Matiyu 1 - LAYIDUKURA

Yezu Krista buruju bɔra mɔgɔ minw na

¹ Yezu Krista buruju filɛ nin ye. Yezu Krista buruju bɔra Dawuda la, Dawuda fana buruju bɔra Ibrayima na.

² Ibrayima tun ye Isiyaka facɛ ye. Isiyaka fana tun ye Yakuba facɛ ye. Yakuba fana tun ye Zuda n'a balimaw facɛ ye.

³ Zuda fana tun ye Farɛsi ni Zara sɔrɔ Tamari ma. Farɛsi fana tun ye Ɛsirɔn facɛ ye. Ɛsirɔn fana tun ye Aramu facɛ ye.

⁴ Aramu fana tun ye Aminadabu facɛ ye. Aminadabu fana tun ye Naasɔn facɛ ye. Naasɔn fana tun ye Salimɔn facɛ ye.

⁵ Salimɔn fana tun ye Boozi sɔrɔ Araabu ma. Boozi fana tun ye Zobɛdi sɔrɔ Uruti ma. Zobɛdi fana tun ye Zese facɛ ye.

⁶ Zese fana tun ye masacɛ Dawuda facɛ ye. Dawuda fana tun ye Solomani facɛ ye. Solomani bamuso tun ye Uri ka muso ye.

⁷ Solomani fana tun ye Orobowamu facɛ ye. Orobowamu fana tun ye Abiya facɛ ye. Abiya fana tun ye Aza facɛ ye.

⁸ Aza fana tun ye Zozafati facɛ ye. Zozafati fana tun ye Zoramu facɛ ye. Zoramu fana tun ye Oziyasi facɛ ye.

⁹ Oziyasi fana tun ye Zowatan facɛ ye. Zowatan fana tun ye Akazi facɛ ye. Akazi fana tun ye Ezekiyasi facɛ ye.

¹⁰ Ezekiyasi fana tun ye Manase facɛ ye. Manase fana tun ye Amɔn facɛ ye. Amɔn fana tun ye Zoziyasi facɛ ye.

¹¹ Zoziyasi fana tun ye Zekoniyasi n'a balimaw facɛ ye. Zekoniyasi ka tile la, Babilɔnikaw ye see sɔrɔ u kan, u ye u cɛ ka taa u kɛ jɔɔnw ye Babilɔni.

¹² U bɔnin kɔ jɔnya la Babilɔni, Zekoniyasi ye Salatiyɛli wolo. Salatiyɛli fana ye Zorobabɛli wolo.

¹³ Zorobabɛli fana ye Abiyudi wolo. Abiyudi fana ye Eliyakimu wolo. Eliyakimu fana ye Azɔri wolo.

¹⁴ Azɔri fana ye Sadɔki wolo. Sadɔki fana ye Akimu wolo. Akimu fana ye Eliyudi wolo.

¹⁵ Eliyudi fana ye Eleyazari wolo. Eleyazari fana ye Matan wolo. Matan fana ye Yakuba wolo.

¹⁶ Yakuba fana ye Yusufu wolo. Yusufu ye Mariyamu furu. Mɔgɔw bɛ Yezu min wele ko Krista, Mariyamu ye ale bamuso ye.

¹⁷ K'a ta Ibrayima ma ka n'a bila Dawuda la, faa tan ni naani bɛ olu cɛ. K'a ta Dawuda ma ka n'a bila u taawaati ma jɔnya la, faa tan ni naani bɛ o waati cɛ. K'a ta jɔnya waati ma Babilɔni ka n'a bila Krista la, faa tan ni naani fana bɛ o waati cɛ.

Yezu Krista woloko

¹⁸ Yezu Krista wolola cogo min na, o filɛ. A bamuso tɔgɔ tun ko Mariyamu, a maminɛnin tun bɛ Yusufu fɛ. Sanni u ka furu kɛ, o y'a sɔrɔ Mariyamu ye kɔnɔ ta Nii Senuman barika la.

¹⁹ Yusufu tun ye mɔgɔnyuman ye minkɛ, a tun t'a fɛ ka Mariyamu tɔgɔ cɛn mɔgɔw nyana. O la, a y'a ;naniya ko a bɛna ban Mariyamu na dogo la.

²⁰ O ;naniya tanin kɔ, Matigi ka mɛlɛkɛ dɔ y'a yɛrɛ yira a la sigo la k'a fɔ a ye ko: “Dawuda deen Yusufu, i kana siran ka Mariyamu furu, bari a ye kɔnɔ ta Nii Senuman barika la.

²¹ A bɛna dencɛ wolo, i k'a tɔgɔ la ko Yezu, bari ale le bɛn'a ka mɔgɔw kisi u ka kojuguw tɔɔrɔ ma.”

²² O koow bɛɛ kɛra ten janko kira tun ye Matigi ka kuma min fɔ, o ka kɛ. A tun y'a fɔ ko:

²³ “Sunguru dɔ bɛna kɔnɔ ta ka dencɛ wolo. O deen nin tɔgɔ bɛna la ko Emanuwɛli, o kɔrɔ ko Ala b'an cɛma.”

²⁴ Yusufu kununna tuma min na, Matigi ka mɛlɛkɛ tun ye min fɔ a ye, a y'o kɛ. A ye Mariyamu furu siri.

²⁵ Nga, u ma jɛn fɔɔ Mariyamu nana jigi dencɛ la. Yusufu ye o deen nin tɔgɔ la ko Yezu.