Kɛwalew 28 - LAYIDUKURA

Pɔli bɛ Pubiliyusi facɛ kɛnɛya Maliti

¹ An kisira farati koo nin ma k'an yɛrɛ sɔrɔ ale dugukolonin min kan, u y'a fɔ an ye ko a tɔgɔ ko Maliti.

² O yɔrɔ mɔgɔw y'an minɛ ka nya. U ye tasumaba mana an ye, bari sanji tun nana ka nɛnɛ bɔ.

³ Pɔli ko a bɛ tasuma lalaga funteni kɔsɔn, fɔnfɔnni dɔ bɔra lɔgɔ la k'a cin a bolo la.

⁴ Dugulenw ye saa nin dulonnin ye Pɔli bolo la minkɛ, u tora k'a fɔ nyɔgɔn ye ko cɛɛ nin ye subaga ye cɔ. Ko a kɔni ma se ka sa jii la, nga jinaw ma sɔn a ka to nii na.

⁵ Nga Pɔli ye saa yuguyugu k'a fili tasuma na, a m'a lɔn ko koo yɛrɛ kɛra.

⁶ Olu kɔni tun bɛ Pɔli bolo funu le kɔnɔna dɔrɔn, walima a ka ben ka sa. Nga u ye kɔnɔni kɛ fɔɔ ka mɛn, foyi ma kɛ Pɔli la minkɛ, u yɛlɛmana ka to k'a fɔ ko Pɔli ye joo dɔ le ye.

⁷ Jamanatigi ka soo tun man jan o yɔrɔ nin na, ale ye anw ladon a ka soo ka nya, an ye tile saba kɛ yen. A tɔgɔ tun ko Pubiliyusi.

⁸ O y'a sɔrɔ a facɛ lanin tun lo tɔgɔtɔgɔni bolo. Pɔli taara k'a bolo l'a kuun na, ka Ala dali a ye, a kɛnɛyara.

⁹ A laban, o mara banabagatɔw bɛɛ nana, u bɛɛ kɛnɛyara fana.

¹⁰ U y'an bonya kosɛbɛ. An bɔwaati o yɔrɔ la, an mako tun bɛ fɛɛn o fɛɛn na taama nin ta ye, u y'an bonya n'o bɛɛ ye.

Pɔli bɛ don Ɔrɔmu

¹¹ Kalo saba le tun tɛmɛna an sɔrɔla ka bɔ Maliti. An ye Alɛkisandiri kurun dɔ le ta, joo tɔgɔ tun b'o min kan ko Filaninw. O kurun nin tun ye nɛnɛ tuma bɛɛ kɛ o yɔrɔ la.

¹² An sera Sirakuzi, an ye tile saba kɛ yen.

¹³ An bɔra o yɔrɔ la, an ma sɔn k'an yɔrɔ janya badagolo la, an sera Ereziyo. A dugusagwɛ, fɔnyɔ bɔra worodugu nyafan fɛ k'an nyɔnti. Tile fila dɔrɔn, an sera Puzɔli,

¹⁴ ka taa kalanden dɔw sɔrɔ yen. Olu y'a nyini an fɛ ko an ka lɔgɔkun kelen kɛ n'u ye. A kɛra cogo min na an sera Ɔrɔmu, o le ye nin ye.

¹⁵ Kalanden minw bɛ Ɔrɔmu, olu tun y'an kibaru mɛn n'an ma se yen ban. U dɔw bɔra ka n'an kunbɛn fɔɔ Apiyusi lɔgɔfiyɛ la, dɔw nana an kunbɛn Turuwa Tavɛɛni dugu kɔnɔ. Pɔli y'olu ye tuma min na, a ye barika la Ala ye, dɔ farala a ka jagwɛlɛya kan.

¹⁶ An sera Ɔrɔmu tuma min na, u sɔnna Pɔli ka boon ta a yɛrɛ ma. Sɔlidasi kelen tun b'a kɔlɔsi.

Pɔli bɛ Ɔrɔmu Zuwifuw waaju

¹⁷ Pɔli senin tile saba, a ye Ɔrɔmu Zuwifu nyamɔgɔw bɛɛ wele. U nana lajɛn tuma min na, a y'a fɔ u ye ko: “N badenw, n ma koo kɛ an ka siya la, n ma koo kɛ min n'an ka sariya tɛ bɛn. Nga u ye ne minɛ Zeruzalɛmu ka n don Ɔrɔmu faamaw bolo.

¹⁸ Faamaw ye n ka koo sɛgɛsɛgɛ k'a ye ko ne ma fɛɛn kɛ min bɛ se ka kɛ sababu ye u bɛ n faga. U tun bɛna n bila.

¹⁹ Nga Zuwifu nunu ma sɔn, aa! n fana dɛsɛra, n ko n'o lo, fɔɔ Ɔrɔmu masacɛ le ka koo nin nyanabɔ. N y'o fɔ, a ma kɛ i n'a fɔ ko n b'a fɛ ka n ka siya kuun don koo la, o tɛ!

²⁰ O le y'a to ne ye aw wele ka kuma n'aw ye Isirayɛli jigi bɛ min kan, o kama lo ne sirinin bɛ ni jɔrɔkɔ ye.”

²¹ U y'a jaabi ko: “Zudekaw ma sɛbɛ foyi ci an ma i koo la. Minw bɔra o yɔrɔ la ka na o si ma foyi fɔ an ye ko i ye koo dɔ kɛ.

²² Anw b'a nyini e fɛ, e k'a bɛɛ nyafɔ an ye. An kɔni b'a lɔn ko yɔrɔ bɛɛ mɔgɔw tɛ sɔn e ka diina nin ma.”

²³ Ayiwa, u bɛnna loon wɛrɛ la. O loon, Zuwifu nunu nana caaman Pɔli ka soo. K'a ta sɔgɔma fɔɔ wulafɛ, Pɔli ye Ala ka masaya koo fɔ u ye. A jijanin tun bɛ ka Yezu koo don u dusu la. O kama a tun bɛ Ala ka sariya ani kiraw ka sɛbɛw kɔnɔnakumaw nyafɔ u ye.

²⁴ A ka kuma sera dɔw kɔrɔ. Nga dɔw kɔni ma la a la dɛ.

²⁵ Olu ma bɛn u ni nyɔgɔn cɛ. Sanni u ka faran, Pɔli ye kuma kelen fɔ ko: “Nii Senuman ye kira Ezayi ci ka na min fɔ aw faaw ye, o ye tinyɛ ye kosɛbɛ. A tun y'a fɔ a ye ko:

²⁶ ‘Ta'a fɔ siya nin ye k'u bɛna u tulo malɔ kosɛbɛ, k'u tɛna foyi mɛn, k'u bɛna filɛli kɛ kosɛbɛ, k'u tɛna foyi ye.

²⁷ Siya nin tulo ka gwɛlɛ. U y'u tulo datugu, k'u nyaa datugu, waasa u nyaa kana yeli kɛ, u tulo kana mɛnni kɛ, janko u kana faamuli kɛ. N'u tun y'a faamu, u tun bɛna u sɔɔn yɛlɛma. O la, ne Ala tun bɛna u kisi.’

²⁸ “Ayiwa, ne Pɔli b'a fɔ aw ye ko Ala ka kuma bɛna fɔ siya wɛrɛw le ye sisan. Olu bɛna na a lamɛn, ka kisi.” [

²⁹ Pɔli y'o fɔ ka ban tuma min na, Zuwifuw tora ka nyɔgɔn sɔsɔ kosɛbɛ n'u bɛ taara soo.]

³⁰ Pɔli tun ye boon min ta, a ye saan fila dafanin kɛ o kɔnɔ. Mɔgɔ o mɔgɔ tun bɛ taa bɔ a fɛ, a tun b'u bɛɛ kunbɛn ka nya.

³¹ A tun bɛ Ala ka masaya koo fɔ u ye, ka mɔgɔw kalan Matigi Yezu Krista ka koow la ni jagwɛlɛya ye, mɔgɔ si tun t'a bali.