Kɛwalew 27 - LAYIDUKURA

Pɔli nunu bɛ Ɔrɔmu sira ta

¹ U y'a ;naniya ta ko an ka kan ka taa Itali jamana na kurun kɔnɔ loon min na, u ye Pɔli ni kasoden damani don Ziliyusi bolo, ale tun ye sɔlidasi nyamɔgɔ dɔ ye. O sɔlidasikulu tɔgɔ tun ko Ogusiti.

² An donna Adaramisiyɔmu kurun dɔ kɔnɔ, ale tun bɛ taara Azi mara gɛrɛfɛ. Arisitaaki tun bɛ n'an ye. Ale tun ye Tesalonika ye Maseduwani mara la.

³ A dugusagwɛ, an sera Sidɔn. Pɔli minɛcogo tun ka nyi Ziliyusi fɛ. O la, a ye sira d'a ma ko a bɛ se ka ta'a lɔnbagaw yɔrɔ filɛ dugu kɔnɔ, k'a makoyafɛn sɔrɔ u fɛ.

⁴ An bɔra o yɔrɔ la ka tɛmɛ Sipɔrɔ jamana kɔfɛ, o min bɛ kɔgɔji cɛma, bari fɔnyɔ tun b'an tɔɔrɔla.

⁵ An ye Silisi ni Panfili kɔgɔji cɛtigɛ ka taa se Mira, Lisi mara la.

⁶ Sɔlidasi nyamɔgɔ nin ye Alɛkisandiri kurun dɔ sɔrɔ yen, min tun bɛ taara Itali jamana na. A y'an ladon o kɔnɔ.

⁷ An ye tile damani kɛ kurunboli la. An sɛgɛnna kosɛbɛ ka sɔrɔ ka se Sinidi gɛrɛfɛ. Fɔnyɔ tun b'an balila ka taa n'o sira ye minkɛ, an y'an nyasin Salimone faan fɛ ka taa tɛmɛ Kɛrɛti jamana kɔfɛ.

⁸ An m'an yɔrɔ janya dugukolo la. An jijara fɔɔ ka se kurun lɔyɔrɔ dɔ la, u b'o min wele ko Kurun lɔyɔrɔnyuman. O ni Lazaya man jan nyɔgɔn na.

⁹ Waatijan tun tɛmɛna, kurunboli tun bɛ kɛra farati koo ye fana. Bari suun donlon tun tɛmɛna ka ban. O la, Pɔli y'a fɔ u ye ko:

¹⁰ “N badenw, ne y'a lɔn ko n'an taara n'an ka taama ye nyafɛ, farati bɛna sɔrɔ a la dɛ. Kurun n'a kɔnɔna minanw, hali an yɛrɛw nii bɛna se ka to a la.”

¹¹ Sɔlidasi nyamɔgɔ nin bolo lanin tun bɛ kurun bolila n'a tigi le kan. A ma Pɔli ka ladili jati.

¹² O kurun lɔyɔrɔ nin tun ma nyi saminya tuma na minkɛ, u caaman y'a fɔ k'u ka bɔ yen ka banba n'u bɛ se ka se Fenikisi. O kurun lɔyɔrɔ nin donyɔrɔ dɔ tun bɛ sɔrɔ jamana nin kɔgɔdugu nyafan ni tileben furancɛ la, dɔ tun bɛ worodugu nyafan ni tileben furancɛ la. O dugu nin tun ye Kɛrɛti jamana ka kurun lɔyɔrɔ dɔ ye. U ko n'an sera yen, ko an bɛ saminya kɛ yen.

Fɔnyɔba bɛ Pɔli nunu ka kurun ta

¹³ Ayiwa, fɔnyɔ diman dɔ daminɛna ka bɔ worodugu nyafan fɛ. U y'a miiri k'olu ye min ;naniya, k'o bɛna se ka kɛ. O la, u ye sira ta. U tun t'a fɛ u yɔrɔ bɛ janya Kɛrɛti dugukolo la kosɛbɛ.

¹⁴ Nga dɔɔni dɔrɔn, fɔnyɔba dɔ wilila an kama, o min tɔgɔ ko Erakilɔn.

¹⁵ A ye kurun ta. An tun tɛ se ka kurun boli fɔnyɔ fɛ fewu. O la, an dɛsɛra k'a to fɔnyɔ ta ma.

¹⁶ An ni kalama tɛmɛna dugukolonin dɔ kɔfɛ o min tɔgɔ ko Koda. O kɛra sababu ye an sera ka kurundennin ladon kurunba kɔnɔ ni sɛgɛn ye k'a siri.

¹⁷ Kurun bolilaw y'a ladon ka ban tuma min na, u ye jurukisɛ kɛ ka kurun naamu kosɛbɛ. U tun bɛ siranna ko fɔnyɔ kana taa kurun halaki Libi jamana cɛncɛn na. O la, u ye kurun lalɔfɛn bila jii la, fɔnyɔ ka tɛmɛ n'an ye sisan.

¹⁸ O dugusagwɛ, fɔnyɔ ka tɔɔrɔ kɔsɔn, u y'a daminɛ ka kurun kɔnɔ minanw fili jii la.

¹⁹ A dugusagwɛ tugu, u ye kurun yɛrɛ minanw dɔw bɔ k'u fili jii la.

²⁰ An ye tile damani kɛ, an tɛ tile ye, an tɛ lolo ye. Fɔnyɔ fana tun b'a nɔkɔrɔ la. An tun ma la a la ko an tun bɛna kisi tugu.

²¹ Kurun kɔnɔ mɔgɔw bɛɛ tun bɛ kɔngɔ la o mɛnna. O la, Pɔli wilila ka lɔ u cɛma k'a fɔ u ye ko: “N badenw, ne tun y'a fɔ aw ye ko an ka to Kɛrɛti, n'aw tun sɔnna ne ta ma, an bɛ farati koo ni bɔnɛ min na, o tun tɛna an sɔrɔ.

²² Nga aw bɛɛ y'aw jaa gwɛlɛya. Mɔgɔ si nii tɛna to a la, nga an bɛna bɔnɔ kurun le la,

²³ bari ne bɛ baara kɛ n ka Ala min ye, ale ka mɛlɛkɛ dɔ y'a yɛrɛ yira ne la kunu sufɛ

²⁴ k'a fɔ n ye ko: ‘I kana siran Pɔli, wajibi lo fɔɔ i ka se Ɔrɔmu masacɛ fɛ k'i ka koow nyafɔ a ye. Ayiwa, Ala ka nyumanya kɔsɔn, a ko i taamanyɔgɔn nunu si nii tɛna to jii la i sababu la.’

²⁵ Ayiwa n badenw, o tuma na, aw y'aw jaa gwɛlɛya. Ne lanin bɛ Ala la, a ye min fɔ, a bɛna kɛ ten.

²⁶ Wajibi lo, an bɛna se dugukolo ma.”

U kisiko

²⁷ Fɔnyɔ y'an talontalon ka se Kɔgɔjiba la. A tile tan ni naaninan loon dugutilama, kurun bolilaw y'a jatiminɛ k'a ye ko an surunyanin bɛ dugukolo dɔ la.

²⁸ O la, jii dunya bɛ suma ni fɛɛn min ye, u y'o bila jii la. U y'a ye ko jii dunya tɛ tɛmɛ senkala nyaa bi saba ni wolonwula kan. U janfara dɔɔni, u y'a suma tugu, a dunya tun ye senkala nyaa mugan ni seegi ye.

²⁹ U siranna kosɛbɛ ko an ka kurun nin kana taa kabakuru dɔ susu. O la, u ye kurun lalɔfɛn naani siri a kɔfɛ k'olu bila jii la, ka to ka Ala dali ka dugugwɛ makɔnɔ.

³⁰ Kurun bolilaw ye kurundennin jigi jii la k'a kɛ i n'a fɔ u b'a fɛ ka lalɔfɛn dilan kurun nyafɛ le, k'a sɔrɔ u tun bɛ boliyɔrɔ le nyinina.

³¹ O la, Pɔli y'a fɔ sɔlidasiw n'u nyamɔgɔ ye ko: “Ni mɔgɔ nunu ma to kurun kɔnɔ, aw si tɛna kisi.”

³² Juru min tun kɛnin bɛ ka kurun fila nunu siri nyɔgɔn na, sɔlidasiw y'o tigɛ ka kurundennin to a taara.

³³ Sanni dugu ka gwɛ, Pɔli y'a nyini u fɛ ko bɛɛ ka dumuni kɛ. A k'u ma: “A tile tan ni naani filɛ nin ye aw bɛɛ hakili nyagaminin lo, aw si tɛ dumuni kɛra.

³⁴ O la, ne b'a nyini aw fɛ, aw bɛɛ ka dumuni kɛ waasa mɔgɔ si kana sa. Ayiwa, n b'a fɔ aw ye tugu ko kojugu tɛna mɔgɔ si sɔrɔ.”

³⁵ A y'o kuma fɔ ten ka ban minkɛ, a ye buru ta ka barika la Ala ye k'a karikari, k'a daminɛ k'a nyimi.

³⁶ Tɔw jaa nana gwɛlɛya, u bɛɛ ye dumuni kɛ.

³⁷ An bɛɛ lajɛnnin tun ye mɔgɔ kɛmɛ fila ni bi wolonwula ni wɔɔrɔ ye.

³⁸ Bɛɛ fara tuma min na, u ye suman fili jii la waasa kurun ka finyɛya.

Pɔli nunu ka kurun bɛ to jii la

³⁹ Dugu gwɛra tuma min na, kurun bolilaw ma dugukolo kɔlɔsi, nga olu ye jisira dɔ le ye ni cɛncɛn b'a daa la. U tun b'a fɛ ka taa lɔ o yɔrɔ la.

⁴⁰ U ye kurun lalɔfɛn nunu juruw tigɛ k'u to jii la. Lɔgɔ minw bɛ kurun nyatilen, u y'o juruw fana foni. O kɔ, u ye fani siri kurun nyafɛla la waasa fɔnyɔ k'u nyɔnti ka se cɛncɛn yɔrɔ nin ma.

⁴¹ Nga kurun taara bali jii kunbɛnyɔrɔ cɛncɛn dɔ la jii jukɔrɔ. Kurun nyafɛla tununa o kɔnɔ fɔɔ a tun tɛ se ka magamaga. Jii fanga y'a kɔfɛla halaki.

⁴² Sɔlidasiw tun y'a miiri ko kasoden nunu bɛna boli. O la, u tun b'a fɛ k'u bɛɛ faga.

⁴³ Nga sɔlidasi nyamɔgɔ nin tun b'a fɛ ka Pɔli kunmabɔ minkɛ, a ma sɔn sɔlidasiw k'o kɛ. A ko minw bɛ jii lɔn, k'olu ka kɔn ka jigi ka dugukolo sɛgɛrɛ.

⁴⁴ Ko tɔ nunu bɛna jija ni lɔgɔw ye walima kurun ka lɔgɔcininw. A kɛra ten u bɛɛ bɔra, fɛɛn ma si sɔrɔ.