Matiyu 24 - LAYIDUKURA

Yezu bɛ Alabatosoba cɛnko fɔ

¹ Yezu tun bɔra Alabatosoba kɔnɔ, n'a bɛ taara, a ka kalandenw gwɛrɛla a la ka kuma a fɛ Alabatosoba lɔcogo koo la.

² Yezu y'a fɔ u ye ko: “Aw nyaa bɛ soo nin lɔcogo la kɛ? Tinyɛ na, ne b'a fɔ aw ye ko loon dɔ, kabakuru nunu si tɛna to nyɔgɔn kan, u bɛɛ bɛna walaka.”

Dinyɛ laban taamasinyɛw koo

³ Yezu taara sigi Olivuyirikulu kan. A ka kalandenw gwɛrɛla a la u danna k'a fɔ a ye ko: “O koow bɛna kɛ waati min na, i ka o fɔ an ye, e k'i nako taamasinyɛ, ni dinyɛ laban taamasinyɛ fɔ an ye.”

⁴ Yezu y'u jaabi ko: “Aw k'aw yɛrɛ kɔlɔsi janko mɔgɔ si kana aw lafili.

⁵ Bari, mɔgɔ caaman bɛna na ne tɔgɔ la u yɛrɛ kan k'a fɔ k'olu ye Ala ka Mɔgɔwolomanin nin ye. O cogo la, u bɛna mɔgɔ caaman lafili.

⁶ Aw bɛna yɔrɔjan kɛlɛw kibaru mɛn, ani ka yɔrɔsurun kɛlɛw mankan mɛn. O kana aw hakili nyagami. Wajibi lo o koow ka kɛ, nga o tɛ dinyɛ laban ye.

⁷ Siya dɔ bɛna wili siya wɛrɛ kama. Jamana dɔ bɛna wili jamana wɛrɛ kama. Kɔngɔ bɛna don yɔrɔ dɔw la, dugukolo bɛna yɛrɛyɛrɛ yɔrɔ dɔw la fana.

⁸ O koow bɛɛ bɛna kɛ tɔɔrɔw daminɛ ye, i n'a fɔ muso ka tiin daminɛ.

⁹ Mɔgɔw bɛna aw don mɔgɔjuguw bolo waasa k'aw tɔɔrɔ, u bɛna aw faga, Alalɔnbaliw bɛna aw kɔniya ne kɔsɔn.

¹⁰ O waati la, mɔgɔ caaman bɛna Alasira bila, u bɛna nyɔgɔn janfa ka nyɔgɔn kɔniya.

¹¹ Mɔgɔ caaman bɛna wili ka galon tigɛ k'olu ye kiraw ye, u bɛna mɔgɔ caaman lafili.

¹² Kojugu bɛna fanga sɔrɔ fɔɔ mɔgɔ caaman tɛna Ala, n'u tɔnyɔgɔnw kanu tugu.

¹³ Nga ni mɔgɔ min munyuna fɔɔ ka se a laban ma, o tigi bɛna kisi.

¹⁴ Ala ka kibaru diman bɛna fɔ dinyɛ yɔrɔ bɛɛ la, waasa dinyɛ mɔgɔw bɛɛ k'a koo mɛn. O kɔ, dinyɛ laban bɛ sɔrɔ ka se.

Tɔɔrɔba min bɛna kɛ

¹⁵ “Kira Daniyɛli tun ye mɔgɔjugu cɛnnikɛla min koo fɔ, n'aw y'o ye Alabatosoba yɔrɔ senuman na tuma min na, (mɔgɔ min bɛ nin kalan, o tigi ka hakili sɔrɔ k'o faamu kosɛbɛ),

¹⁶ o tuma na, mɔgɔ minw bɛ Zude mara la, olu ka boli ka taa kulu yɔrɔw la.

¹⁷ N'o kɛra ka mɔgɔ min sɔrɔ a ka boon sanfɛ, o tigi kan'a fɔ ko a bɛna jigi ka minan dɔ ta soo kɔnɔ, ka taa n'o ye.

¹⁸ N'o y'a sɔrɔ ni min bɛ foro la, o tigi kan'a fɔ ko a bɛna kɔsegi ka na a ka foroca ta soo.

¹⁹ O waati la, muso kɔnɔmanw, ni dennyɛnintigiw bɛna tɔɔrɔ kosɛbɛ.

²⁰ Aw ka Ala dali waasa o boli nin kana kɛ waatigwɛlɛn tuma na, walima lafinyɛlon na.

²¹ O bɛna kɛ tɔɔrɔba ye, min nyɔgɔn ma kɛ ka ye kabini dinyɛ dantuma, fɔɔ ka na se bii ma, ani o tɔɔrɔ nyɔgɔn fana tɛna kɛ tugu abada.

²² Ni Ala tun m'a latigɛ ko a bɛna dɔ bɔ o tɔɔrɔ waati la, mɔgɔ si tun tɛna kisi, nga a ye minw woloma k'u kɛ a yɛrɛ taw ye, olu kɔsɔn, dɔ bɛna bɔ a la.

²³ Ni mɔgɔ dɔ y'a fɔ aw ye o tuma na ko Ala ka Mɔgɔwolomanin nin bɛ yan, walima ko a bɛ yen fɛ, aw kana la o la,

²⁴ bari mɔgɔ dɔw bɛna galon tigɛ, k'olu ye Ala ka Mɔgɔwolomanin nin ye. Dɔw fana bɛn'a fɔ k'olu ye kira ye. U bɛna kabakobaw kɛ ka mɔgɔw lafili n'o ye. Ala ye mɔgɔ minw woloma k'u kɛ a yɛrɛ taw ye, n'u tun bɛ se, u tun bɛna olu fana lafili.

²⁵ Aw y'o mɛn dɛ, ne y'aw lasɔmi ka ban.

²⁶ “N'u y'a fɔ aw ye ko Ala ka Mɔgɔwolomanin nin bɛ kongo kɔnɔ, aw kana taa yen. N'u y'a fɔ aw ye ko a bɛ yɔrɔ dogonin dɔ la, aw kana la o la.

²⁷ Saan bɛ manamana kɔrɔn fɛ ka ye tileben fɛ cogo min na, Mɔgɔ Dencɛ bɛna kɛ ten fana a nalon na.

²⁸ Fɛnsu bɛ yɔrɔ min na, o yɔrɔ la dugaw bɛ nyɔgɔn lajɛn.

Mɔgɔ Dencɛ kɔsegiko

²⁹ “N'o waati tɔɔrɔ tɛmɛna dɔrɔn, tile bɛna fin, kalo tɛna yeelen bɔ tugu, lolow bɛna ben ka bɔ sankolo la, ani sankolo kɔnɔfɛnw bɛɛ bɛna nyagami nyɔgɔn na.

³⁰ O tuma na, Mɔgɔ Dencɛ taamasinyɛ bɛna bɔ sankolo la ka ye dugukolo kan. Mɔgɔw bɛɛ bɛna kasi kosɛbɛ, u bɛna Mɔgɔ Dencɛ natɔ ye sankaba kan ni sebagaya, ni nɔɔrɔ ye.

³¹ A bɛn'a ka mɛlɛkɛw ci ni buru fiyɛta belebele ye. A ye mɔgɔ minw woloma k'u kɛ a taw ye, u bɛna taa dinyɛ faan naani bɛɛ la k'olu lajɛn.

Yezu ye kalan min di ka kɛnyɛ ni torosun ye

³² “Aw ka koo nunu faamu ka kɛnyɛ ni torosun cogo ye. N'a nugura tuma min na ka furaburu bɔ, aw b'a lɔn ko saminya sera.

³³ O cogo kelen na, aw mana o koow bɛɛ kɛtɔ ye tuma min na, aw k'a lɔn ko Mɔgɔ Dencɛ natuma sera ka ban, a bɛ sira la.

³⁴ Tinyɛ na, ne b'a fɔ aw ye ko bii mɔgɔ nunu bɛɛ tɛna sa, ni koo nunu bɛɛ ma kɛ.

³⁵ Sankolo ni dugukolo bɛna wili ka bɔ u nɔɔ na, nga ne ka kuma tɛna bɔ a nɔɔ na abada.

Mɔgɔ si tɛ Mɔgɔ Dencɛ nawaati lɔn

³⁶ “Mɔgɔ si tɛ ne nalon, n'a waati lɔn, hali mɛlɛkɛw t'a loon lɔn, ne min ye Ala Dencɛ ye, ne yɛrɛ fana t'a lɔn, fɔɔ n Faa Ala, a kelenpe.

³⁷ Koo min tun kɛra Nuhun ka tile la, o nyɔgɔn le bɛna kɛ fana Mɔgɔ Dencɛ nawaati la.

³⁸ Bari sanni jiba ka na, mɔgɔw tun bɛ dumunibabaw kɛ ka minni kɛ, ani ka furu kɛ fɔɔ ka taa se Nuhun donlon ma kurunba kɔnɔ.

³⁹ O tun tɛ miiri foyi la, fɔɔ jiba nana u halaki. O cogo la, Mɔgɔ Dencɛ ka nako bɛna kɛ ten fana.

⁴⁰ Cɛɛ fila bɛna to foro kelen kɔnɔ, u bɛna kelen ta ka kelen nin to yen.

⁴¹ Muso fila bɛna to sinni kɛyɔrɔ la, u bɛna kelen ta ka kelen nin to yen.

⁴² O la, aw labɛnnin ka to tuma bɛɛ la, bari aw t'aw ka Matigi nalon lɔn.

⁴³ Aw yɛrɛ b'a lɔn, ni sotigi tun bɛ se ka soon natuma lɔn sufɛ a ka soo kɔnɔ, a tun bɛna to a nyana k'a kɔnɔ, waasa a kana don a ka soo kɔnɔ ka cɛnni kɛ.

⁴⁴ O kɔsɔn, aw labɛnnin ka kan ka to tuma bɛɛ, bari aw tɛ miiri waati min koo la, o waati la Mɔgɔ Dencɛ bɛna na.

Baaradennyuman n'a juguman ka koo

⁴⁵ “Baaradennyuman hakilitigi ye jumɛn ye? O ye nin ye: A ka kuntigi taatɔ taama na, a y'a ka baaraden tɔw kalifa a ma, ko a ka dumuni d'u ma a diwaati la.

⁴⁶ N'a ka kuntigi nin kɔsegira ka n'a sɔrɔ a b'o baara nin na, baaraden nin bɛna bonya sɔrɔ.

⁴⁷ Tinyɛ na, ne b'a fɔ aw ye ko a ka kuntigi bɛn'a ka nafolo bɛɛ nyamɔgɔya don a bolo.

⁴⁸ Nga n'o baaraden nin kɛra baaradenjugu ye, n'a y'a miiri ko a ka kuntigi bɛna mɛn ka sɔrɔ ka na,

⁴⁹ o la, n'a tora k'a tɔnyɔgɔnw bugɔ, ka to dumunibaba la ni ka minni kɛ ka fa ni dɔrɔtɔw ye,

⁵⁰ o baaraden tɛ miiri loon min, ani waati min na, o loon yɛrɛ la, a ka kuntigi bɛna na.

⁵¹ A bɛna o baaraden nin minɛ k'a tɔɔrɔ, nanbaranmɔgɔw tɔɔrɔcogo la. O la, a bɛna kasi kosɛbɛ k'a fɔ ko n'a tun y'a lɔn.