Marika 3 - LAYIDUKURA

Yezu bɛ cɛɛ tigɛjanin dɔ kɛnɛya

¹ Loon wɛrɛ, Yezu segira ka don Alabatoso kɔnɔ. Cɛɛ tigɛjanin dɔ tun bɛ yen.

² Mɔgɔ minw tun bɛ yen, u tun bɛ Yezu kɔlɔsira yala n'a bɛna o cɛɛ kɛnɛya lafinyɛlon na, janko u ka se ka ta'a kɔrɔfɔ u ka faamaw nyana.

³ Yezu y'a fɔ cɛɛ tigɛjanin ye ko: “Wili ka na lɔ yan mɔgɔw bɛɛ nyafɛ.”

⁴ O kɔ, Yezu y'u nyininga ko: “A daganin bɛ ka konyuman kɛ lafinyɛlon na wa, walima ka kojugu kɛ? Ka mɔgɔ kisi wa, walima k'a faga?” U m'a jaabi.

⁵ Yezu diminin y'u filɛfilɛ, a nyaa sisira u ka tulogwɛlɛya kɔsɔn. A y'a fɔ cɛɛ ye ko: “I tigɛ jan.” A y'a jan, a tigɛ kɛnɛyara.

⁶ O yɔrɔnin bɛ, Farizinyɛw bɔra ka taa nyɔgɔn ye ni masacɛ Erɔdi kɔmɔgɔw ye ka cogo nyini Yezu fagako la.

Jamaba bɛ tugu Yezu kɔ

⁷ Yezu n'a ka kalandenw taara Galile bada la. Jamaba tugura u kɔ. U dɔw bɔra Galile mara yɛrɛ la, dɔw bɔra Zude mara la,

⁸ dɔw bɔra Idume mara la. Dɔw bɔra Zeruzalɛmu, dɔw bɔra Zurudɛn baa kɔfɛ, dɔw fana bɔra Tiri ni Sidɔn gɛrɛfɛ duguw la. O jamaba taara Yezu sɛgɛrɛ, bari u tun y'a ka kɛwaliw kibaru mɛn.

⁹ A y'a fɔ a ka kalandenw ye k'u ka kurunfitini dɔ labɛn ale ye, janko jama kana na ale nyɔntinyɔnti.

¹⁰ Yezu tun bɛ mɔgɔ caaman kɛnɛya, o kama banabagatɔ bɛɛ tun bɛ girin a nɔɔ fɛ, janko u ka se ka maga a la.

¹¹ Ni jinatɔw y'a ye tuma o tuma, u tun b'u kunbiri gwan a kɔrɔ ka pɛrɛn ko: “I ye Ala Dencɛ ye.”

¹² Nga Yezu tun b'a gwɛlɛya u ma k'u kana to mɔgɔw k'a lɔn ko ale ye Ala Dencɛ ye.

Yezu bɛ ciden tan ni fila woloma

¹³ O kɔ, Yezu yɛlɛla kulu dɔ kan k'a sagolamɔgɔw wele. U taar'a fɛ.

¹⁴ A ye mɔgɔ tan ni fila woloma olu cɛma k'u kɛ cidenw ye, janko u ka kɛ a taamanyɔgɔnw ye an'a ka to k'u ci ka taa waajuli kɛ.

¹⁵ A ye see d'u ma ka jinaw gwɛn ka bɔ mɔgɔw la.

¹⁶ A ye mɔgɔ tan ni fila minw woloma, olu tɔgɔ filɛ: Simɔn, Yezu y'o tɔgɔ la ko Piyɛri, o kɔrɔ ko fara,

¹⁷ ani Zebede ka dencɛ fila, Zaki n'a dɔgɔcɛ Zan, Yezu ye olu tɔgɔ la ko Bowanɛrizɛsi, o kɔrɔ ko mɔgɔ minw ka fari i n'a fɔ sanpɛrɛn,

¹⁸ Andere ni Filipi, Baritelemi ni Matiyo, Toma ni Alife ka dencɛ Zaki, Tade ni Simɔn Zelɔti,

¹⁹ ani Zuda Isikariyɔti min ye Yezu don a juguw bolo.

Sariya karamɔgɔ dɔw ko jina bɛ Yezu fɛ

²⁰ O kɔ, Yezu taara soo. Jamaba taara lajɛn yen tugu fɔɔ Yezu n'a ka kalandenw tun tɛ se ka waati yɛrɛ sɔrɔ ka dumuni kɛ.

²¹ Yezu ka somɔgɔw y'o kibaru mɛn minkɛ, u taara k'u b'a minɛ bari u tun bɛ miiri ko a kuun wilila.

²² Sariya karamɔgɔ minw bɔra Zeruzalɛmu ka taa yen, olu ko: “Jinaw ka kuntigi Belezebuli b'a fɛ.” Ani ko: “Ale bɛ see dir'a ma ka jinaw gwɛn ka bɔ mɔgɔw la.”

²³ Yezu y'u wele ka talen la u ye. A ko: “Sutana bɛ se k'a yɛrɛ gwɛn cogo di?

²⁴ Ni jamana min ka mɔgɔw bɛ nyɔgɔn kɛlɛ, o jamana nin tɛ se ka nya.

²⁵ Ni soo min ka mɔgɔw bɛ nyɔgɔn kɛlɛ, o soo nin bɛ ci.

²⁶ O la, ni Sutana tun bɛ wili a yɛrɛ kama, a ka masaya tun bɛna nagasi. O masaya tun tɛna se ka mɛn, o tun bɛna ban joona.

²⁷ “Mɔgɔ si tɛ se ka don cɛɛ barikaman ka soo kɔnɔ k'a bololafɛnw cɛ n'a m'o cɛɛ minɛ k'a siri fɔlɔ. N'a y'a siri, o tuma na, a bɛ se k'a ka sokɔnɔfɛnw bɛɛ cɛ.

²⁸ “Tinyɛ na, ne b'a fɔ aw ye ko mɔgɔw ka kojugu bɛɛ, n'u ka Ala tɔgɔcɛn kuma bɛɛ bɛ se ka yafa,

²⁹ nga ni mɔgɔ o mɔgɔ ye Nii Senuman tɔgɔ cɛn, Ala tɛna yafa o tigi ma fewu. O tigi ye kojugu yafabali kɛ.”

³⁰ Yezu y'o fɔ bari sariya karamɔgɔw tun ko jina b'a fɛ.

Yezu baa n'a dɔgɔninw

³¹ Yezu baa n'a dɔgɔninw taara lɔ kɛnɛma. U ye mɔgɔ bila ka taa Yezu wele.

³² Mɔgɔ caaman siginin tun bɛ yen ka Yezu lamini. Dɔ y'a fɔ a ye ko: “Hakɛ to. I baa n'i dɔgɔninw lɔnin bɛ kɛnɛma, u b'a fɛ k'i ye.”

³³ Yezu y'a jaabi ko: “Jon ye ne baa ye? Jon ni jon ye ne dɔgɔninw ye?”

³⁴ O kɔ, mɔgɔ minw siginin tun bɛ yen k'a lamini, a ye olu filɛ k'a fɔ ko: “Ne baa ni ne dɔgɔninw filɛ yan.

³⁵ Mɔgɔ o mɔgɔ bɛ Ala sago kɛ, o tigi ye ne dɔgɔcɛ, walima ne dɔgɔmuso, walima ne baa ye.”