna.

²⁶ Mɔgɔw y'o koo lakali o yɔrɔ mara bɛɛ la.

Yezu bɛ finyɛntɔ fila dɔ nyaa yɛlɛ

²⁷ Yezu bɔra o yɔrɔ la n'a bɛ taara, finyɛntɔ fila wilila ka tugu a nɔɔ fɛ, n'u b'a fɔ ko: “Dawuda dencɛ, makari an na.”

²⁸ Yezu sera soo tuma min na, finyɛntɔ nunu gwɛrɛla a la. A y'u nyininga ko: “Aw lanin b'a la ko ne bɛ se k'aw nyaa yɛlɛ wa?” U y'a jaabi ko: “Ɔnhɔn Matigi, an lanin b'a la.”

²⁹ O kɔ, Yezu magara u nyaa na k'a fɔ ko: “Aw jigi b'a la ko ne bɛ se ka fɛɛn min kɛ aw ye, o ka kɛ aw ye.”

³⁰ U nyaa yɛlɛla. Yezu y'a gwɛlɛya u ma k'u kan'a fɔ mɔgɔ si ye ko ale le y'u nyaa yɛlɛ.

³¹ Nga, u taara dɔrɔn, u y'a daminɛ ka Yezu koo fɔ mɔgɔw ye u ka mara bɛɛ la.

Yezu bɛ bobo dɔ kɛnɛya

³² U bɔra n'u bɛ taa, mɔgɔ dɔw nana ni bobo jinatɔ dɔ ye Yezu fɛ.

³³ Yezu ye jina gwɛn ka bɔ a la dɔrɔn, cɛɛ y'a daminɛ ka kuma. Jama bɛɛ kabakoyara, u tora k'a fɔ k'u ma deli ka nin nyɔgɔn ye Isirayɛli jamana na fɔlɔ.

³⁴ Nga Farizinyɛw y'a fɔ ko: “Jinaw ka kuntigi le bɛ see d'a ma ka jinaw gwɛn ka bɔ mɔgɔw la.”

Jama hinɛ bɛ Yezu la

³⁵ Yezu tun bɛ taa dugubaw ni dugudenninw na ka mɔgɔw kalan u ka Alabatosow kɔnɔ. A tun bɛ Sankolo tigi ka masaya koo fɔ a ka waajuli la, ani ka banabagatɔ sifa bɛɛ kɛnɛya.

³⁶ N'a ye jama ye, u hinɛ bɛ don a la, bari u sɛgɛnnin tun lo, u dusu kasinin tun lo fana. U tun kɛra i n'a fɔ sagaw, kɔlɔsibaga tɛ minw na.

³⁷ O le y'a to a y'a fɔ a ka kalandenw ye ko: “Suman tigɛta ka ca, nga baarakɛlaw man ca.

³⁸ Ala min ye sumantigi ye, aw k'o dali ko a ka baarakɛlaw ci ka ta'a ka suman tigɛ.”