Marika 15 - LAYIDUKURA

Pilati bɛ Yezu kiti

¹ Sɔgɔma joona, sanni tile ka bɔ, sarakalasebagaw ni sariya karamɔgɔw ni cɛkɔrɔbaw ani Zuwifuw ka kititigɛlaw bɛɛ ye nyɔgɔn ye Yezu ka koo la. U y'a bolow siri ka ta'a don Pilati bolo.

² Pilati y'a nyininga ko: “I ye Zuwifuw ka masacɛ ye wa?” Yezu y'a jaabi ko: “Ɔnhɔn, i yɛrɛ y'a fɔ ka ban.”

³ Sarakalasebagaw y'a jalaki kosɛbɛ.

⁴ Pilati y'a nyininga tugu ko: “I tɛ foyi fɔ wa? U y'a fɔ ko i ye kojugu minw kɛ, i m'o mɛn wa?”

⁵ Nga Yezu ma foyi fɔ tugu. O ye Pilati kabakoya.

Jama ko Yezu ka gwengwen lɔgɔ kan

⁶ Saan o saan Hɔrɔnya nyanagwɛ tuma na, Pilati tun bɛ kasoden dɔ bila ka kɛnyɛ ni jama ka lanyini ye.

⁷ O y'a sɔrɔ cɛɛ dɔ tun bɛ yen min tɔgɔ ko Barabasi. O tun bɛ kaso la n'a murutinyɔgɔnw ye o waati la, bari olu tun murutira Ɔrɔmu faamaw ma tuma min na, u tun ye mɔgɔ dɔ faga.

⁸ Jama taara Pilati fɛ k'a dali ko: “I bɛ to ka koo min kɛ an ye saan o saan Hɔrɔnya nyanagwɛ tuma na, o kɛ an ye.”

⁹ Pilati y'u nyininga ko: “Aw b'a fɛ ne ka Zuwifuw ka masacɛ le bila wa?”

¹⁰ Pilati tun y'a lɔn ko nyagoya le y'a to sarakalasebagaw ye Yezu don ale bolo.

¹¹ Nga sarakalasebagaw ye jama kɔnɔnasu k'u ka Pilati dali ko a ka Barabasi bila.

¹² Pilati y'u nyininga tugu ko: “O tuma na, aw bɛ min wele Zuwifuw ka masacɛ, aw b'a fɛ ne ka mun kɛ o la?”

¹³ U pɛrɛnna ko: “A gwengwen lɔgɔ kan.”

¹⁴ Pilati y'u nyininga tugu ko: “Mun na? A ye kojugu jumɛn kɛ?” U pɛrɛnna ka tɛmɛ fɔlɔta kan ko: “A gwengwen lɔgɔ kan.”

¹⁵ Pilati tun b'a fɛ ka jama sago kɛ minkɛ, a ye Barabasi bila. A ye mɔgɔ bila ka Yezu bugɔ ni golokami ye, ka sɔrɔ k'a don sɔlidasiw bolo k'u ka ta'a gwengwen lɔgɔ kan.

Sɔlidasiw bɛ yɛlɛ Yezu ma

¹⁶ Sɔlidasiw taara ni Yezu ye Zude mara kuntigi ka luu kɔnɔ. U ye sɔlidasi tɔw bɛɛ wele k'u lajɛn yen.

¹⁷ U ye duloki wuleman don a kaan na. U ye masafugulan dan ni ;nɔni ye k'a don a kuun na.

¹⁸ O kɔ, u y'a daminɛ ka Yezu fo ko: “I dansɛ, Zuwifuw ka masacɛ.”

¹⁹ U tora k'a bugɔ a kuun na ni bere ye, k'u daji tu a kan, ani k'u kunbiri gwan a kɔrɔ i n'a fɔ u b'a bonya.

²⁰ U yɛlɛla a ma ka ban tuma min na, u ye duloki wuleman nin bɔ a kaan na, k'a yɛrɛ ka duloki ta k'a don a la. U bɔra ka taa n'a ye a gwengwenyɔrɔ la.

U bɛ Yezu gwengwen lɔgɔ kan

²¹ Sɔlidasiw taatɔ Yezu gwengwenyɔrɔ la, u ye cɛɛ dɔ tɛmɛtɔ ye ka bɔ kongo la. O cɛɛ tun ye Sirɛnika ye, a tɔgɔ ko Simɔn. Alɛkisandiri ni Urufusi facɛ tun lo. Sɔlidasiw y'a karaba ka Yezu gwengwenlɔgɔ ta.

²² U taara ni Yezu ye yɔrɔ dɔ la u bɛ min wele u ka kaan na ko Gɔligota, o kɔrɔ ko kungolo yɔrɔ.

²³ U ye fura dɔ nyagami duvɛn na k'u b'a d'a ma a k'a min, nga a banna.

²⁴ O kɔ, u y'a gwengwen lɔgɔ kan. U ye kala bon janko u bɛna Yezu ka faniw tilantilan nyɔgɔn cɛ cogo min na, u k'o lɔn. U ye faniw tilantilan nyɔgɔn cɛ ka kanya n'o ye.

²⁵ U y'a gwengwen lɔgɔ kan tuma min na, o y'a sɔrɔ tilekun bɔra a bɛ lɛrɛ saba bɔ.

²⁶ U y'a gwengwen kuun min na, u y'o sɛbɛn walaka dɔ kan ko: “Zuwifuw ka masacɛ.”

²⁷ U ye benkannikɛla fila gwengwen lɔgɔ dɔw kan Yezu gɛrɛfɛ. Kelen tun b'a kinibolo fɛ, kelen tun b'a numanbolo fɛ. [

²⁸ O cogo la, min sɛbɛnnin bɛ Ala ka kuma na ko: “U y'a jati kojugukɛlaw dɔ ye”, o kɛra.]

²⁹ Mɔgɔ minw tun bɛ tɛmɛna, u tun b'u kuun karikari ka Yezu nɛni ko: “Anhaan! E min bɛ se ka Alabatosoba ci k'a lɔ kura ye tile saba kɔnɔ,

³⁰ jigi ka bɔ gwengwenlɔgɔ kan k'i yɛrɛ kisi.”

³¹ O cogo kelen na, sarakalasebagaw ni sariya karamɔgɔw tun bɛ yɛlɛ Yezu ma n'u b'a fɔ nyɔgɔn ye ko: “A ye mɔgɔ wɛrɛw kisi, nga a tɛ se k'a yɛrɛ kisi.

³² N'a ye Ala ka Mɔgɔ wolomanin nin ye, Isirayɛli ka masacɛ, a ka jigi ka bɔ gwengwenlɔgɔ kan sisan. N'an ye o ye, an bɛna la a la.” U tun ye mɔgɔ minw gwengwen lɔgɔ kan Yezu gɛrɛfɛ, olu fana tun b'a nɛnina.

Yezu ka sayako

³³ Tilegwangwan fɛ, dibi donna yɔrɔ bɛɛ ka taa se tile sumawaati ma.

³⁴ Tile sumana tuma min na, Yezu pɛrɛnna u ka kaan na ko: “Eloyi, Eloyi, lamasabakitani?” O kɔrɔ ko: “Ne ka Ala, ne ka Ala, mun na i bɔra ne kɔ?”

³⁵ Mɔgɔ minw tun bɛ yen, u dɔw y'o pɛrɛnkan mɛn minkɛ, u y'a fɔ ko: “Aw k'aw tulo malɔ. A bɛ kira Eli welela.”

³⁶ U dɔ bolila ka taa fuu ta, k'a don kumuji la, k'a bila bere jamanjan dɔ kunna, ko a b'a di Yezu ma a k'a min. O cɛɛ nin y'a fɔ ko: “Aw ye lɔ. An bɛn'a filɛ yala ni Eli bɛna na a bɔ gwengwenlɔgɔ nin na.”

³⁷ Yezu kulera ka sɔrɔ ka sa.

³⁸ O tuma na, Alabatosoba cɛtigɛfani faranna fila ye k'a daminɛ sanfɛ fɔɔ duguma.

³⁹ Sɔlidasi kɛmɛ kuntigi min tun lɔnin bɛ Yezu nyafɛ, o y'a ye ko a sara ten minkɛ, a y'a fɔ ko: “Siga t'a la, cɛɛ nin tun ye Ala Deen ye.”

⁴⁰ Muso dɔw fana lɔnin tun bɛ yɔrɔjan k'o koow filɛ. Magidala Mariyamu, Zaki fitini ni Zoze bamuso Mariyamu, ani Salome tun b'o musow cɛma.

⁴¹ Yezu tun bɛ Galile mara la tuma min na, olu tun bɛ to ka tugu a kɔ k'a dɛmɛ. Muso caaman tun b'u cɛma fana minw tun taara ni Yezu ye Zeruzalɛmu.

Yezu suu donko

⁴² U tun ye Yezu faga loon min na, a dugusagwɛ tun bɛna kɛ lafinyɛlon ye. Wuladafɛ,

⁴³ Arimate Yusufu y'a jaa gwɛlɛya ka taa Pilati sɛgɛrɛ ka Yezu suu dali a fɛ janko lafinyɛlon ka koow kana nyagami. Yusufu tun ye mɔgɔba ye Zuwifuw ka kititigɛlaw cɛma. Ale fana tun bɛ Ala ka masaya waati kɔnɔna.

⁴⁴ Pilati y'a mɛn ko Yezu sara joona ten minkɛ, o y'a kabakoya. A ye sɔlidasi kuntigi wele k'a nyininga yala ni Yezu satuma mɛnna.

⁴⁵ A ye kunnafoni sɔrɔ ka bɔ sɔlidasi kuntigi fɛ tuma min na, a sɔnna Yusufu ka taa Yezu suu ta.

⁴⁶ Yusufu taara bagi san. O kɔ, a taara Yezu suu bɔ gwengwenlɔgɔ kan ka bagi nin meleke a la. U tun ye kaburu min sogi farakulu la, a y'a suu don o kɔnɔ. O kɔ, a ye kabakuru belebeleba dɔ kolonkolon ka kaburu datugu n'a ye.

⁴⁷ Magidala Mariyamu ani Zoze bamuso Mariyamu ye Yezu suu don yɔrɔ filɛ.