Luka 20 - LAYIDUKURA

Jon ye fanga di Yezu ma?

¹ Loon dɔ la, Yezu tun bɛ mɔgɔw kalanna Alabatosoba kɔnɔ ka kibaru diman fɔ u ye. Sarakalasebagaw ni sariya karamɔgɔw ani dugu cɛkɔrɔbaw taar'a sɔrɔ,

² k'a nyininga ko: “I bɛ koo minw kɛ, i y'o fanga sɔrɔ min? Jon le y'o fanga d'i ma?”

³ A y'u jaabi ko: “Ne fana bɛna aw nyininga koo kelen na.

⁴ Jon le ye Zan ci ko a ka na mɔgɔw batize, Ala lo wa, walima mɔgɔw lo?”

⁵ O tuma na, olu ye nyɔgɔn ye, k'u ka miiriyaw fɔ nyɔgɔn ye ko: “N'an y'a jaabi ko Ala lo, a bɛna an nyininga ko mun na an ma la a la.

⁶ N'an y'a fɔ ko mɔgɔw lo fana, mɔgɔw bɛna an bon ni kabakuru ye k'an faga, bari u lara a la ko Zan tun ye kira ye tigitigi.”

⁷ O bɛɛ le y'a to u ye Yezu jaabi k'u t'a lɔn.

⁸ Yezu y'a fɔ u ye ko: “Ayiwa, n'o lo, mɔgɔ min ye sira di ne ma ka koo nunu kɛ, ne fana tɛna o fɔ aw ye.”

Yezu ye talen min la sɛnɛkɛlajuguw koo la

⁹ O kɔ, Yezu y'a daminɛ ka talen nin la jama ye. A ko: “Cɛɛ dɔ ye foro bɔ ka ɛrɛzɛnyiriw tutu yen, k'a don baarakɛla dɔw bolo, ka taa mɛn jamana wɛrɛ la.

¹⁰ Ɛrɛzɛn mɔna tuma min na, a y'a ka jɔɔn dɔ ci baarakɛla nunu fɛ ko a ka taa ale niyɔrɔ minɛ. Nga baarakɛla nunu y'a minɛ k'a bugɔ k'a bolo lakolon bila ka taa.

¹¹ Forotigi ye jɔɔn wɛrɛ ci u fɛ. U y'o fana nɛni k'a bugɔ k'a bolo lakolon bila ka taa.

¹² A ye jɔɔn sabanan ci, u y'ale fana bugɔ fɔɔ k'a mandimi k'a ta k'a fili waga kɔnɔ.

¹³ Forotigi sɔrɔla k'a fɔ ko: ‘Ne bɛna mun kɛ? N dencɛ min koo ka di n ye, n bɛna o ci, n'a sɔrɔ, u bɛna ale bonya.’

¹⁴ Nga ɛrɛzɛn baarakɛlaw nyaa lara a kan tuma min na, u y'a fɔ nyɔgɔn ye ko: ‘Nin le ye cɛntala ye, an bɛn'a faga janko a faa cɛɛn ka kɛ an ta ye.’

¹⁵ U y'a minɛ ka taa n'a ye waga kɔnɔ k'a faga.” Yezu ye jama nyininga ko: “Forotigi bɛna mun kɛ u la sa?

¹⁶ A bɛna taa o baarakɛlaw faga ka dɔ wɛrɛw ta k'u bila foro kunna.” Mɔgɔw y'o mɛn tuma min na, u ko: “Ala k'an kisi o ma.”

¹⁷ Nga Yezu y'u filɛ k'a fɔ u ye ko: “Min fɔra Ala ka kuma na, o kɔrɔ bɛna kɛ mun ye sa? A ko: ‘Bonlɔlaw tun banna kabakuru min na, o le nana kɛ kabakuruw bɛɛ la nyuman ye.’

¹⁸ Ayiwa, ni mɔgɔ o mɔgɔ benna o kabakuru nin kan, o tigi kolow bɛna karikari. N'o kabakuru nin benna mɔgɔ min kan, a bɛna o tigi nyɔnyɔ.”

¹⁹ Sariya karamɔgɔw ni sarakalasebagaw tun b'a fɛ ka Yezu minɛ o waati yɛrɛ la, bari u tun y'a faamu ko Yezu ka talen nin nyaa sinnin tun bɛ olu le ma. Nga u tun bɛ siran jama nya.

Masacɛ ta ka d'a ma, Ala ta ka di Ala ma

²⁰ Sariya karamɔgɔw ni sarakalasebagaw y'a daminɛ ka Yezu kɔlɔsi kosɛbɛ. O la, u ye nafigi dɔw ci Yezu fɛ. Olu y'u yɛrɛw kɛ i n'a fɔ mɔgɔtilenninw waasa ka Yezu minɛ a yɛrɛ daa la kuma fɛ ni nyiningali dɔ ye. O cogo la, u tun b'a fɛ ka sababu dɔ sɔrɔ ka Yezu don Ɔrɔmu masacɛ ka lasigiden bolo.

²¹ Nafigi nunu taara k'a fɔ a ye ko: “Karamɔgɔ, an y'a lɔn ko i ka kuma n'i ka kalan tilennin bɛ, i tɛ mɔgɔ bɔ mɔgɔ la, Alasira ka kan ka taama cogo min na, i bɛ mɔgɔw kalan o la tinyɛ na.

²² A daganin bɛ an ka nisɔngɔ sara Ɔrɔmu masacɛ ye wa, walima a daganin tɛ?”

²³ Nga Yezu bɔra u ka nafigiya kala ma. O la, a y'a fɔ u ye ko:

²⁴ “Aw bɛ wari min kɛ ka nisɔngɔ sara, aw y'o dɔ di yan n k'a filɛ.” A ko: “Jon jaa n'a tɔgɔ le b'a kan?” U ko masacɛ.

²⁵ O tuma na, a y'a fɔ u ye ko: “Fɛɛn min ye masacɛ ta ye, o ka di masacɛ ma, ka Ala ta di Ala ma.”

²⁶ U ma se ka Yezu minɛ a yɛrɛ dalakuma dɔ fɛ jama nyana, nga a ka jaabili y'u kabakoya fɔɔ u jera.

Sadusenyɛ dɔw bɛ Yezu nyininga

²⁷ Sadusenyɛw le tun b'a fɔ ko suuw tɛna kunun. U dɔw gwɛrɛla Yezu la

²⁸ k'a nyininga ko: “Karamɔgɔ, Musa y'a fɔ an ye ko: ‘Ni mɔgɔ dɔ sara k'a ka muso to yen n'a ma deen sɔrɔ, a dɔgɔcɛ ka kan k'o muso nin ta ka deen sɔrɔ o muso ma ka kɛ a kɔrɔcɛ sii ye.’

²⁹ Ayiwa, dencɛ wolonwula tun bɛ cɛɛ dɔ fɛ. Dencɛ kɔrɔba ye muso furu. A sara n'u ma deen sɔrɔ.

³⁰ Filanan y'o muso kelen nin ta,

³¹ o kɔ, sabanan y'a ta. O cogo la, dencɛ wolonwula nunu bɛɛ sara ten, u si ma deen sɔrɔ muso nin ma.

³² A laban, muso nin fana sara.

³³ Ni suuw kununna loon min na, muso nin bɛna kɛ jon ta ye u cɛma? Bari u mɔgɔ wolonwula bɛɛ y'a furu ka ye.”

³⁴ Yezu y'u jaabi ko: “Bii bii nin na, dinyɛ kɔnɔ, mɔgɔw bɛ furu nyɔgɔn ma.

³⁵ Nga Ala ye mɔgɔ minw jati mɔgɔnyumanw ye n'a bɛna u kunun u sanin kɔ, ani ka sini hɛrɛ di u ma, olu tɛna furu nyɔgɔn ma.

³⁶ Olu tɛna sa tugu, bari u bɛna kɛ i n'a fɔ mɛlɛkɛw. Ala bɛna u jati a ka deenw ye bari a y'u kunun u sanin kɔ.

³⁷ Ayiwa, suuw bɛna kunun. Musa yɛrɛ fana tun y'o fɔ ka gwɛ tufitini yɔrɔ la. A ye Matigi wele ko Ibrayima ka Ala, ni Isiyaka ka Ala, ani Yakuba ka Ala.

³⁸ Ala tɛ suuw ka Ala ye fɔɔ nyanamanw, bari Ala fɛ, u sanin tɛ, nga u nyanaman lo.”

³⁹ Sariya karamɔgɔ dɔw y'a fɔ Yezu ye ko: “Karamɔgɔ, i ka kuma nyana.”

⁴⁰ O kɔ, mɔgɔ si m'a jaa gwɛlɛya ka Yezu nyininga foyi la tugu.

Ala ka Mɔgɔ wolomanin ni Dawuda ka koo

⁴¹ Yezu y'a fɔ u ye ko: “Mɔgɔw bɛ se k'a fɔ cogo di ko Ala ka Mɔgɔ wolomanin nin ye Dawuda ka deen dama ye?

⁴² Dawuda yɛrɛ y'a fɔ Ala tandoli dɔnkiliw la ko: ‘Matigi Ala y'a fɔ ne ka Matigi ye ko: Sigi ne kinibolo fɛ

⁴³ fɔɔ ne ka i juguw cɔnkɔn i seen kɔrɔ.’

⁴⁴ Dawuda yɛrɛ y'a wele ko Matigi, a do bɛ se ka kɛ Dawuda ka deen dama ye cogo di?”

Yezu bɛ kangari la a ka kalandenw ye sariya karamɔgɔw koo la

⁴⁵ Yezu y'a fɔ a ka kalandenw ye jama nyana ko:

⁴⁶ “Aw ka aw yɛrɛw kɔlɔsi sariya karamɔgɔw la. Ka forocaw don ka yaala, o ka d'u ye, u b'a fɛ fana ko mɔgɔw k'u fo i n'a fɔ mɔgɔbaw jamayɔrɔ la. Ka sigi nyafɛ, mɔgɔbaw ka sigiyɔrɔ la, Alabatosow kɔnɔ ani jama dumunikɛyɔrɔw la, o fana ka d'u ye.

⁴⁷ Olu le bɛ firiyamusow bololafɛn bɛɛ nanbaran. O kɔ, u bɛ mɛn Ala dalili la janko k'u yɛrɛw yira mɔgɔtilenninw ye. Olu ka jalaki tɔɔrɔ bɛna juguya ka tɛmɛ tɔw ta kan.”