Marika 1 - LAYIDUKURA

Zan batizelikɛla ka waajuli

¹ Kibaru diman min bɛ Ala Dencɛ Yezu Krista koo fɔ, o bɛ daminɛ yan.

² Kira Ezayi ye kitabu min sɛbɛn, a fɔra o kɔnɔ ko: “Lamɛnni kɛ, ne Ala bɛna n ka ciden ci i nya, k'i ka sira labɛn.

³ Mɔgɔ dɔ bɛ pɛrɛnna kongo kɔnɔ ko: ‘Aw ka Matigi ka sira dilan k'a tilen.’ ”

⁴ O cogo la, Zan batizelikɛla y'a yɛrɛ yira kongo kɔnɔ. A tun bɛ mɔgɔw waaju k'u ka nimisa ka faran u ka kojuguw la ka batize, janko Ala ka yafa u ma.

⁵ Zude mara mɔgɔw ani Zeruzalɛmukaw bɛɛ tun bɛ bɔ ka ta'a sɛgɛrɛ. U tun ye kojugu minw kɛ, u tun b'olu fɔ kɛnɛ kan, o kɔ, Zan tun b'u batize Zurudɛn baji la.

⁶ Zan tun bɛ nyɔgɔmɛsi fani don k'a cɛɛ siri ni cɛsirilan gololaman ye. A tun b'a yɛrɛ balo ni tɔɔn ni lii ye.

⁷ A tun b'a fɔ mɔgɔw ye ko: “Min bɛna na ne kɔ, o ka sebagaya ka bon ni ne ta ye. Hali ka biri k'a ka sanbara juru foni, ne kuun ka dɔgɔ o ma.

⁸ Ne y'aw batize ni jii ye, nga ale bɛna aw batize ni Nii Senuman ye.”

Zan bɛ Yezu batize

⁹ O tuma na, Yezu bɔra Nazarɛti Galile mara la ka taa Zan sɛgɛrɛ. Zan y'a batize Zurudɛn baji la.

¹⁰ Yezu bɔtɔ jii la, a ye sankolo dayɛlɛnin ye ka Nii Senuman jigitɔ ye a kan i n'a fɔ jɛnɛtugan bɛ cogo min na.

¹¹ Kumakan dɔ bɔra sankolo la k'a fɔ ko: “I ye ne Dencɛ ye, i koo ka di ne ye haali. A diyara ne ye, n y'i woloma.”

Sutana bɛ Yezu nigɛ ka dɛsɛ

¹² O yɔrɔnin kelen, Nii Senuman y'a kɛ Yezu taara kongo kɔnɔ.

¹³ A ye tile bi naani kɛ kongo kɔnɔ. Kongosogow dama tun b'o yɔrɔ la. K'a to yen, Sutana y'a nigɛ ka dɛsɛ. Mɛlɛkɛw tun b'a mako nya.

Yezu bɛ mɔnikɛla naani wele

¹⁴ Zan donnin kɔ kaso la, Yezu taara Ala ka kibaru diman fɔ Galile mara la.

¹⁵ A tun b'a fɔ ko: “Ala tun ye waati min latigɛ, o sera. Ala ka masaya waati surunyana. Aw ye nimisa ka faran aw ka kojuguw la ka la kibaru diman na.”

¹⁶ Yezu tɛmɛtɔ Galile bada la, a ye mɔnikɛla fila ye, Simɔn n'a dɔgɔcɛ Andere. U tun bɛ jɔɔ filila baji la.

¹⁷ Yezu y'a fɔ u ye ko: “Aw ye tugu ne kɔ, aw bɛ baa mɔ cogo min na, ne bɛna aw kɛ dinyɛ mɔlaw ye ten ka mɔgɔw sɔrɔ Ala ye.”

¹⁸ O yɔrɔnin kelen, u y'u ka jɔɔw to yen ka tugu Yezu kɔ.

¹⁹ A taara nyafɛ dɔɔni, a ye Zebede ka dencɛw ye, Zaki n'a dɔgɔcɛ Zan. U tun b'u ka jɔɔw lalagara kurun kɔnɔ.

²⁰ O yɔrɔnin bɛ, a y'u wele. U y'u faa Zebede ni baaradenw to yen kurun kɔnɔ ka tugu a kɔ.

Yezu ka fanga jinaw kan

²¹ Yezu n'a ka kalandenw sera Kafaranamu dugu kɔnɔ. Lafinyɛlon na, Yezu donna Alabatoso kɔnɔ ka mɔgɔw kalan.

²² U kabakoyara a ka mɔgɔ kalan cogo la, bari a tun t'u kalan i n'a fɔ sariya karamɔgɔw b'u kalan cogo min na, nga a tun b'u kalan i n'a fɔ fanga bɛ mɔgɔ min bolo.

²³ O waati yɛrɛ la, cɛɛ jinatɔ dɔ tun bɛ yen, o pɛrɛnna ko:

²⁴ “Mun bɛ an ni e cɛ, Nazarɛti Yezu? I nana k'an halaki wa? I ye mɔgɔ min ye, ne b'o lɔn. I ye Ala ka ciden senuman ye.”

²⁵ Yezu sɔngɔra a kunna k'a fɔ a ye ko: “I daje ka bɔ cɛɛ nin na!”

²⁶ Jina ye cɛɛ yuguyugu kosɛbɛ ka bɔ a la ni kule ye.

²⁷ Mɔgɔ bɛɛ kabakoyara fɔɔ u tun bɛ nyɔgɔn nyininga ko: “Nin ye mun ye? A bɛ kuma barikaman fɔ ka fɛnkura nyaa yira mɔgɔw la. Hali jinaw bɛ sɔn a ta ma.”

²⁸ O sababu fɛ, Yezu tɔgɔ bɔra joona Galile mara bɛɛ la.

Yezu bɛ banabagatɔ caaman kɛnɛya

²⁹ O kɔ, Yezu ni Zaki ani Zan bɔra Alabatoso kɔnɔ ka taa Simɔn ni Andere ka soo.

³⁰ Simɔn biranmuso lanin tun bɛ farigwan bolo. Yezu sera dɔrɔn, u y'o muso koo fɔ a ye.

³¹ Yezu gwɛrɛla a la k'a bolo minɛ ka wili. O yɔrɔnin kelen, a ka farigwan banna. A ye dumuni tobi u ye.

³² Tilekun donnin kɔ, mɔgɔw taara Yezu sɛgɛrɛ ni jinatɔw ani banabagatɔw bɛɛ ye.

³³ Dugu kɔnɔ mɔgɔw bɛɛ y'u lajɛn boon daa la.

³⁴ A ye banabagatɔ sifa caaman kɛnɛya ka jinaw gwɛn ka bɔ mɔgɔ caaman na. A tun tɛ sɔn jinaw ka kuma, bari olu tun b'a lɔn.

Yezu bɛ taa Ala ka kuma fɔ Galile mara bɛɛ la

³⁵ O dugusagwɛ sɔgɔma joona, sanni kɛnɛ ka bɔ, Yezu kununna. A bɔra ka taa Ala dali kongo kɔnɔ.

³⁶ Simɔn n'a tɔnyɔgɔnw kununna tuma min na, u taar'a yɔrɔ nyini.

³⁷ U y'a ye tuma min na, u y'a fɔ a ye ko: “Mɔgɔ bɛɛ b'i yɔrɔ nyinina.”

³⁸ A y'u jaabi ko: “An ka taa gɛrɛfɛ duguw la, ne bɛna Ala ka kuma fɔ o yɔrɔw la fana, bari ne nana dinyɛ na o le kama.”

³⁹ O la, a taara Galile mara faan bɛɛ la ka Ala ka kuma fɔ Alabatosow kɔnɔ ani ka jinaw gwɛn ka bɔ mɔgɔw la.

Yezu bɛ kunatɔ dɔ kɛnɛya

⁴⁰ Kunatɔcɛ dɔ gwɛrɛla k'a kunbiri gwan Yezu kɔrɔ k'a dali ko: “N'i sɔnna, i bɛ se ka ne kɛnɛya.”

⁴¹ A hinɛ donna Yezu la minkɛ, a magara a la k'a fɔ a ye ko: “N sɔnna, ko i ka kɛnɛya.”

⁴² O yɔrɔnin bɛ, cɛɛ kɛnɛyara.

⁴³ O kɔ, sanni Yezu k'a fɔ a ye ko a ka taa, a y'a gwɛlɛya a ma kosɛbɛ ko:

⁴⁴ “I yɛrɛ kɔlɔsi, i kan'a fɔ mɔgɔ si ye ko ne le y'i kɛnɛya dɛ! Nga taa i yɛrɛ yira sarakalasebagaw la. Musa tun ye saraka min koo fɔ kunatɔ ka kɛnɛyali koo la, i k'o bɔ k'a yira mɔgɔw la ko i kɛnɛyara.”

⁴⁵ O n'a ta bɛɛ, cɛɛ taara tuma min na, koo min tun kɛra a ye, a y'a daminɛ k'o lakali fɔɔ Yezu tun tɛ se ka don dugu si kɔnɔ tugu mɔgɔw nyana. A tun bɛ to kongo kɔnɔ. Mɔgɔw tun bɛ bɔ faan bɛɛ la ka ta'a sɛgɛrɛ yen.