Matiyu 25 - LAYIDUKURA

Yezu bɛ talen la sunguru tan koo la

¹ “Ala ka masaya yɔrɔ donko bɛna kɛ i n'a fɔ sunguru tan dɔw ka koo. U tun y'u ka fitinɛw ta k'u bɛ taa kɔnyɔcɛ kunbɛn.

² Mɔgɔ duuru tun ye nalomanw ye, duuru tun ye hakilitigiw ye.

³ Minw tun ye nalomanw ye, olu y'u ka fitinɛw ta, u ma tulu dɔ ta minan wɛrɛw la.

⁴ Nga hakilitigiw y'u ka fitinɛw ta, ka tila ka tulu dɔ ta minan wɛrɛw la.

⁵ Kɔnyɔcɛ mɛnna a tun tɛ nana minkɛ, sinɔgɔ ye sunguru tan nunu minɛ, u bɛɛ sinɔgɔra.

⁶ Dugutilama, pɛrɛnkan dɔ bɔra ko: ‘Kɔnyɔcɛ filɛ, a bɛ nana, aw ye bɔ ka ta'a kunbɛn.’

⁷ O tuma na, sunguru tan nunu wilila k'u ka fitinɛw labɛn.

⁸ Naloman nunu y'a fɔ hakilitigiw ye ko: ‘Aw y'an sɔn ni tulu dɔɔni dɔɔni ye, bari an ka fitinɛw b'a fɛ ka faga.’

⁹ Hakilitigi nunu y'a fɔ u ye ko: ‘Ayi, bari an ka tulu tɛna se k'an bɛɛ labɔ. Min ka fisa, aw ye taa tulufeerebagaw fɛ, ka dɔ san aw yɛrɛ ye.’

¹⁰ Naloman nunu taara tulu sanyɔrɔ la tuma min na, kɔnyɔcɛ sera. Hakilitigiw donna ni kɔnyɔcɛ ye kɔnyɔbon na. U ye daa tugu.

¹¹ O kɔ, naloman nunu kɔsegira ka na tuma min na, u ye daa kɔkɔ k'a fɔ ko: ‘Matigi, Matigi, daa yɛlɛ an ye.’

¹² Nga kɔnyɔcɛ y'u jaabi ko: ‘Tinyɛ na, ne b'a fɔ aw ye, ne tɛ aw lɔn.’

¹³ O la, aw labɛnnin ka kan ka to tuma bɛɛ la, bari aw t'o loon n'a waati lɔn.

Yezu bɛ talen la baaraden saba koo la

¹⁴ “A bɛna kɛ i n'a fɔ cɛɛ dɔ, min tun bɛ taara taama na. A y'a ka baaradenw wele k'a ka nafolo kalifa u ma.

¹⁵ A ye talan duuru di kelen ma, ka fila di kelen wɛrɛ ma, ani ka kelen di tɔ kelen nin ma, ka kɛnyɛ n'u kelen kelen bɛɛ seko ye. O kɔ, a taar'a ka taama na.

¹⁶ Baaraden min tun ye talan duuru sɔrɔ, ale taara ka jago kɛ ka duuru wɛrɛ sɔrɔ tɔnɔ ye.

¹⁷ Min tun ye fila sɔrɔ, ale fana taara ka jago kɛ ka fila wɛrɛ sɔrɔ tɔnɔ ye.

¹⁸ Nga baaraden min tun ye talan kelen sɔrɔ, ale taara dingɛ sogi k'a kuntigi ka wari nin dogo yen.

¹⁹ Baaraden nunu ka kuntigi mɛnna kosɛbɛ, o kɔ, a nana k'u wele waasa u ka na n'a ka nafolo ye a k'a jati.

²⁰ Baaraden min tun ye talan duuru sɔrɔ, ale gwɛrɛla ni talan duuru wɛrɛ ye, k'a fɔ ko: ‘Matigi, e tun ma talan duuru le di ne ma wa? A filɛ, ne ye duuru wɛrɛ sɔrɔ tɔnɔ ye.’

²¹ A ka kuntigi y'a fɔ a ye ko: ‘O nyana, mɔgɔnyuman ani mɔgɔsɛbɛ. I kɛra mɔgɔsɛbɛ ye kofitini nin na, o la, ne bɛna koo caaman kalifa i ma. Na, an ka nisɔndiya nyɔgɔn fɛ.’

²² Min tun ye fila sɔrɔ, ale fana gwɛrɛla k'a fɔ ko: ‘Matigi, e tun ma talan fila le kalifa ne ma wa? A filɛ, ne ye fila wɛrɛ sɔrɔ tɔnɔ ye.’

²³ A ka kuntigi y'a fɔ a ye ko: ‘A nyana, mɔgɔnyuman ani mɔgɔsɛbɛ. I kɛra mɔgɔsɛbɛ ye kofitini nin na, o la, ne bɛna koo caaman kalifa i ma. Na, an ka nisɔndiya nyɔgɔn fɛ.’

²⁴ Ayiwa, baaraden min tun ye talan kelen sɔrɔ, ale fana gwɛrɛla k'a fɔ ko: ‘Matigi, ne tun y'a lɔn ko e ka koo ka gwɛlɛ, e ma danni kɛ foro min na, e b'a fɛ o suman ka kɛ i ta ye, e ma serili kɛ yɔrɔ min na, e b'a fɛ o fana ka kɛ i ta ye.

²⁵ Ne siranna, n taara i ka wari dogo dingɛ kɔnɔ, i ka wari filɛ, a minɛ.’

²⁶ A ka kuntigi y'a jaabi ko: ‘Mɔgɔjugu, salabagatɔ, e tun y'a lɔn ko ne ma danni kɛ foro min na, ko ne b'a fɛ o suman ka kɛ n ta ye, k'a lɔn ko ne ma serili kɛ yɔrɔ min na, ko ne b'a fɛ o suman ka kɛ n ta ye,

²⁷ o la, e tun ka kan ka ne ka wari di jagokɛlaw ma. Ni ne tun segira tuma min na, n tun bɛna n ka nafolo n'a tɔnɔ sɔrɔ.

²⁸ Aw ye talan nin bɔsi a la k'a di talan tan tigi ma,

²⁹ bari fɛɛn bɛ mɔgɔ min fɛ, dɔ bɛna d'o tigi ma ka fara a ta kan k'a caya, nga foyi tɛ min fɛ, hali dɔɔni min b'a tigi fɛ, o bɛna bɔsi a la.

³⁰ Baaradenjugu nin kɔni, aw y'ale minɛ k'a fili kɛnɛma dibi la. O yɔrɔ la, a bɛna kasi kosɛbɛ k'a fɔ ko n'a tun y'a lɔn.’

Dinyɛ bɛ laban ni kiti min ye

³¹ “Tuma min na Mɔgɔ Dencɛ bɛna na ni mɛlɛkɛw ye, a bɛna sigi a ka masasigilan kan.

³² Mɔgɔ bɛɛ bɛna lajɛn a nyafɛ, a bɛna mɔgɔw faran k'u bɔ nyɔgɔn na i n'a fɔ sagadɛndɛbaga bɛ sagaw faran ka bɔ baaw la cogo min na.

³³ A bɛna mɔgɔtilenninw bila a kinibolo la, ka mɔgɔjuguw bila a numanbolo la.

³⁴ O kɔ, a bɛn'a fɔ a kinibolo la taw ye ko: ‘Aw ye na ne Faa ka dubadenw, ka don a ka masaya yɔrɔ la, o min tun labɛnna aw ye kabini dinyɛ dantuma.

³⁵ Bari kɔngɔ tun bɛ ne la, aw ye dumuni di ne ma, minnɔgɔ tun bɛ ne la, aw ye jii di ne ma. Ne tun kɛra lonan ye, aw ye jigiyɔrɔ di ne ma.

³⁶ Fani tun tɛ ne fɛ, aw ye fani di ne ma. Ne tun bananin lo, aw y'aw janto ne la. Ne tun bɛ kaso la, aw nana ne filɛ yen.’

³⁷ Mɔgɔtilenninw bɛn'a fɔ ko: ‘Matigi, an y'i ye tuma jumɛn ni kɔngɔ b'i la, n'an ye dumuni d'i ma? An y'i ye tuma jumɛn ni minnɔgɔ b'i la n'an ye jii d'i ma?

³⁸ An y'i lonanman ye tuma jumɛn ka jigiyɔrɔ d'i ma, ani k'i fari lakolon ye n'an ye fani d'i ma?

³⁹ Tuma jumɛn an y'i ye n'i bananin bɛ, walima n'i bɛ kaso la n'an taara bɔ i ye k'i dɛmɛ?’

⁴⁰ A bɛna u jaabi ko: ‘Tinyɛ na, ne b'a fɔ aw ye, ko aw y'o koo minw kɛ ne balima o balima ye, aw y'o kɛ ne le ye.’

⁴¹ O kɔ, a bɛn'a fɔ a numanbolo la mɔgɔw ye ko: ‘Aw ye taa ka bɔ ne kɔrɔ, Ala juguw. Aw ye taa jahanama na, o min labɛnna Sutana n'a kɔmɔgɔw ye,

⁴² bari kɔngɔ tun bɛ ne la, aw ma dumuni di ne ma. Minnɔgɔ tun bɛ ne la, aw ma jii di ne ma.

⁴³ Ne tun kɛra lonan ye, aw ma jigiyɔrɔ di ne ma. Ne fari lakolon tun lo, aw ma fani di ne ma. Ne bananin tun lo ani ne tun bɛ kaso la, aw ma na bɔ ne ye ka ne mako nya.’

⁴⁴ Olu fana bɛn'a jaabi ko: ‘Matigi, an tun y'i ye tuma jumɛn ni kɔngɔ b'i la, walima minnɔgɔ, walima n'i kɛra lonan ye, walima ni fani t'i fɛ, walima n'i bananin lo, walima kaso la, n'an m'i mako nya?’

⁴⁵ A bɛna u jaabi ko: ‘Tinyɛ na, ne b'a fɔ aw ye, ko aw banna k'o koo nunu kɛ ne dɔgɔnin dɔw ye minkɛ, aw banna k'o kɛ ne yɛrɛ le la.’ ”

⁴⁶ Yezu y'o kuma laban ko: “O mɔgɔjugu nunu bɛna taa tɔɔrɔ banbali yɔrɔ la, mɔgɔtilenninw bɛna don Ala ka hɛrɛ banbali yɔrɔ la.”