Matiyu 22 - LAYIDUKURA

Yezu bɛ talen la kɔnyɔya dumuni dɔ koo la

¹ Yezu kumana u fɛ talen na tugu k'a fɔ ko:

² “Ala ka koow bɔnin bɛ masacɛ dɔ ta fɛ: A y'a deen ka kɔnyɔya dumuni labɛn.

³ A tun y'o dumuni koo fɔ minw ye, a y'a ka baaradenw ci k'u ka taa olu wele, nga olu tun t'a fɛ ka na.

⁴ O kɔ, a y'a ka baaraden dɔ wɛrɛw ci tugu k'u ka ta'a fɔ mɔgɔ nunu ye ko: ‘Ne ye dumuni bɛɛ labɛn ka ban. Ne ye n ka turaw ani n ka begɛn tulɔninw faga ka ban. Fɛɛn bɛɛ labɛnna, aw ye na o dumu.’

⁵ Nga minw welela, olu ma miiri u welekun na. U taara u nyana taw la: Dɔ taar'a ka foro la, dɔ fana taar'a ka jago kɛyɔrɔ la.

⁶ Tɔ nunu ye baaradenw minɛ k'u tɔɔrɔ kosɛbɛ ani k'u faga.

⁷ Masacɛ dimina kosɛbɛ, a y'a ka sɔlidasiw ci ka taa o mɔgɔfagala nunu halaki ani ka u ka dugu jɛni.

⁸ O kɔ, a y'a fɔ a ka baaraden dɔ wɛrɛw ye ko: ‘Kɔnyɔya dumuni labɛnna ka ban, nga minw tun welela, olu tun man kan n'a ye.

⁹ Aw ye taa sirabaw daa la, n'aw ye mɔgɔ o mɔgɔ sɔrɔ, aw k'u wele, u ka na ka dumuni nin dumu.’

¹⁰ Baaraden nunu taara sira daaw la. U ye mɔgɔ o mɔgɔ sɔrɔ yen, u y'u wele, a nyumaman fara jugumanw kan, fɔɔ kɔnyɔya dumuni labɛnna soo min kɔnɔ, o fara.

¹¹ Masacɛ donna ko a bɛ mɔgɔ welenin nunu filɛ waati min na, a ye cɛɛ dɔ ye kɔnyɔya fani tun tɛ min kaan na.

¹² A y'a fɔ o cɛɛ nin ye ko: ‘N teri, ele kɛra cogo di ka don yan ni kɔnyɔya fani t'i kaan na?’ O cɛɛ nin lɔra, a ma se ka kuma.

¹³ Masacɛ y'a fɔ a ka baaradenw ye ko: ‘Aw k'a seen n'a bolow siri, k'a ta k'a fili kɛnɛma dibi la. O yɔrɔ la, a bɛna tɔɔrɔ ka kasi.’

¹⁴ Ala bɛ mɔgɔ caaman wele waasa u ka don a ka masaya yɔrɔ la, nga minw bɛ se ka don, olu man ca.”

Nisɔngɔ ka sara masacɛ ye

¹⁵ Farizinyɛw taara nyɔgɔn ye kɛ, waasa ka cogo nyini ka se ka Yezu minɛ n'a yɛrɛ dalakuma ye.

¹⁶ U y'u ka kalanden dɔw, ni Erɔdi ka mɔgɔ dɔw ci, waasa u k'a fɔ Yezu ye ko: “Karamɔgɔ, an y'a lɔn ko i bɛ tinyɛ fɔ, an'i bɛ mɔgɔ kalan ni tinyɛ ye Ala ka sira la. E fana tɛ siran mɔgɔ si nya ka sɔn o tigi ka miiriya ma, i tɛ mɔgɔ bɔ mɔgɔ la.

¹⁷ I ka miiriya fɔ an ye, a daganin bɛ ka nisɔngɔ sara Ɔrɔmu masacɛ ye wa, walima a daganin tɛ?”

¹⁸ Nga Yezu bɔra u ka miiriyajugu kala ma minkɛ, a y'a fɔ u ma ko: “Nanbaranmɔgɔw, mun na aw bɛ ne dakɔrɔbɔ?

¹⁹ Aw bɛ nisɔngɔ sara ni wari min ye, aw k'o dɔ yira ne la.” U ye deniye wari kelen yira a la.

²⁰ A y'u nyininga ko: “Jon jaa n'a tɔgɔ le b'a kan?”

²¹ U y'a jaabi ko: “Masacɛ ta lo.” O kɔ, Yezu y'a fɔ u ye ko: “Fɛɛn min ye masacɛ ta ye, o ka di masacɛ ma, ka Ala ta di Ala ma.”

²² U y'o kuma mɛn minkɛ, u kabakoyara kosɛbɛ, o kɔ, u tɛmɛna ka taa ka Yezu to yen.

Sadusenyɛw bɛ Yezu nyininga suu kununko la

²³ Sadusenyɛw le tun b'a fɔ ko suuw tɛna kunun. O loon kelen na, olu dɔw taara Yezu fɛ k'a fɔ a ye ko:

²⁴ “Karamɔgɔ, Musa y'a fɔ ko ni mɔgɔ dɔ sara k'a sɔrɔ a ma deen sɔrɔ a muso ma, k'o tigi dɔgɔcɛ ka kan ka muso nin ta, waasa a ka deen sɔrɔ a baden ye o muso nin ma.

²⁵ Nga balima mɔgɔ wolonwula tun b'an fɛ. Kɔrɔcɛman ye muso furu, a sara k'a muso to yen, a ma deen sɔrɔ a ma. O cogo la, dɔgɔcɛ fɔlɔ ye muso nin ta,

²⁶ o kɔ, filanan fana y'a ta, ani sabanan. Olu si ma deen sɔrɔ muso nin ma, fɔɔ u mɔgɔ wolonwula bɛɛ ta kɛra ten.

²⁷ Olu bɛɛ sanin kɔ, muso nin fana sara.

²⁸ Ayiwa, suuw bɛna kunun loon min na, o muso nin bɛna kɛ jon ta ye u mɔgɔ wolonwula cɛma? Bari u bɛɛ y'a furu ka ye.”

²⁹ Yezu y'u jaabi ko: “Aw filila, bari aw tɛ Ala ka kuma faamu, aw tɛ Ala ka sebagaya lɔn fana.

³⁰ N'o tɛ, suuw bɛna kunun waati min na, furu tɛna kɛ. Mɔgɔw bɛɛ bɛna kɛ i n'a fɔ mɛlɛkɛw sankolo la.

³¹ Min ye suuw ka kununko ye, aw m'o kalan ka ye Ala ka kuma na wa? A ko:

³² ‘Ne ye Ibrayima, ni Isiyaka, ani Yakuba ka Ala ye.’ Ala ma kɛ suuw ka Ala ye, nga mɔgɔ nyanamanw ka Ala lo.”

³³ Jamaba y'a ka kuma nin mɛn, olu bɛɛ kabakoyara kosɛbɛ.

Sariya min koo ka gwɛlɛ ni tɔw bɛɛ ye

³⁴ Farizinyɛw y'a mɛn ko Yezu ye Sadusenyɛw minɛ kuma na minkɛ, olu ye nyɔgɔn lajɛn.

³⁵ U dɔ, min tun ye sariya karamɔgɔ ye, ale tun b'a fɛ ka Yezu dakɔrɔbɔ. O la, a y'a nyininga ko:

³⁶ “Karamɔgɔ, sariya kɔnɔ, cii jumɛn le koo ka gwɛlɛ?”

³⁷ Yezu y'a jaabi ko: “ ‘I ka i Matigi Ala kanu i dusu la, i kɔnɔ na, n'i hakili la.’

³⁸ O le ye cii fɔlɔ ye, ani o koo le ka gwɛlɛ fana.

³⁹ A filanan bɛ yen min koo ka gwɛlɛ i n'a fɔ fɔlɔ. O ko: ‘I k'i mɔgɔnyɔgɔn kanu i n'a fɔ e b'i yɛrɛ kanu cogo min na.’

⁴⁰ Sariya ni kiraw ka kalan bɛɛ bɔra nin cii fila la.”

Krista ni Dawuda ka koo

⁴¹ Ka Farizinyɛw lajɛnnin to, Yezu y'u nyininga ko:

⁴² “Aw ka miiri la, Ala ka Mɔgɔ wolomanin nin ye jon ye? Jon ka deen lo?” U y'a jaabi ko Dawuda dencɛ lo.

⁴³ Yezu y'a fɔ u ye ko: “Nii Senuman barika la, Dawuda ye Krista wele ko a Matigi, bari a y'a fɔ ko:

⁴⁴ ‘Matigi Ala y'a fɔ ne Matigi ye ko: Sigi ne kinibolo fɛ fɔɔ ne ka i juguw cɔnkɔn i seen kɔrɔ.’

⁴⁵ Ni Dawuda y'a wele Matigi, a bɛ se ka kɛ a deen dama ye cogo di?”

⁴⁶ U mɔgɔ si ma se k'a jaabi. K'a ta o loon na, mɔgɔ si ma sɔn k'a nyininga tugu.