Matiyu 16 - LAYIDUKURA

Farizinyɛ ni Sadusenyɛ dɔw ko Yezu ka kabako kɛ

¹ Farizinyɛ ni Sadusenyɛ dɔw gwɛrɛla Yezu la waasa k'a kɔrɔbɔ. U y'a fɔ Yezu ye ko a ka kabako dɔ kɛ min b'a yira ko a ka sebagaya bɔra Ala fɛ.

² Yezu y'u jaabi ko: “Wuladafɛ ni tilekun bɛ nyini ka don tuma min na, aw b'a fɔ ko suu bɛna diya, bari sankolo wulennin lo.

³ Sɔgɔmadafɛ fana, aw b'a fɔ ko bii tɛna diya bari yɔrɔ nyaa man nyi. Aw bɛ se ka sankolo filɛ ka waati cogoya faamu, nga koo minw bɛ kɛra waati nin na, aw tɛ sera k'olu faamu.

⁴ Bii mɔgɔw ka jugu, u murutinin bɛ Ala ma, u b'a fɛ ko ne ka kabako dɔ kɛ u nyana, nga kabako si tɛna kɛ u k'o ye, ni kira Zonasi ta nyɔgɔn tɛ.” O kɔ, a y'u lɔnin to yen ka tɛmɛ n'a ka sira ye.

Yezu b'a ka kalandenw ladi Farizinyɛ ni Sadusenyɛw ka kalan koo la

⁵ Tuma min na u tun bɛ taara baa kɔfɛ, kalandenw tun nyinɛna ka buru ta.

⁶ Yezu y'a fɔ u ye ko: “Aw k'aw yɛrɛ kɔlɔsi Farizinyɛ ni Sadusenyɛw ka burufununan ma.”

⁷ Kalandenw tora ka miiri u yɛrɛ kɔnɔ k'olu ma buru ta minkɛ, k'o la Yezu ye kuma nin fɔ.

⁸ Nga Yezu y'u ka miiriya lɔn, k'a fɔ u ye ko: “Jigi t'aw fɛ wa? Mun na aw bɛ miiri ten, ko aw nyinɛna buru kɔ?

⁹ Aw fana tɛ faamuli kɛ halibi wa? Ne ye cɛɛ waa duuru balo ni burukun duuru ye waati min na, aw ye segi daa min cɛ dumuni tɔɔ la, aw hakili tɛ o la wa?

¹⁰ Ani ne ye cɛɛ waa naani balo ni burukun wolonwula ye tuma min na, aw tun ye segi daa min fa dumuni tɔɔ la, aw hakili t'o fana na wa?

¹¹ Ne tun b'aw ladira Farizinyɛ ni Sadusenyɛw ka burufununan koo la tuma min na, mun na aw tun m'a faamu ko ne tun tɛ kumana buru koo la?”

¹² O tuma na, u y'a faamu ko a tun tɛ kumana u fɛ burufununan yɛrɛ koo la, nga ko a tun bɛ kumana u fɛ Farizinyɛ ni Sadusenyɛw ka kalan le koo la.

Piyɛri b'a fɔ ko Yezu ye Ala Deen ye

¹³ Yezu n'a ka kalandenw sera Sezare Filipi mara la. A y'a ka kalandenw nyininga ko: “Mɔgɔw b'a fɔra ko Mɔgɔ Dencɛ ye jon ye?”

¹⁴ U y'a jaabi ko: “Dɔw ko Zan batizelikɛla lo, dɔw ko Eli, dɔ wɛrɛw ko kira Zeremi, walima kira dɔ wɛrɛ.”

¹⁵ Yezu y'u nyininga ko: “Aw do? Aw b'a miiri ko ne ye jon ye?”

¹⁶ Simɔn Piyɛri y'a jaabi ko: “I ye Ala ka Mɔgɔ wolomanin nin ye, Ala Dencɛ.”

¹⁷ Yezu y'a fɔ a ye ko: “Zonasi dencɛ Piyɛri, i ye dubaden ye, bari mɔgɔ si ma nin fɔ i ye, nga ne Faa min bɛ sankolo la, o le y'o lɔnniya d'i ma.

¹⁸ I ye Piyɛri ye, o kɔrɔ ko fara, ne bɛna n ka egilizi lɔ o min kan, saya tɛna se ka foyi kɛ a la.

¹⁹ Ne bɛna arijana daa konnigɛ d'i ma. I mana ban fɛɛn o fɛɛn na dugukolo kan, u bɛna ban o fana na sankolo la. I mana sɔn fɛɛn o fɛɛn ma dugukolo kan, u bɛna sɔn o fana ma sankolo la.”

²⁰ O kɔ, Yezu y'a fɔ a ka kalandenw ye k'u kana sɔn k'a fɔ mɔgɔ si nyana ko ale ye Ala ka Mɔgɔwolomanin nin ye.

Yezu b'a ka saya n'a kununko fɔ

²¹ K'a ta o waati ma Yezu y'a daminɛ k'a fɔ ka gwɛ a ka kalandenw ye, ko: “Ne ka kan ka taa Zeruzalɛmu, cɛkɔrɔbaw ni sarakalasebagaw ani sariya karamɔgɔw bɛna ne tɔɔrɔ yen kosɛbɛ. U bɛna ne faga. Nga tile saba ne faganin kɔ, ne bɛna kunun.”

²² Piyɛri y'a wele danna k'a jalaki. A y'a fɔ a ye ko: “Matigi, Ala k'i kisi o koow ma. O tɛna i sɔrɔ.”

²³ Yezu ye Piyɛri filɛ k'a fɔ a ye ko: “E sutana nin, taa ka bɔ n kɔrɔ. E bɛ ne ka koow cɛnyɔrɔ le nyinina. Ele ka miiriya ni Ala ta ma kɛ kelen ye, adamadenya miiri le b'i fɛ.”

Mɔgɔ ka kan ka tugu Yezu kɔ cogo min na

²⁴ Yezu y'a fɔ a ka kalandenw ye ko: “Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A ka tɔɔrɔ bɛɛ munyu ne kɔsɔn ka tugu ne kɔ.

²⁵ Mɔgɔ o mɔgɔ b'a ka dinyɛlatigɛ nyako dɔrɔn fɛ, o tigi tɛna sini hɛrɛ sɔrɔ. Nga ni mɔgɔ min ka dinyɛlatigɛ cɛnna ne kɔsɔn, o tigi bɛna sini hɛrɛ sɔrɔ.

²⁶ Mɔgɔ ka sini hɛrɛ ka cɛn dinyɛ nafolo kɔsɔn, o bɛna mun nya a tigi ye? Walima fɛɛn jumɛn bɛ dinyɛ na n'o ka fisa ni mɔgɔ nii ye, n'i bɛ se k'i nii falen o la?

²⁷ Ayiwa, Mɔgɔ Dencɛ bɛna na n'a ka mɛlɛkɛw ye a Faa ka sebagaya la, o cogo la a bɛna mɔgɔw bɛɛ kelen kelen sara ka kɛnyɛ n'u ka kɛwaliw ye.

²⁸ Tinyɛ na, ne b'a fɔ aw ye ko aw minw bɛ yan, aw dɔw tɛna sa n'u ma Mɔgɔ Dencɛ natɔ ye n'a ka masaya ye.”