Kɛwalew 9 - LAYIDUKURA

Sɔli bɛ yɛlɛma ka kɛ kretinyɛ ye

¹ O y'a sɔrɔ Sɔli kɔni tun b'a la ka Matigi ka kalandenw bagabaga n'u ka fagako ye dɔrɔn. A taara

² seereyasɛbɛ minɛ sarakalasebagaw kuntigiba fɛ loon dɔ, janko a ka taa bɔ Damasikaw ka Alabatosow kɔnɔ, waasa n'a taara Matigi ka sira taamabaga minw sɔrɔ yen, u mana kɛ cɛɛw ye wo, walima musow wo, a k'u minɛ k'u siri ka na n'u ye Zeruzalɛmu.

³ K'a to sira kan, a surunyana Damasi la tuma min na, yeelenba dɔ bɔra sanfɛ ka n'a lamini.

⁴ A bɔra ka ben. Kumakan dɔ bɔra ko: “Sawuli, Sawuli, mun na i bɛ ne tɔɔrɔla ten?”

⁵ A y'a jaabi ko: “E ye jon ye?” Kumakan nin ko: “Ne Yezu lo i bɛ min tɔɔrɔla.

⁶ Nga, wili ka don dugu kɔnɔ, i ka kan ka min kɛ, u bɛna o fɔ i ye.”

⁷ Sɔli taamanyɔgɔn bɛɛ tun kirinna ka lɔ siranya fɛ. U tulo kɔni tun bɛ kumakan nin na, nga u tun tɛ mɔgɔ si yera.

⁸ Sɔli wilila ka bɔ duguma, a y'a nyaa yɛlɛ, nga a tun tɛ se ka yeli kɛ tugu. U y'a bolo minɛ le ka don n'a ye Damasi.

⁹ Sɔli ye tile saba kɛ finyɛntɔya la, a ma dumuni ani minni kɛ.

¹⁰ Kalanden dɔ tun bɛ Damasi, a tɔgɔ tun ko Ananiyasi. Matigi y'a yɛrɛ yira ale la k'a fɔ a ye ko: “Ananiyasi!” A ko: “Naamu, Matigi.”

¹¹ Matigi ko: “U bɛ sira min wele ko Siratilennin, i labɛn ka taa yen. N'i sera, i bɛ nyiningali kɛ Zuda ka soo cɛɛ dɔ koo la, a tɔgɔ ko Sɔli, Tarasika lo. A bɛ Ala dalila nin waati la.

¹² K'a to o Ala dali nin na, a ye ele Ananiyasi ye. I donna a ka soo k'i bolo la a kuun na, janko a ka yeli kɛ.”

¹³ Ananiyasi ye Matigi jaabi ko: “Uun, Matigi! O cɛɛ nin ye kojugu minw kɛ i ka mɔgɔw la Zeruzalɛmu, mɔgɔ caaman y'o lakali. Ne y'o mɛn.

¹⁴ Ayiwa, a nana yan Damasi dugu kɔnɔ ni dalilu ye a bolo, a y'o min sɔrɔ sarakalasebagaw fɛ. Mɔgɔ minw bɛɛ b'i kɔ, a ka olu minɛ ka jɔrɔkɔ don u la.”

¹⁵ Nga Matigi ko Ananiyasi ma: “Taa, bari ne mako b'a la. A bɛna ne ka koo fɔ siya wɛrɛw n'u ka masaw ye ani Isirayɛlidenw ye, u ka ne lɔn.

¹⁶ A ka kan ka tɔɔrɔ minw bɛɛ kɛ ne kɔsɔn, ne yɛrɛ bɛna o bɛɛ yira a la.”

¹⁷ O la, Ananiyasi taara, a sera soo nin kɔnɔ, a y'a bolo la Sɔli kuun na k'a fɔ a ye ko: “N teri Sɔli, Matigi Yezu min y'a yɛrɛ yira i la sira kan i natɔ yan, ale le ye n ci i fɛ, waasa i nyaa ka yɛlɛ, i ka Nii Senuman sɔrɔ.”

¹⁸ O yɔrɔnin kelen, fɛɛn dɔw bɔra Sɔli nyadenw na ka benben, olu bɔnin tun bɛ jigɛfaraw ma. A ye yeli kɛ, o yɔrɔnin bɛ, a sɔnna u y'a batize.

¹⁹ O kɔ, a ye dumuni kɛ, ka fanga sɔrɔ. A kɛra ten, Sɔli ye tile damani kɛ ni Damasi kalandenw ye.

Sɔli bɛ Damasikaw waaju

²⁰ O yɔrɔnin bɛ Sɔli y'a daminɛ ka mɔgɔw kalan Alabatosow kɔnɔ ko Yezu ye Ala Deen ye.

²¹ Mɔgɔ minw bɛɛ mana a lamɛn, u bɛɛ bɛ kabakoya fɔɔ u bɛ to ka nyɔgɔn nyininga ko: “Cɛɛ min bɛ Yezu ka kalandenw tɔɔrɔ kosɛbɛ Zeruzalɛmu, ale tɛ wa? U ko a nana yan janko ka u dɔw minɛ ka siri ka taa u di sarakalasebagaw ma le!”

²² O n'a ta bɛɛ, Sɔli kɔni tun bɛ barika sɔrɔla ka taa nya dɔrɔn. A tun bɛ waajuli kɛ ko Yezu ye Ala ka Mɔgɔwolomanin ye fɔɔ ka Damasi Zuwifuw dabari ban, u m'a lɔn u bɛna min fɔ a ye.

²³ Waatijan tɛmɛnin kɔ, Damasi Zuwifuw ye Sɔli fagako lanyini.

²⁴ U tun bɛ dugu bɔdaw bɛɛ kɔlɔsi suu ni tile, janko u ka se k'a faga. Nga o kuma nin bilara Sɔli tulo la.

²⁵ O la, loon dɔ sufɛ, a ka kalandenw y'a dogo sinsinba dɔ la k'a jigi ni juru ye dugu lamini kogo fɛ.

Sɔli bɛ segi Zeruzalɛmu

²⁶ Sɔli segira Zeruzalɛmu tuma min na, a tun b'a fɛ ka jɛn ni kalanden tɔw ye, nga olu bɛɛ tun bɛ siran a nya, bari u ma la a la n'a kɛra kalanden ye sɛbɛ la.

²⁷ O la, Barinabasi ye Sɔli ladon cidenw fɛ k'a fɔ u ye ko Matigi tun y'a yɛrɛ yira Sɔli la Damasi sira kan, ka kuma a fɛ, ko a ye Matigi ka kokɛninw wango la yen ni hakilisigi ye.

²⁸ K'a ta o loon ma, Sɔli tora ka taa n'u ye Zeruzalɛmu faan bɛɛ ka to ka Matigi ka kibaru diman fɔ mɔgɔw ye ni hakilisigi ye.

²⁹ Zuwifu minw bɛ girɛkikan fɔ, Sɔli tun bɛ baro kɛ, ka sɔsɔli kɛ n'olu fana ye. Nga olu kɔni tun b'a fagayɔrɔ le nyinina.

³⁰ Kalandenw y'o kibaru mɛn, u bɔra n'a ye k'a bila sira Sezare. K'a to o yɔrɔ la, u y'a bila ka taa Tarisi.

³¹ O tuma na, Ala ka jama tun bɛ hɛrɛ la Zude, ni Galile ani Samari mara nunu bɛɛ la. U tun bɛ buguya ka taa. U taamacogo tun bɛ bonya la Matigi kan kosɛbɛ. Nii Senuman barika la, u ka koow tun bɛ sabati.

Piyɛri bɛ Ene kɛnɛya

³² O y'a sɔrɔ Piyɛri tun bɛ jamana yɔrɔw bɛɛ yaala. O cogo la, Ala ka jama min bɛ Lida, a taara bɔ olu fɛ yen.

³³ A taara cɛɛ dɔ sɔrɔ yen min tɔgɔ ko Ene. A tun murukunin lo ka la kabini saan seegi.

³⁴ Piyɛri y'a fɔ a ye ko: “Ene, Yezu Krista ka i kɛnɛya. Wili k'i ka dilan ta i yɛrɛ ma.” O yɔrɔnin bɛ, Ene wilila.

³⁵ Lidakaw, ani minw siginin bɛ Sarɔn, u ye koo nin ye, u bɛɛ tuubira Matigi ye.

Piyɛri bɛ suu dɔ kunun

³⁶ Zope kalandenw cɛma, muso dɔ tun bɛ yen, a tɔgɔ tun ko Tabita, girɛkikan na, u ko Dɔrɔkasi, o kɔrɔ ko sinɛ. Mɔgɔnyuman tun lo, ka faantanw dɛmɛ, o tun y'a ka baara ye.

³⁷ Waati dɔ la, a banana, nga bana ma kun a la. U y'a suu ko ka ban tuma min na, u y'a la sangaso dɔ kɔnɔ.

³⁸ Zope ni Lida man jan nyɔgɔn na minkɛ, kalandenw y'a mɛn ko Piyɛri b'o yɔrɔ la. U ye ciraden fila bila ka ta'a fɛ k'a dali ko a ka teliya ka na bɔ u fɛ Zope joona joona.

³⁹ O yɔrɔnin bɛ, Piyɛri tugura u kɔ ka taa. U sera tuma min na, u yɛlɛla ni Piyɛri ye sangaso kan. Dɔrɔkasi tun ye fani minw dan k'a to nii na, firiyamusow bɛɛ tun bɛ to ka kasi n'u b'o yira Piyɛri la.

⁴⁰ Piyɛri ko mɔgɔw bɛɛ ka bɔ kɛnɛma. O kɔ, a y'a kunbiri gwan ka Ala dali. O kɔ, a y'a nyaa yɛlɛma suu faan fɛ k'a fɔ ko: “Tabita, wili.” A y'a nyaa yɛlɛ ka Piyɛri ye minkɛ, a wilila ka sigi.

⁴¹ Piyɛri y'a bolo minɛ k'a wili, a sɔrɔla ka kretinyɛw ni firiyamusow wele k'a yira u la.

⁴² Zopekaw bɛɛ ye kibaru nin mɛn, u caaman lara Matigi la.

⁴³ Piyɛri tora Zope ka waati dɔɔni kɛ cɛɛ dɔ fɛ min tɔgɔ tun ko Simɔn ni golobaarala tun lo.