Luka 1 - LAYIDUKURA

Kitabu sɛbɛnkun

¹ Koo minw kɛra an fɛ, mɔgɔ dɔw y'a daminɛ ka olu kibaru sɛbɛn.

² O koow kɛra minw nyana kabini u daminɛtuma, n'u nana kɛ Ala ka kuma fɔbagaw ye, olu y'o koow lakali an ye cogo min na, u sɛbɛnbagaw y'o sɛbɛn ka kɛnyɛ ni olu ka seereya ye.

³ Ne fana ye sɛgɛsɛgɛli kɛ kosɛbɛ o koow bɛɛ la kabini u daminɛtuma, o le y'a to, ne miirila ko a ka nyi ne fana k'o koow sɛbɛn k'u tugutugu nyɔgɔn na e ye, kɔrɔ Tewofili,

⁴ waasa i k'a lɔn ko u y'i kalan koo minw na, ko tinyɛ yɛrɛyɛrɛ lo.

Mɛlɛkɛ dɔ bɛ Zan batizelikɛla woloko fɔ

⁵ Zude mara masacɛ Erɔdi ka tile la, sarakalasebaga dɔ tun bɛ yen min tɔgɔ ko Zakari. Abiya tɔgɔ lara sarakalasebaga minw ka jɛnkulu la, olu dɔ tun lo. A muso buruju bɔra sarakalasebagaw kuntigi Arɔn na. A tɔgɔ tun ko Elizabɛti.

⁶ U fila bɛɛ tilennin tun bɛ Ala nyakɔrɔ, u tun bɛ Matigi ka sariyaw bɛɛ labato a nyaa ma.

⁷ Deen si tun t'u fɛ, bari Elizabɛti tun kɛra muso wolobali ye, ka fara o kan, u fila bɛɛ tun kɔrɔla.

⁸ Loon dɔ, Zakari tun bɛ sarakalasebaga baara la n'a ka jɛnkulu mɔgɔw ye Alabatosoba kɔnɔ, bari u ka baara kɛ loon tun lo.

⁹ Ka kɛnyɛ ni sarakalasebagaw ka landa ye, u tun bɛ to ka mɔgɔ kelen woloma, ale bɛ don Alabatosoba yɔrɔ senuman na ka wusulan jɛni, o wolomani kɛnyɛna Zakari ma.

¹⁰ Ka Zakari to wusulan jɛni na, jama bɛɛ tun bɛ Ala dalili la Alabatosoba lukɛnɛ na.

¹¹ Matigi ka mɛlɛkɛ dɔ y'a yɛrɛ yira Zakari la, o mɛlɛkɛ lɔnin tun bɛ kinibolo nyafan fɛ wusulan jɛniyɔrɔ la.

¹² Zakari y'o ye tuma min na, a hakili nyagamina, a siranna kosɛbɛ.

¹³ Nga mɛlɛkɛ y'a fɔ a ye ko: “Zakari, i kana siran, bari i ka dalili minɛna. I ka muso bɛna dencɛ wolo i ye, i k'a tɔgɔ la ko Zan.

¹⁴ A woloko bɛna kɛ nisɔndiya dafanin ye i fɛ, ani mɔgɔ caaman nisɔn bɛna diya a koo la.

¹⁵ A bɛna kɛ mɔgɔba ye Matigi nyakɔrɔ. A tɛna duvɛn, walima minnifɛn fariman si min. Nii Senuman bɛna to a fɛ kabini a wolotuma na.

¹⁶ A bɛna kɛ sababu ye Isirayɛlidenw caaman bɛna segi ka sɔn u Matigi Ala ma.

¹⁷ A bɛna taama Nii Senuman barika la Ala nyakɔrɔ ni sebagaya ye, o min nyɔgɔn tun dira kira Eli ma, waasa ka faaw ni u deenw kaan bɛn. A bɛna mɔgɔ murutininw hakili yɛlɛma k'a kɛ mɔgɔtilenninw hakili ye. A bɛna jama labɛn k'a bila Matigi ye.”

¹⁸ Zakari ye mɛlɛkɛ nyininga ko: “Ne bɛ se ka la o la cogo di ko tinyɛ lo, bari ne ni n muso bɛɛ kɔrɔla.”

¹⁹ Mɛlɛkɛ y'a jaabi ko: “Ne ye Gabiriyɛli ye. Ne le bɛ lɔ Ala nyakɔrɔ k'a ka ciiw lamɛn. A ye ne ci ka na nin kibaru diman nin fɔ i ye.

²⁰ Ayiwa, i bɛna kɛ bobo ye, fɔɔ ka taa se nin koow kɛwaati ma, bari i ma la ne ka kuma na, k'a sɔrɔ o koow bɛna kɛ n'u kɛlon sera.”

²¹ O y'a sɔrɔ jama tun bɛ Zakari kɔnɔna. U tun kabakoyara, bari a mɛnna ka tɛmɛ Alabatosoba yɔrɔ senuman na.

²² Nga Zakari nana bɔ tuma min na, a ma se ka kuma u fɛ. U y'a faamu ko a ye yelifɛn dɔ ye Alabatosoba yɔrɔ senuman kɔnɔ. A kumana u fɛ n'a bolo ye. A tora boboya la.

²³ Zakari ka baara kɛlonw dafara loon min na, a segira ka taa soo.

²⁴ O koow tɛmɛnin kɔ, Zakari muso ye kɔnɔ ta. Nga, a y'o kɔnɔ dogo fɔɔ kalo duuru.

²⁵ A tun b'a fɔ a yɛrɛ kɔnɔ ko: “Matigi ye koo min kɛ ne ye, a filɛ: A ye ne yɔrɔ filɛ sisan ka ne ka maloya koo bɔ n kuun na mɔgɔw bɛɛ nyana.”

Mɛlɛkɛ dɔ bɛ Yezu woloko fɔ

²⁶ Elizabɛti kɔnɔ kalo wɔɔrɔnan na, Ala ye mɛlɛkɛ Gabiriyɛli ci Galile mara dugu dɔ la min tɔgɔ ko Nazarɛti.

²⁷ A y'a ci yen ka taa sunguru dɔ fɛ min tɔgɔ tun ko Mariyamu. A maminɛnin tun bɛ Yusufu fɛ, min buruju bɔra masacɛ Dawuda la.

²⁸ Mɛlɛkɛ sera Mariyamu fɛ k'a fɔ a ye ko: “I ni ce, i koo diyara Ala ye, Matigi Ala b'i fɛ.”

²⁹ O kuma nin ye Mariyamu hakili nyagami, a y'a yɛrɛ nyininga k'o foli sifa kɔrɔ ye mun ye.

³⁰ Mɛlɛkɛ y'a fɔ a ye ko: “Mariyamu, i kana siran, bari i koo diyara Ala ye.

³¹ A filɛ, i bɛna kɔnɔ ta ka dencɛ wolo, i k'a tɔgɔ la ko Yezu.

³² A bɛna kɛ mɔgɔba ye, a bɛna wele Setigi Ala Dencɛ. Matigi Ala bɛn'a kɛ masa ye i n'a fɔ a faa Dawuda.

³³ A bɛna sigi masaya la Isirayɛlidenw kunna fɔɔ tuma bɛɛ, a ka masaya tɛna ban abada.”

³⁴ Mariyamu ye mɛlɛkɛ nyininga ko: “Ne bɛna se ka kɔnɔ ta cogo di, k'a sɔrɔ ne ma cɛɛ lɔn fɔlɔ.”

³⁵ Mɛlɛkɛ y'a jaabi ko: “Nii Senuman bɛna jigi i kan, Setigi Ala bɛn'a ka setigiya yira i la. O kama, i bɛna Deen senuman min wolo, o bɛna wele Ala Dencɛ.

³⁶ A filɛ, i balimamuso Elizabɛti fana ye kɔnɔ ta a n'a ka kɔrɔya bɛɛ, a kalo wɔɔrɔnan ye nin ye. A bɛna dencɛ wolo, ale min tun bɛ jati muso wolobali ye.

³⁷ O bɛɛ bɛna kɛ bari Ala tɛ dɛsɛ foyi la.”

³⁸ O la, Mariyamu y'a fɔ a ye ko: “Ne ye Matigi ka jɔnmuso ye, i y'a fɔ cogo min na, Ala m'a kɛra ne ye ten.” O kɔ, mɛlɛkɛ bɔra a kɔrɔ ka taa.

Mariyamu bɛ taa bɔ Elizabɛti fɛ

³⁹ O tile fila nin na, Mariyamu wilila ka teliya ka taa dugu dɔ la Zude mara la, kuluw ka ca yɔrɔ min na.

⁴⁰ A taara don Zakari ka soo kɔnɔ ka Elizabɛti fo.

⁴¹ Elizabɛti ye Mariyamu ka folikan mɛn tuma min na, deen lamagara a kɔnɔ. Nii Senuman barika la,

⁴² Elizabɛti kabara k'a fɔ ko: “I ye nɛɛma sɔrɔ Ala fɛ ka tɛmɛ musow bɛɛ kan, ani deen min bɛ i kɔnɔ, o fana ye nɛɛma sɔrɔ.

⁴³ Ne ye jon ye fɔɔ ne Matigi bamuso yɛrɛ bɛ na bɔ ne fɛ?

⁴⁴ A filɛ, ne ye i ka folikan mɛn tuma min na, ne deen lamagara nisɔndiya fɛ ne kɔnɔ.

⁴⁵ I ye dubaden ye, bari mɛlɛkɛ ye Matigi ka kuma min fɔ i ye, i lara a la k'o bɛna kɛ.”

Mariyamu ka tandoli dɔnkili

⁴⁶ O la, Mariyamu ko: “Ne bɛ Matigi bonya n dusukun na,

⁴⁷ ne nisɔn diyanin bɛ n Kisibaga Ala kɔsɔn,

⁴⁸ bari, a y'a hakili to a ka jɔnmuso majiginin na. Kabini sisan, mɔgɔw bɛn'a fɔ waati bɛɛ ko ne ye dubaden ye,

⁴⁹ bari Setigi ye kobaw kɛ ne ye, a tɔgɔ ka senu.

⁵⁰ Minw bɛ siran Ala nya k'a bonya, a bɛ makari olu la waati bɛɛ.

⁵¹ A ye kabakow kɛ n'a bolo barikaman ye, a ye yɛrɛbonyalaw hakili nyagami.

⁵² A ye fanga bɔsi faamaw na ka faantanw kɛ mɔgɔbaw ye.

⁵³ A ye fɛnnyuman caaman di kɔngɔtɔw ma ka fɛntigiw bolo lakolon bila ka taa.

⁵⁴ A nana ni dɛmɛ ye Isirayɛli jama ma, o min y'a ka jɔɔnw ye,

⁵⁵ k'a hakili to a ka nyumanya la Ibrayima n'a kɔmɔgɔw faan fɛ, i n'a fɔ a tun y'a daa di an faaw ma cogo min na.”

⁵⁶ Mariyamu tora Elizabɛti fɛ ka kalo saba nyɔgɔn kɛ, o kɔ, a segira ka taa soo.

Zan batizelikɛla woloko

⁵⁷ Elizabɛti jigi loon nana se, a ye dencɛ wolo.

⁵⁸ A siginyɔgɔnw n'a ka mɔgɔw y'a mɛn minkɛ ko Matigi y'a ka makari bonya a faan fɛ, u nisɔn diyara ka fara Elizabɛti kan.

⁵⁹ A tile seegi, deen kɛnɛkɛnɛlon sera. U nan'a kɛnɛkɛnɛ, u tun b'a fɛ k'a facɛ tɔgɔ la a la ko Zakari.

⁶⁰ Nga a bamuso y'a fɔ ko: “Ayi, a tɔgɔ bɛna la ko Zan.”

⁶¹ U y'a jaabi ko: “I ka mɔgɔ si tɔgɔ tɛ ten.”

⁶² U ye deen faa nyininga bobow ka kuma cogo la ko a b'a fɛ tɔgɔ jumɛn ka la a deen kan.

⁶³ Zakari ye walaka nyini u fɛ k'a sɛbɛn o kan ko: “A tɔgɔ ko Zan.” U bɛɛ kabakoyara.

⁶⁴ O yɔrɔnin bɛ, Zakari ka boboya banna, a y'a daminɛ ka kuma ka Ala tando.

⁶⁵ U ka mara mɔgɔw bɛɛ siranna, Zude mara kuluyɔrɔ bɛɛ mɔgɔw tun bɛ o koow lakali nyɔgɔn ye yen.

⁶⁶ Mɔgɔ minw mana o kibaru mɛn, u bɛɛ tun bɛ miiri a la k'u yɛrɛ nyininga ko: “O tuma na, deen nin bɛna kɛ mun le ye sa?” Tinyɛ na, Matigi Ala tun b'a fɛ.

Zakari ka tandoli ni kiraya dɔnkili

⁶⁷ Nii Senuman barika la, deen facɛ Zakari ye kiraya kuma fɔ ko:

⁶⁸ “Tandoli ka kɛ Matigi ye, Isirayɛli ka Ala, bari a y'a janto a ka mɔgɔw la k'u hɔrɔnya.

⁶⁹ A ye kisibaga barikaman lawili an ye, a y'a bɔ a ka jɔncɛ Dawuda buruju la,

⁷⁰ i n'a fɔ a tun ye o kuma don a ka fɔlɔfɔlɔ kiraw daa la cogo min na

⁷¹ ko a bɛna an kisi an juguw ma, k'an tila ka bɔ an kɔniyabagaw bɛɛ bolo.

⁷² O cogo la, a makarila an faaw la, a y'a hakili to a ka layidu la.

⁷³ A tun ye layidu ta an Faa Ibrayima ye, tinyɛ na,

⁷⁴ ko a bɛna an tila an juguw la, waasa an jaa gwɛlɛyanin ka baara kɛ ale ye

⁷⁵ a ka an jati mɔgɔ senumanw ni mɔgɔtilenninw ye an sii bɛɛ la.

⁷⁶ E kɔni, ne deen, i bɛna wele Setigi Ala ka kira, bari i bɛna taama Matigi nyakɔrɔ k'a ka sira labɛn.

⁷⁷ I bɛna kisili sira yira a ka mɔgɔw la u ka kojuguw yafali seen fɛ,

⁷⁸ an ka Ala ka makari n'a ka nyumanya barika la. A bɛna kɛnɛ ci an ye ka bɔ sanfɛ i n'a fɔ tile bɔtɔ kɛnɛ,

⁷⁹ ka yeelen bɔ dibi la mɔgɔw ye, ni minw bɛ siran saya nya, ani k'an bila hɛrɛ sira kan.”

⁸⁰ Ayiwa, Zan tun bɛ kɔgɔra, n'a hakili bɛ bonya ka taa. A tora kongo kɔnɔ fɔɔ ka taa se a yɛrɛ yira loon ma Isirayɛlidenw na.