Luka 9 - LAYIDUKURA

Yezu b'a ka kalanden tan ni fila ci

¹ Yezu y'a ka kalanden tan ni fila lajɛn ka sebagaya ni fanga d'u ma ka jinaw gwɛn, ani ka banabagatɔw kɛnɛya.

² O kɔ, a y'u ci ka taa Ala ka masaya koo fɔ, ka banabagatɔw kɛnɛya.

³ A y'a fɔ u ye ko: “Aw kana fɛɛn si ta, bere wo, dugutaaminan wo, dumuni wo, wari wo, aw kana o si ta. Aw kana duloki fila don.

⁴ N'aw ye jatigila sɔrɔ yɔrɔ o yɔrɔ, aw ye to yen fɔɔ aw bɔtuma ka se o dugu kɔnɔ.

⁵ Ni dugu dɔ mɔgɔw banna ka jigiyɔrɔ d'aw ma, aw ye bɔ yen, k'aw ka sennabuguri furanfuran ka bɔ aw seen na. O bɛna kɛ taamasinyɛ ye k'a yira u la k'u bɛn'a ye.”

⁶ Kalandenw taara yaala duguw la ka Ala ka kibaru diman fɔ ani ka banabagatɔw kɛnɛya o yɔrɔw bɛɛ la.

Erɔdi hakili bɛ nyagami Yezu koo la

⁷ O tuma na, Galile mara kuntigi tun ye Erɔdi ye. Ale ye kokɛnin nunu bɛɛ kibaru mɛn minkɛ, a hakili nyagamina, bari dɔw tun ko Zan batizelikɛla le kununna.

⁸ Dɔw fana ko kira Eli le segira ka na. Dɔ wɛrɛw ko kirakɔrɔw dɔ le kununna.

⁹ Nga Erɔdi ko: “Ne y'a to u ye Zan kuun tigɛ. Ne do bɛ min ka koo kɛnin kibaru mɛnna, o ye jon le ye?” O la, a tun b'a fɛ a nyaa ka la Yezu kan.

Yezu bɛ dumuni di cɛɛ waa duuru ma

¹⁰ Cidenw kɔsegira tuma min na, u ye koo minw kɛ, u y'o bɛɛ lakali Yezu ye. A taara n'u ye danna dugu dɔ faan fɛ min tɔgɔ ko Bɛtisayida.

¹¹ Nga jama nana a lɔn minkɛ, u taar'a fɛ. Yezu y'u kunbɛn ni nisɔndiya ye, ani ka u kalan Ala ka masaya koo la. Minw tun bɛ kɛnɛyali fɛ, a ye olu kɛnɛya.

¹² Tile tun bɛ nyini ka ban minkɛ, a ka kalandenw gwɛrɛla a la k'a fɔ a ye ko: “Sira di jama ma u ka taa dafɛ duguw la ka dumuni ani la yɔrɔ nyini u yɛrɛ ye, bari an bɛ kongo le kɔnɔ yan.”

¹³ Nga Yezu y'u jaabi k'u yɛrɛ ka dumuni d'u ma. U y'a fɔ a ye ko foyi t'u fɛ ni burukun duuru ani jigɛ fila tɛ. Ko fɔɔ n'u taara dumuni san ka n'a d'u ma sa.

¹⁴ Bari cɛɛw tun bɛ mɔgɔ waa duuru bɔ. Yezu y'a fɔ a ka kalandenw ye k'u k'a fɔ mɔgɔw ye k'u ka sigi jɛnkulu jɛnkulu, mɔgɔ bi duduuru.

¹⁵ Kalandenw y'a kɛ ka kɛnyɛ n'a ka kuma fɔli ye, jama bɛɛ sigira.

¹⁶ Yezu ye burukun duuru ni jigɛ fila nunu ta, k'a nyaa kɔrɔ ta sanfɛ ka barika la Ala ye k'u tilantilan k'u di a ka kalandenw ma k'u k'o tilan mɔgɔw cɛ.

¹⁷ U bɛɛ ye dumuni kɛ ka fa. Dumuni tɔɔ min tora, u y'o cɛ ka segi tan ni fila fa n'a ye.

Piyɛri b'a fɔ ko Yezu ye Krista ye

¹⁸ Loon dɔ, ka Yezu to Ala dali la a kelen, a ka kalandenw tun b'a gɛrɛfɛ. A tilara tuma min na, a y'u nyininga ko: “Mɔgɔw b'a fɔra ko ne ye jon ye?”

¹⁹ U y'a jaabi ko: “Dɔw ko i ye Zan batizelikɛla ye. Dɔw ko i ye Eli ye. Dɔw fana ko i ye kirakɔrɔw dɔ ye min kununna.”

²⁰ Yezu ko: “Aw ka miiri la do, ne ye jon ye?” Piyɛri y'a jaabi ko: “I ye Ala ka Mɔgɔwolomanin nin ye.”

²¹ Yezu y'a fɔ k'a gwɛlɛya u ma k'u kana o fɔ mɔgɔ si ye.

Yezu b'a ka saya n'a kununni koo fɔ

²² A y'a fɔ u ye tugu ko: “Mɔgɔ Dencɛ ka kan ka tɔɔrɔ kosɛbɛ. Cɛkɔrɔbaw ni sarakalasebagaw ani sariya karamɔgɔw bɛna ban a la. U bɛn'a faga, nga tile saba a faganin kɔ, a bɛna kunun.”

²³ O kɔ, a y'a fɔ jama ye ko: “Ni mɔgɔ min b'a fɛ ka tugu ne kɔ, o tigi kana miiri a yɛrɛ ka nafa koo la. A ka tɔɔrɔ bɛɛ munyu ne kɔsɔn loon o loon ka tugu ne kɔ.

²⁴ Mɔgɔ o mɔgɔ b'a ka dinyɛlatigɛ nyako dɔrɔn fɛ, o tigi tɛna sini hɛrɛ sɔrɔ. Nga ni mɔgɔ min ka dinyɛlatigɛ cɛnna ne kɔsɔn, o tigi nii bɛna kisi.

²⁵ A bɛ mun nya mɔgɔ ye ka dinyɛ kɔnɔ fɛɛn bɛɛ sɔrɔ n'o tigi bɛna bɔnɔ a nii la walima n'a yɛrɛ bɛna halaki?

²⁶ Ni mɔgɔ min maloyara, a ma sɔn ne ni n ka kuma ma, Mɔgɔ Dencɛ mana segi tuma min na n'a ka nɔɔrɔ ye, n'a Faa ta, ani mɛlɛkɛ senumanw ta ye, a fana tɛna sɔn o tigi ma.

²⁷ Tinyɛ na, ne b'a fɔ aw ye ko mɔgɔ minw bɛ yan, u dɔw tɛna sa ni u ma Ala ka sebagaya ye.”

Yezu ka nɔɔrɔ bɛ yira a ka kalandenw na

²⁸ Tile seegi nyɔgɔn o kuma nunu fɔnin kɔ, Yezu taara ni Piyɛri ni Zan ani Zaki ye kulu jamanjan dɔ kan ka Ala dali.

²⁹ Ka Yezu to dalili la, a nyada yɛlɛmana, a ka fani gwɛra fɔɔ a bɛ manamana.

³⁰ O yɔrɔnin bɛ, cɛɛ fila dɔ lɔra n'u bɛ kumana Yezu fɛ. Olu tun ye Musa ni Eli ye.

³¹ Nɔɔrɔ tun b'u la. Yezu bɛna taa Zeruzalɛmu ka sa cogo min na k'a ka baara dafa, u tun b'o kuma le la.

³² Sinɔgɔ tun bɛ Piyɛri n'a tɔnyɔgɔnw na, u sinɔgɔra, u nana kunun tuma min na, u ye Yezu ka Alaya nɔɔrɔ ye, ani cɛɛ fila nunu a gɛrɛfɛ.

³³ Cɛɛ fila nunu taatɔ ka bɔ Yezu kɔrɔ, Piyɛri y'a fɔ a ye ko: “Matigi, a ka nyi an ka to yan. Anw bɛ bugu saba lɔ, e ta kelen, Musa ta kelen, Eli ta kelen.” Piyɛri tun bɛ min fɔra, a tun m'a lɔn.

³⁴ Ka Piyɛri to o kuma na, sankaba dɔ jigira k'u datugu. Kalanden saba nunu y'o ye minkɛ, u siranna.

³⁵ Kumakan dɔ bɔra o sankaba la k'a fɔ ko: “Nin ye ne Dencɛ ye ne ye min ci aw ma, aw k'a lamɛn.”

³⁶ Kumakan nin bɔ tuma na, kalandenw ma mɔgɔ si ye tugu Yezu kelen kɔ. Olu ye min ye, u y'o mara u kɔnɔ, u m'o lakali mɔgɔ si ye o waati la.

Yezu bɛ jina gwɛn ka bɔ deen dɔ la

³⁷ O dugusagwɛ, u jigitɔ ka bɔ kulu nin kan, jamaba dɔ taara Yezu kunbɛn.

³⁸ Cɛɛ dɔ tora jama cɛma ka pɛrɛn ko: “Karamɔgɔ, ne b'i dali, i ka n dencɛ cogoya filɛ, bari ale dama le ye n dencɛ ye.

³⁹ Jina dɔ bɛ to ka wili a fɛ, n'a wilila a kama, a bɛ bari ka kule, a b'a yuguyugu kosɛbɛ fɔɔ a daa bɛ kanga. A b'a tɔɔrɔ kosɛbɛ, a tɛ bɔ a la joona.

⁴⁰ Ne y'i ka kalandenw dali ko u k'a gwɛn ka bɔ a la, nga u ma se.”

⁴¹ Yezu y'a fɔ ko: “Aw bii mɔgɔw kɔni, aw ka jugu, aw tɛ la Ala la. Ne bɛna to n'aw ye k'aw ka koo munyu fɔɔ tuma jumɛn?” A y'a fɔ deen faa ye ko: “Na n'i dencɛ ye yan.”

⁴² Deen gwɛrɛtɔ, jina y'a ta k'a ben duguma k'a yuguyugu kosɛbɛ. Nga Yezu jamana jina kunna k'a gwɛn. Deen kɛnɛyara, a y'a d'a faa ma.

⁴³ Mɔgɔw bɛɛ kabakoyara Ala ka sebagaya nin kɔsɔn. Yezu ka kokɛninw bɛɛ tun bɛ mɔgɔw kabakoya minkɛ, a y'a fɔ a ka kalandenw ye ko:

Yezu b'a ka saya n'a kununko fɔ tugu

⁴⁴ “N bɛna kuma min fɔ sisan, aw k'o lamɛn ka nya: U bɛna Mɔgɔ Dencɛ don mɔgɔjuguw bolo.”

⁴⁵ Nga olu m'o kuma faamu, a kɔrɔ dogonin tora u ma ten. U tun bɛ siran k'a nyininga o kuma kɔrɔ la.

Jon le ye nyamɔgɔ ye?

⁴⁶ Kalandenw bɛɛ tun bɛ miiri ko jon le bɛna kɛ nyamɔgɔ ye.

⁴⁷ Yezu y'u ka miiriya lɔn minkɛ, a ye denmisɛn dɔ ta k'a lɔ a gɛrɛfɛ.

⁴⁸ A y'a fɔ u ye ko: “Mɔgɔ o mɔgɔ mana nin denmisɛn nyɔgɔn minɛ ka nya ne kɔsɔn, o tigi bɛ ne le minɛ ka nya. Mɔgɔ min bɛ ne minɛ ka nya, o tigi bɛ ne cibaga le minɛ ka nya. Aw tɛ mɔgɔ min jati aw cɛma, o tigi le ye nyamɔgɔ ye.”

Mɔgɔ min tɛ an jugu ye, o ye an nyiin ye

⁴⁹ Zan ye kuma ta k'a fɔ Yezu ye ko: “Karamɔgɔ, an ye cɛɛ dɔ ye min bɛ jinaw gwɛn ka bɔ mɔgɔw la n'i tɔgɔ ye. An tun b'a fɛ k'a bali, bari an dɔ tɛ.”

⁵⁰ Yezu y'a jaabi ko: “Aw kan'a bali, bari mɔgɔ min tɛ aw jugu ye, o ye aw nyiin ye.”

Samari mara dugu dɔ mɔgɔw bɛ ban ka Yezu ladon

⁵¹ Yezu tun ka kan ka bɔ dinyɛ na ka ta'a Faa fɛ waati min na, o tuma surunyana minkɛ, a y'a ;naniya ko a bɛ taa Zeruzalɛmu.

⁵² O la, a ye cidenw bila ka ta'a yɛrɛ nya. Olu taara don Samari mara dugu dɔ kɔnɔ ka jatigiso nyini Yezu ye.

⁵³ Nga o dugu mɔgɔw ma sɔn ka Yezu ladon, bari a tun bɛ taara Zeruzalɛmu.

⁵⁴ A ka kalanden dɔw Zaki ni Zan y'o mɛn minkɛ, u y'a fɔ Yezu ye ko: “Matigi, i b'a fɛ an b'a kɛ tasuma bɛ jigi ka bɔ sankolo la k'u halaki wa?”

⁵⁵ Yezu y'a nyaa yɛlɛma k'u sɔngɔ kosɛbɛ.

⁵⁶ O kɔ, u tɛmɛna ka taa dugu wɛrɛ la.

Mɔgɔ dɔw b'a fɛ ka tugu Yezu kɔ

⁵⁷ K'u to sira kan, cɛɛ dɔ y'a fɔ Yezu ye ko: “I mana taa yɔrɔ o yɔrɔ, ne bɛna tugu i kɔ.”

⁵⁸ Yezu y'a jaabi ko: “Dingɛ bɛ kongo wuluw fɛ, nyaga bɛ kɔnɔw fɛ, nga layɔrɔ tɛ Mɔgɔ Dencɛ tɔgɔ la.”

⁵⁹ Yezu fana y'a fɔ cɛɛ dɔ ye ko: “Tugu ne kɔ.” Nga o cɛɛ ko: “Matigi, a to ne bɛ taa n facɛ suu don fɔlɔ.”

⁶⁰ Yezu y'a jaabi ko: “Minw tora soo, a to olu ka u ka suuw don. E kɔni, e ka ta'a wango la ko Ala ye masa ye.”

⁶¹ Cɛɛ wɛrɛ y'a fɔ Yezu ye ko: “Ne bɛna tugu i kɔ, Matigi. Nga i b'a to ne bɛ ta'a sara n ka somɔgɔw la fɔlɔ.”

⁶² Yezu y'a jaabi ko: “Mɔgɔ o mɔgɔ bɛ misidaba minɛ ko a bɛ sɛnɛ kɛ, n'a bɛ filɛli kɛ a kɔfɛ, o tigi man kan ni Ala ka baara ye.”