Luka 4 - LAYIDUKURA

Sutana bɛ Yezu nigɛ ka dɛsɛ

¹ Nii Senuman tora Yezu fɛ. A bɔra Zurudɛn baa daa la ka taa kongo kɔnɔ. Nii Senuman tun b'a taayɔrɔ yira a la.

² Sutana y'a nigɛ yen ka dɛsɛ tile bi naani kɔnɔ. A ma dumuni si kɛ o tile bi naani kɔnɔ. O loonw tɛmɛnin kɔ, kɔngɔ y'a minɛ.

³ O tuma na, Sutana y'a fɔ a ye ko: “N'i ye Ala Dencɛ ye, a fɔ ko kabakuru nin ka yɛlɛma ka kɛ buru ye.”

⁴ Yezu y'a jaabi ko: “A fɔra Ala ka kuma na ko: ‘Dumunifɛn dɔrɔn tɛ se ka mɔgɔ balo.’ ”

⁵ O kɔ, Sutana taara n'a ye kulu jamanjan dɔ kan ka jamanaw bɛɛ yira a la yɔrɔnin kelen na,

⁶ k'a fɔ a ye ko: “Ne bɛna nin bɛɛ ka kuntigiya n'a ka nafolo d'i ma. Ni ne b'a fɛ k'a di mɔgɔ min na, ne b'a di o tigi ma, bari a bɛɛ ye ne ta ye.

⁷ O la, ni e kɔni y'i kunbiri gwan ne kɔrɔ ka ne bato, a bɛɛ bɛna kɛ i ta ye.”

⁸ Yezu y'a jaabi ko: “A fɔra Ala ka kuma na ko: ‘I k'i Matigi Ala bato, k'a kelenpe sago kɛ.’ ”

⁹ A laban na, Sutana taara n'a ye Zeruzalɛmu Alabatosoba kuun na, k'a fɔ a ye ko: “N'i ye Ala Dencɛ ye, pan ka cun duguma,

¹⁰ bari a fɔra Ala ka kuma na ko: ‘Ala bɛn'a fɔ a ka mɛlɛkɛw ye ko u k'i tanga kojugu ma.’

¹¹ A fɔra yen fana ko: ‘U bɛna i ta u bolo la waasa i seen kana gosi kabakuru la.’ ”

¹² Yezu y'a jaabi ko: “A fɔra Ala ka kuma na fana ko: ‘I kana i Matigi Ala kɔrɔbɔ.’ ”

¹³ Sutana y'a nigɛ cogo bɛɛ la ka dɛsɛ tuma min na, a taara k'a to yen fɔlɔ.

Yezu b'a ka baara daminɛ Galile mara la

¹⁴ Yezu segira ka taa Galile mara la ni Nii Senuman ka sebagaya ye. A tɔgɔ bɔra o mara yɔrɔ bɛɛ la.

¹⁵ A tun bɛ mɔgɔw kalan Alabatosow kɔnɔ, mɔgɔw bɛɛ tun b'a bonya.

Yezu ka dugu mɔgɔw tɛ la a la

¹⁶ Yezu taara Nazarɛti a mɔna o dugu min na. Lafinyɛlon, a donna Alabatoso kɔnɔ i n'a fɔ a tun bɛ to k'a kɛ cogo min na. A wilila waasa ka kitabu kalan.

¹⁷ Kira Ezayi ye kitabu min sɛbɛn, o dira a ma. A y'o dayɛlɛ ka yɔrɔ dɔ kalan. A sɛbɛnnin b'o yɔrɔ la ko:

¹⁸ “Matigi Ala Nii bɛ ne fɛ, bari a ye ne woloma ka kibaru diman fɔ faantanw ye. A ye ne ci ko n k'a fɔ jɔɔnw ye ko u bɛna hɔrɔnya, ko n k'a fɔ finyɛntɔw ye k'u nyaa bɛna yɛlɛ, ko n ka mɔgɔtɔɔrɔninw bɔ u juguw bolo k'u bila,

¹⁹ Matigi bɛn'a ka nyumanya kɛ saan min na, ko n k'o koo fɔ mɔgɔw ye.”

²⁰ O kɔ, a ye kitabu datugu k'a di Alabatoso kɔlɔsibaga ma ka sigi. Mɔgɔ minw tun bɛ yen, u bɛɛ y'u nyaa basa Yezu la.

²¹ O tuma na, a ye kuma ta k'a fɔ u ye ko: “Aw ye kitabu nin kɔnɔnakuma minw mɛn sisan, o koow kɛra ka dafa bii.”

²² U bɛɛ tun b'a tɔgɔnyuman fɔ. Yezu ka kumanyuman ye u bɛɛ kabakoya, fɔɔ u tun b'a fɔ ko: “Nin tɛ Yusufu dencɛ ye wa?”

²³ Yezu y'a fɔ u ye ko: “Siga t'a la, aw bɛna talen nin la ne ye ko: ‘Furakɛla, i yɛrɛ kɛnɛya sa.’ Aw bɛna a fɔ ne ye fana ko: ‘I ye koo minw bɛɛ kɛ Kafaranamu, an y'o mɛn, i k'o nyɔgɔnw kɛ yan fana i yɛrɛ ka dugu la.’

²⁴ “Tinyɛ na, ne b'a fɔ aw ye ko kira si tɛ bonya sɔrɔ a yɛrɛ ka dugu la.”

²⁵ O kɔ, a y'a fɔ u ye ko: “Ne b'a fɔ aw ye ko kira Eli ka tile la, sanji banna ka na saan saba ni tilan kɔnɔ, tuma min na kɔngɔba tun donna jamana yɔrɔ bɛɛ la. Firiyamuso caaman tun bɛ Isirayɛli jamana na,

²⁶ nga Ala ma kira Eli ci u si fɛ. A y'a ci firiyamuso dɔ fɛ Sarɛpita, Sidɔn mara la.

²⁷ Kunatɔ caaman tun bɛ Isirayɛli, kira Elize ka tile la fana, nga u si ma kɛnɛya, fɔɔ kunatɔ Naman, ka bɔ Siri jamana na.”

²⁸ Alabatoso kɔnɔ mɔgɔw y'o kuma nunu mɛn tuma min na, u dimina kosɛbɛ.

²⁹ U wilila ka Yezu minɛ ka bɔ n'a ye dugu kɔnɔ ni fanga ye. U ka dugu siginin tun bɛ kulu min gɛrɛn na, u taara n'a ye o kunna. U tun b'a fɛ k'a nyɔnti ka ben fɔɔ duguma.

³⁰ Nga Yezu kɔni tɛmɛna u furancɛ la ka taa.

Yezu bɛ jinatɔ dɔ kɛnɛya

³¹ Yezu taara Galile mara dugu dɔ la, min tɔgɔ ko Kafaranamu. A tun bɛ mɔgɔw kalanna lafinyɛlon na yen.

³² U kabakoyara a ka mɔgɔ kalan cogo la, bari a tun bɛ kuma i n'a fɔ fanga bɛ mɔgɔ min bolo.

³³ Cɛɛ jinatɔ dɔ tun bɛ u fɛ Alabatoso kɔnɔ. O cɛɛ nin pɛrɛnna kosɛbɛ ko:

³⁴ “E! Mun bɛ an ni e cɛ? Yezu ka bɔ Nazarɛti, i nana k'an halaki wa? I ye mɔgɔ min ye, ne b'o lɔn. I ye Ala ka ciden senuman ye.”

³⁵ Yezu jamana a kuun na k'a fɔ a ye ko: “I daje! Bɔ cɛɛ nin na.” Jina ye cɛɛ ta k'a ben duguma u cɛma ka bɔ a la. Nga foyi ma kɛ cɛɛ la.

³⁶ Mɔgɔ bɛɛ kabakoyara fɔɔ u tun bɛ nyɔgɔn nyininga ko: “Haan! Nin ye mun kuma ye? A bɛ kuma jinaw fɛ ni fanga ni setigiya ye. U bɛ bɔ mɔgɔw la fana.”

³⁷ O sababu fɛ, Yezu tɔgɔ bɔra o mara yɔrɔ bɛɛ la.

Yezu bɛ banabagatɔ caaman kɛnɛya

³⁸ Yezu bɔra Alabatoso kɔnɔ ka taa Simɔn ka soo. Simɔn biranmuso tɔɔrɔnin tun bɛ kosɛbɛ farigwan bolo. U ye Yezu dali ko a k'a kɛnɛya.

³⁹ Yezu taara biri a kunna k'a fɔ ko a ka kɛnɛya. Farigwan banna. A wilila o yɔrɔnin bɛ ka dumuni d'u ma.

⁴⁰ Tilekun donnin kɔ, mɔgɔw taara Yezu sɛgɛrɛ n'u ka banabagatɔw bɛɛ ye. A y'a bolo la u bɛɛ kelen kelen kan k'u kɛnɛya.

⁴¹ Jinaw fana bɔra mɔgɔ caaman na. U bɔtɔ, u tun bɛ pɛrɛn ko: “I ye Ala Dencɛ ye.” Nga Yezu ye kangari la u ye. A tun tɛ sɔn u ka kuma, bari olu tun b'a lɔn ko Ala ka Mɔgɔwolomanin nin lo.

Yezu cikun

⁴² Dugu gwɛra dɔrɔn, Yezu bɔra ka taa yɔrɔmalanin dɔ la. Jama y'a daminɛ k'a yɔrɔ nyini. U taar'a ye tuma min na, u y'a dali ko a ka to u kɔrɔ, ko a kana taa yɔrɔjan.

⁴³ Nga a y'a fɔ u ye ko: “Ne ka kan ka Ala ka masaya kibaru diman fɔ dugu tɔw la fana, bari ne cikun ye o le ye.”

⁴⁴ O la, a tun bɛ waajuli kɛ Alabatosow kɔnɔ Zude mara la.