Luka 23 - LAYIDUKURA

U bɛ taa ni Yezu ye Pilati fɛ

¹ O tuma na, kititigɛlaw bɛɛ sinna ka wili ka taa ni Yezu ye Pilati fɛ.

² U y'a daminɛ ka Yezu jalaki ko: “An y'a ye ko cɛɛ nin b'an ka siya kuun cɛnna. A b'u bali ka nisɔngɔ sara Ɔrɔmu masacɛ ye. A ko ale ye Ala ka Mɔgɔwolomanin nin ye, o kɔrɔ ko ale ye masa ye.”

³ Pilati y'a nyininga ko: “I ye Zuwifuw ka masa ye wa?” Yezu y'a jaabi ko: “E ko ten.”

⁴ Pilati y'a fɔ sarakalasebagaw ni jama ye ko: “Ne ma kuun ye cɛɛ nin bɛ se ka jalaki min na.”

⁵ Nga u segira k'a fɔ ko: “A bɛ mɔgɔw kalan an ka jamana yɔrɔ bɛɛ la. O le b'a to mɔgɔw bɛ muruti. A y'a daminɛ Galile mara la fɔɔ ka na se yan Zude mara la.”

Pilati bɛ Yezu ci Erɔdi ma

⁶ Pilati ye Galile tɔgɔ mɛn mɔgɔw daa la minkɛ, a ye nyiningali kɛ ko yala ni Yezu ye Galileka ye.

⁷ A y'a lɔn ko Yezu bɔra Erɔdi ka mara la tuma min na, a y'a fɔ u ye k'u ka taa n'a ye Erɔdi fɛ, bari Erɔdi fana tun bɛ Zeruzalɛmu o loon nin na.

⁸ Erɔdi ye Yezu ye minkɛ, o diyara a ye kosɛbɛ. A tun b'a fɛ ka Yezu ye kabini tumajan bari a tun y'a ka koo mɛn. A tun bɛ miiri fana ko Yezu bɛna kabako dɔ kɛ ale nyana.

⁹ A ye Yezu nyininga koo caaman na, nga Yezu m'a jaabi.

¹⁰ Sarakalasebagaw ni sariya karamɔgɔw tun bɛ yen. U tun b'a la ka kumajugu fɔ waasa k'a ka koo juguya.

¹¹ Erɔdi n'a ka sɔlidasiw ye Yezu lɔgɔbɔ kosɛbɛ ka dulokinyuman dɔ don a kaan na. O kɛnin kɔ, a y'u bila ka segi ni Yezu ye Pilati fɛ.

¹² O loon nin na, Pilati ni Erɔdi kɛra teriw ye k'a sɔrɔ u tun ye nyɔgɔn juguw ye fɔlɔ la.

Yezu ka kiti laban

¹³ Pilati ye sarakalasebagaw, ni Zuwifuw ka kuntigiw ani jama wele

¹⁴ k'a fɔ u ye ko: “Aw le nana ni cɛɛ nin ye k'a fɔ ne ye ko a bɛ mɔgɔw kuun cɛn. Ayiwa, ne y'a nyininga aw nyana. Aw ye koo minw fɔ k'olu y'a jalakikun ye, ne y'a ye ko a jalaki tɛ u si la.

¹⁵ Erɔdi fana m'a jalakikun ye, bari a segira k'a bila ka na anw fɛ. O la, ne ma koo si ye cɛɛ nin ka kan ka faga min kama.

¹⁶ O la, ne bɛn'a to u b'a bugɔ ni golokami ye. O kɔ, ne bɛn'a bila ka taa.” [

¹⁷ Saan o saan, Hɔrɔnya nyanagwɛ tuma, Pilati tun ka kan ka kasoden dɔ labila.]

¹⁸ U bɛɛ pɛrɛnna ko: “Cɛɛ nin faga, ka Barabasi labila.”

¹⁹ Barabasi tun donna kaso la murutili ni mɔgɔfaga kɔsɔn. O murutili tun kɛra dugu kɔnɔ.

²⁰ Pilati tun b'a fɛ ka Yezu bila minkɛ, a kumana jama fɛ tugu.

²¹ Nga u pɛrɛnna ko: “A gwengwen lɔgɔ kan. A gwengwen lɔgɔ kan.”

²² Pilati kumana u fɛ a sinyɛ sabanan na ko: “A ye kojugu jumɛn kɛ? A ye koo min kɛ n'o b'a fagakun bɔ, ne m'o ye. O la, ne bɛn'a to u b'a bugɔ ni golokami ye. O kɔ, ne bɛn'a to a bɛ taa.”

²³ Nga u tora ka pɛrɛn ko fɔɔ Pilati ka Yezu gwengwen lɔgɔ kan. U ka mankan bonyana fɔɔ ka see sɔrɔ.

²⁴ O tuma na, Pilati y'a fɔ ko u ye min dali, k'o bɛna kɛ u ye.

²⁵ Barabasi min tun donna kaso la murutili ni mɔgɔfaga kɔsɔn, a y'ale labila i n'a fɔ u y'a nyini cogo min na. Nga a ye Yezu don u bolo waasa u k'u sago kɛ a la.

Yezu ka gwengwenko

²⁶ U taatɔ ni Yezu ye, u ye cɛɛ dɔ kunbɛn min tun bɛ bɔra a ka foro la. Sirɛnika tun lo, a tɔgɔ tun ko Simɔn. U y'ale karaba ko a ka Yezu ka gwengwenlɔgɔ nyun ka tugu a kɔ.

²⁷ Jamaba tugunin tun bɛ Yezu nɔɔ fɛ. Muso caaman nyaa sisinin tun bɛ, ani u tun bɛ kasira Yezu ka tɔɔrɔ kɔsɔn.

²⁸ Nga Yezu y'a nyaa yɛlɛma k'a fɔ u ye ko: “Zeruzalɛmu musow, aw kana kasi ne kɔsɔn. Aw ye kasi aw yɛrɛw n'aw ka deenw kɔsɔn,

²⁹ bari loon dɔ bɛna se, mɔgɔw bɛn'a fɔ ko: ‘Muso minw ma deen sɔrɔ ka ye, ni minw tɛ se ka deen sɔrɔ, ani minw ma siin di deen ma ka ye, olu ye dubadenw ye.’

³⁰ O tuma na, mɔgɔw bɛn'a daminɛ k'a fɔ kuluw ye ko: ‘Aw ka ben an kan.’ U bɛn'a fɔ tintinw ye ko: ‘Aw k'an sutara.’

³¹ Ne bɛ kuma ten bari aw yɛrɛ y'a ye u bɛ nin kɛra yirikɛnɛ na, yiri jalan ta bɛna kɛ cogo di?”

³² U tun bɛ taara ni kojugukɛla fila fana ye k'olu ni Yezu faga nyɔgɔn fɛ.

³³ U taara se kulunin dɔ kan, u b'o min wele ko Kungolokolo. U ye Yezu gwengwen lɔgɔ kan yen, ka kojugukɛla fila nunu fana gwengwen lɔgɔ dɔw kan, kelen a kinibolo fɛ, kelen a numanbolo fɛ.

³⁴ Nga Yezu y'a fɔ ko: “N Faa, yafa u ma bari u bɛ min kɛra u m'o lɔn.” U ye kala bon ka Yezu ka faniw tilantilan nyɔgɔn cɛ ka kɛnyɛ n'o ye.

³⁵ Mɔgɔw bɛɛ tun lɔra n'u bɛ filɛli kɛ. Zuwifuw ka kuntigiw kɔni tun bɛ yɛlɛla Yezu ma. U ko: “A ye mɔgɔ wɛrɛw kisi, a k'a yɛrɛ kisi sa. N'a ye Ala ka Mɔgɔwolomanin nin ye tigitigi, a k'a yɛrɛ kisi.”

³⁶ Sɔlidasiw fana tun bɛ yɛlɛla a ma. U gwɛrɛla a la k'u bɛ kumuji d'a ma.

³⁷ U y'a fɔ ko: “N'i ye Zuwifuw ka masa ye, i yɛrɛ kisi.”

³⁸ U y'a sɛbɛn fɛɛn dɔ kan k'a dulon gwengwenlɔgɔ la Yezu kunna ko: “Nin ye Zuwifuw ka masa ye.”

³⁹ Kojugukɛla minw tun gwengwenna fana, olu kelen tun b'a nɛnina ko: “I tɛ Ala ka Mɔgɔ wolomanin nin ye wa? I yɛrɛ kisi k'an fana kisi kɛ!”

⁴⁰ Nga kojugukɛla tɔ kelen nin ye dɔ nin sɔngɔ ko: “E min b'o tɔɔrɔ nyɔgɔn na, i tɛ siran Ala nya!

⁴¹ An kɔni ka kan ni tɔɔrɔ nin ye bari an ye kojugu kɛ, nga ale ma kojugu si kɛ.”

⁴² O kɔ, a y'a fɔ Yezu ye ko: “Matigi, n'i nana sigi i ka masaya la tuma min na, i k'i hakili to ne la.”

⁴³ Yezu y'a jaabi ko: “Tinyɛ na, ne b'a fɔ i ye, i bɛna kɛ ne fɛ arijana na bii yɛrɛ.”

Yezu ka sayako

⁴⁴ Tilegwangwanfɛ, dibi donna yɔrɔ bɛɛ fɔɔ ka lɛrɛ saba kɛ.

⁴⁵ Alabatosoba cɛtigɛ fani faranna fila ye.

⁴⁶ Yezu pɛrɛnna kosɛbɛ ko: “N Faa, ne bɛ ne nii kalifa i ma.” A y'o fɔ ka ban tuma min na, a nii bɔra.

⁴⁷ Sɔlidasi kɛmɛ kuntigi ye koo nunu bɛɛ ye ten, a ye Ala bonya k'a fɔ ko: “Siga t'a la, cɛɛ nin tun ye mɔgɔnyuman ye.”

⁴⁸ O koo minw tun kɛra, mɔgɔ minw tun taara olu filɛ, u kɔsegitɔ tun b'u kuun firinfirin dɔrɔn.

⁴⁹ Yezu lɔnbagaw bɛɛ lɔnin tun bɛ yɔrɔjan k'o koow filɛ. Muso minw tun tugura Yezu kɔ ka bɔ Galile mara la, olu fana tun b'u cɛma.

Yezu suu donko

⁵⁰ Cɛɛ dɔ fana tun bɛ yen, a tɔgɔ ko Yusufu, Zuwifuw ka kititigɛlaw dɔ tun lo. Mɔgɔnyuman tun lo, a tun tɛ sɔn ka mɔgɔ tɔnyɔ.

⁵¹ A tun ma sɔn a tɔnyɔgɔnw ka koo latigɛli ani u ka kɛtaw ma. A tun bɔra Zuwifu dugu dɔ la min tɔgɔ ko Arimate. A tun bɛ Ala ka masaya waati kɔnɔna.

⁵² A taara Pilati sɛgɛrɛ ka Yezu suu dali a fɛ.

⁵³ O kɔ, Yusufu taara Yezu suu bɔ lɔgɔ la, k'a kasange ni bagi gwɛman ye, k'a don kaburu dɔ kɔnɔ. O kaburu soginin tun bɛ fara la. Mɔgɔ si suu tun ma don yen fɔlɔ.

⁵⁴ Jumalon tun lo. Lafinyɛlon tun bɛ nyini ka daminɛ.

⁵⁵ Muso minw tun tugura Yezu kɔ ka bɔ Galile mara la, olu taara ni Yusufu ye Yezu suu don yɔrɔ la. U ye kaburu nin ye ka Yezu suu don cogo bɛɛ filɛ.

⁵⁶ O kɔ, u segira ka taa dugu kɔnɔ. U ye wusulan ni tulu kasadiman labɛn. U ye lafinyɛlon labato i n'a fɔ a fɔra cogo min na Ala ka sariya la.