Luka 3 - LAYIDUKURA

Zan batizelikɛla ka waajuli

¹ Ɔrɔmu masacɛ Tibɛri ka masaya saan tan ni duurunan na, o y'a sɔrɔ Pɔnsi Pilati tun bɛ Zude mara kuun na, Erɔdi tun bɛ Galile mara kunna, a balimacɛ Filipi tun bɛ Iture ni Tarakoniti maraw kuun na, ani Lizaniyasi tun bɛ Abilɛni mara kuun na.

² O waati kelen na, Anɛ ni Kayifu tun ye sarakalasebagaw ye. O tuma na, Ala kumana Zakari dencɛ Zan fɛ k'a to kongo kɔnɔ.

³ O la, Zan ye Zurudɛn baa dafɛ duguw bɛɛ yaala ka mɔgɔw waaju ko u ka nimisa ka faran u ka kojuguw la ka batize waasa Ala ka yafa u ma.

⁴ O kɛra i n'a fɔ kira Ezayi tun y'a sɛbɛn a ka kitabu kɔnɔ cogo min na ko: “Mɔgɔ dɔ bɛ pɛrɛnna kongo kɔnɔ ko: ‘Aw ka Matigi ka sira labɛn, k'a tilen.

⁵ Dingɛw bɛɛ bɛna fa, kuluw ni tintinw bɛɛ bɛna ci ka dakɛnyɛ. Tɛmɛyɔrɔ gɔngɔrɔninw bɛna tilen, sirajuguw bɛna dilan.

⁶ Ala bɛ adamadenw kisi cogo min na, bɛɛ bɛna o ye.’ ”

⁷ Jamaba min tun bɛ taa Zan fɛ ko a ka u batize, a tun b'a fɔ olu ye ko: “Aw fɔnfɔnnidenw, jon y'aw lasɔmi ko aw ka boli Ala ka kiti nata nya?

⁸ O tuma na, yiri minw bɛ dennyuman kɛ, aw ka kɛ i n'a fɔ olu. Aw ka kɛwalinyumanw kɛ k'a yira ko aw nimisara ka faran aw ka kojuguw la. Aw kan'a fɔ aw yɛrɛ kɔnɔ ko Ala bɛna aw kisi bari Ibrayima ye aw faa ye. Ne b'a fɔ aw ye ko Ala bɛ se ka kabakuru nunu yɛlɛma k'u kɛ Ibrayima deenw ye.

⁹ Jende labɛnna ka ban yiriw tigɛli kama. Yiri o yiri tɛ dennyuman kɛ, o bɛɛ bɛna tigɛ ka fili tasuma na.”

¹⁰ Jama tun b'a nyininga ko: “O tuma na, an ka kan ka mun kɛ?”

¹¹ A tun b'u jaabi ko: “Ni duloki fila bɛ mɔgɔ min fɛ, duloki tɛ min fɛ, a ka kelen di o ma. Ni dumunifɛn bɛ mɔgɔ min fɛ, a k'o tilan ni kɔngɔtɔ ye.”

¹² Wusuruminɛla dɔw fana taara Zan fɛ ko a k'u batize. Olu y'a nyininga ko: “Karamɔgɔ, anw ka kan ka mun kɛ?”

¹³ A y'u jaabi ko: “Wari hakɛ min fɔra aw ye, aw k'o dama minɛ, aw kana dɔ wɛrɛ minɛ ka fara o kan.”

¹⁴ Sɔlidasi dɔw fana y'a nyininga ko: “Anw do, anw ka kan ka mun kɛ?” A y'u jaabi ko: “Aw kana mɔgɔ si ka wari minɛ ni fanga ye, aw kana mɔgɔ si tɔnyɔ fana, nga aw ka sara ka aw wasa.”

¹⁵ Mɔgɔw tun b'u kisibaga nali makɔnɔna minkɛ, u bɛɛ tun b'u yɛrɛ nyiningana yala ni Zan le tɛ Ala ka Mɔgɔwolomanin nin ye fewu.

¹⁶ O la, Zan y'a fɔ u bɛɛ ye ko: “Ne b'aw batize ni jii ye, nga min bɛna na ne kɔ, o ka sebagaya ka bon ni ne ta ye. K'a ka sanbara juru foni, ne kuun ka dɔgɔ o ma. Ale bɛna aw batize ni Nii Senuman ni tasuma ye.

¹⁷ A ka sumanfiyɛminan b'a bolo. A bɛn'a ka suman gosinin fiyɛ k'a kisɛ don a ka bondo kɔnɔ k'a nyaga jɛni tasuma fagabali la.”

¹⁸ Zan tun bɛ mɔgɔw ladi n'o kuma nyɔgɔn caaman ye. O cogo la, a tun bɛ kibaru diman fɔ mɔgɔw ye.

¹⁹ Nga Zan ye Zude mara kuntigi Erɔdi kɔrɔfɔ, bari a tun y'a balimacɛ muso Erodiyadi bɔsi a la k'a kɛ a yɛrɛ ta ye, ani a tun ye kojugu wɛrɛw kɛ fana.

²⁰ A m'a dan olu ma, a ye Zan yɛrɛ minɛ k'a don kaso la.

Yezu batizeli koo

²¹ Zan ye mɔgɔw bɛɛ batize, ka Yezu fana batize. Ka Yezu to Ala dali la, sankolo dayɛlɛla,

²² Nii Senuman y'a yɛrɛ kɛ i n'a fɔ jɛnɛtugan, ka jigi a kan. Kumakan dɔ bɔra sankolo la k'a fɔ ko: “I ye ne Dencɛ ye, ne le y'i Faa ye.”

Yezu Krista buruju bɔra mɔgɔ minw na

²³ Yezu y'a ka baara daminɛ tuma min na, a sii tun bɛ saan bi saba nyɔgɔn bɔ. Mɔgɔw tun bɛ miiri ko Yezu ye Yusufu deen ye. Yusufu tun ye Eli ka deen ye.

²⁴ Eli tun ye Matati ka deen ye, Matati fana tun ye Levi ka deen ye, Levi fana tun ye Mɛliki ka deen ye, Mɛliki fana tun ye Zannayi ka deen ye, Zannayi fana tun ye Yusufu ka deen ye.

²⁵ Yusufu fana tun ye Matatiyasi ka deen ye, Matatiyasi fana tun ye Amɔsi ka deen ye, Amɔsi fana tun ye Nahumu ka deen ye, Nahumu fana tun ye Ɛsili ka deen ye, Ɛsili fana tun ye Nagayi ka deen ye.

²⁶ Nagayi fana tun ye Maati ka deen ye, Maati fana tun ye Matatiyasi ka deen ye, Matatiyasi fana tun ye Semeyini ka deen ye, Semeyini fana tun ye Zozɛki ka deen ye, Zozɛki fana tun ye Zoda ka deen ye.

²⁷ Zoda fana tun ye Zowanan ka deen ye, Zowanan fana tun ye Ereza ka deen ye, Ereza fana tun ye Zorobabɛli ka deen ye, Zorobabɛli fana tun ye Salatiyɛli ka deen ye, Salatiyɛli fana tun ye Neri ka deen ye.

²⁸ Neri fana tun ye Mɛliki ka deen ye, Mɛliki fana tun ye Adi ka deen ye, Adi fana tun ye Kozamu ka deen ye, Kozamu fana tun ye Ɛlimadan ka deen ye, Ɛlimadan fana tun ye Ɛri ka deen ye.

²⁹ Ɛri fana tun ye Zozuwe ka deen ye, Zozuwe fana tun ye Eliyezɛri ka deen ye, Eliyezɛri fana tun ye Zorimu ka deen ye, Zorimu fana tun ye Matati ka deen ye, Matati fana tun ye Levi ka deen ye.

³⁰ Levi fana tun ye Simiyɔn ka deen ye, Simiyɔn fana tun ye Zuda ka deen ye, Zuda fana tun ye Yusufu ka deen ye, Yusufu fana tun ye Zonamu ka deen ye, Zonamu fana tun ye Eliyakimu ka deen ye.

³¹ Eliyakimu fana tun ye Meleya ka deen ye, Meleya fana tun ye Mɛnna ka deen ye, Mɛnna fana tun ye Matata ka deen ye, Matata fana tun ye Natan ka deen ye, Natan fana tun ye Dawuda ka deen ye.

³² Dawuda fana tun ye Zese ka deen ye, Zese fana tun ye Zobɛdi ka deen ye, Zobɛdi fana tun ye Boozi ka deen ye, Boozi fana tun ye Sala ka deen ye, Sala fana tun ye Naasɔn ka deen ye.

³³ Naasɔn fana tun ye Aminadabu ka deen ye, Aminadabu fana tun ye Adimɛn ka deen ye, Adimɛn fana tun ye Aramu ka deen ye, Aramu fana tun ye Ɛsirɔn ka deen ye, Ɛsirɔn fana tun ye Perɛsi ka deen ye, Perɛsi fana tun ye Zuda ka deen ye.

³⁴ Zuda fana tun ye Yakuba ka deen ye, Yakuba fana tun ye Isiyaka ka deen ye, Isiyaka fana tun ye Ibrayima ka deen ye, Ibrayima fana tun ye Tera ka deen ye, Tera fana tun ye Nawɔri ka deen ye.

³⁵ Nawɔri fana tun ye Serugi ka deen ye, Serugi fana tun ye Arago ka deen ye, Arago fana tun ye Falɛki ka deen ye, Falɛki fana tun ye Ebɛri ka deen ye, Ebɛri fana tun ye Sala ka deen ye.

³⁶ Sala fana tun ye Kayinan ka deen ye, Kayinan fana tun ye Aripakisadi ka deen ye, Aripakisadi fana tun ye Sɛmu ka deen ye, Sɛmu fana tun ye Nuhun ka deen ye, Nuhun fana tun ye Lamɛki ka deen ye.

³⁷ Lamɛki fana tun ye Matusala ka deen ye, Matusala fana tun ye Enɔki ka deen ye, Enɔki fana tun ye Yerɛdi ka deen ye, Yerɛdi fana tun ye Maleleyɛli ka deen ye, Maleleyɛli fana tun ye Kayinan ka deen ye.

³⁸ Kayinan fana tun ye Enɔsi ka deen ye, Enɔsi fana tun ye Sɛti ka deen ye, Sɛti fana tun ye Adama ka deen ye, Adama fana tun ye Ala ka deen ye. Ala tun ye Adama dan.