Kɛwalew 25 - LAYIDUKURA

Zuwifuw ni Pɔli bɛ nyɔgɔn na tugu

¹ Ayiwa, Fɛsitusi sigira lasigidenya la Sezare. Tile saba a senin kɔ, a taara bɔ Zeruzalɛmu.

² Sarakalasebaga kuntigiw ni Zuwifuw ka mɔgɔbabaw taar'a ye Pɔli ka koo la. U y'a dali kosɛbɛ

³ ko a ka sabali ka Pɔli bila ka na Zeruzalɛmu. K'a sɔrɔ u y'o dabari nin siri waasa ka se ka Pɔli faga sira kan.

⁴ Nga Fɛsitusi y'a fɔ u ye ko Pɔli bɛ kaso la Sezare, ko hali n'o tɛ, ko ale yɛrɛ tɛna mɛn yan.

⁵ Ko n'u ka nyanamɔgɔ dɔw b'a fɛ, k'u ka tugu ale kɔ ka taa Pɔli jalaki yen.

⁶ Fɛsitusi ma mɛn u fɛ yen ka tɛmɛ tile seegi walima tile tan kan. A segira loon min na, o dugusagwɛ bɛ, a sigira a ka kititigɛyɔrɔ la k'u ka na ni Pɔli ye.

⁷ A nana tuma min na, Zuwifu minw bɔra Zeruzalɛmu, olu wilila a kama ka to ka kumajugujuguw fɔ ka l'a kan. Nga dalilu si tun tɛ u bolo min b'a yira k'u ka fɔta ye tinyɛ ye.

⁸ Pɔli ye kuma ta k'a yɛrɛ koo fɔ ka gwɛ ko: “Ne ma fili Zuwifuw ka sariya ma, n ma fili Alabatosoba ma, n ma fili Ɔrɔmu masacɛ fana ma.”

⁹ Ayiwa, Fɛsitusi tun b'a fɛ ko Zuwifuw k'ale tɔgɔnyuman fɔ minkɛ, o la, a y'a fɔ Pɔli ye ko: “I b'a fɛ an ka taa n'i ye Zeruzalɛmu u k'i kiti yen ne yɛrɛ nyana wa?”

¹⁰ Pɔli y'a jaabi ko: “Ne minɛnin lo ka lɔ Ɔrɔmu masacɛ ka kititigɛyɔrɔ nin na, ne ka koow ka kan ka nyanabɔ yen le. Ne ma kojugu si kɛ Zuwifuw la do, e yɛrɛ b'o lɔnna.

¹¹ N'o y'a sɔrɔ ni ne ye koo dɔ kɛ min bɛ ne fagakun bɔ, ne ma ban o saya ma. Nga nunu bɛ minw fɔra ka la n kan, tinyɛ t'a si la, o la, mɔgɔ si tɛ se ka n saraka u ma. Ayiwa, ne b'a fɛ Ɔrɔmu masacɛ yɛrɛ le ka ne kiti sisan.”

¹² Fɛsitusi n'a ka dakɔrɔsigiw ye nyɔgɔn ye. O kɔ, a ye Pɔli jaabi ko: “I m'a fɔ ko i b'a fɛ Ɔrɔmu masacɛ le ka i kiti wa? An bɛna taa n'i ye a fɛ.”

Fɛsitusi bɛ Pɔli ka koo nyafɔ Agiripa ye

¹³ Tile damani tɛmɛnin kɔ, masacɛ Agiripa n'a dɔgɔmuso Berenisi nana Sezare ka Fɛsitusi fo.

¹⁴ U tun bɛna tile damani kɛ yen minkɛ, Fɛsitusi ye Pɔli ka koo lakali a ye ko: “Felikisi taara ka kasoden dɔ to yen.

¹⁵ Ne tun taara tile fila kɛ Zeruzalɛmu tuma min na, sarakalasebagaw, ni Zuwifuw ka cɛkɔrɔbaw nan'a nyini ne fɛ ko fɔɔ kasoden nin ka faga.

¹⁶ Nga ne y'u jaabi ko Ɔrɔmukaw ka landa la, kiti le bɛ kɛ fɔlɔ, kasoden nyaa ye, a jalakibagaw nyaa ye. Sira bɛ di kasoden ma k'a jalakibagaw ka kuma jaabi. N'o ma kɛ, Ɔrɔmukaw tɛ sira di ko mɔgɔjalakinin ka faga.

¹⁷ U dɔw tun nana ni ne ye yan. Ne fana m'a koo bila ka suma, n nanin dugusagwɛ bɛ, n sigira n ka kititigɛ sigilan kan, k'a fɔ k'u ka na ni cɛɛ ye an bɛ kiti daminɛ.

¹⁸ Ayiwa, ne tun y'a miiri ko a bɛna kɛ cogo min na, a ma kɛ ten. A jalakibagaw ma se ka cɛɛ ben ni kuma si ye.

¹⁹ A jalakikun tun y'u yɛrɛ ka Alasirako le ye. Ko Yezu tɔgɔla dɔ koo lo. U ko a sara, nga Pɔli ko a kununna.

²⁰ Ne ma kuun ye koo nin na kosɛbɛ minkɛ, ne ye Pɔli nyininga ko a bɛ sɔn ka taa u bɛ koo nin kiti tigɛ Zeruzalɛmu wa?

²¹ Nga Pɔli banna o la, a ko ale b'a fɛ Ɔrɔmu masacɛ le k'ale ka koo nyanabɔ. O le y'a to n k'u k'a mara kaso la, n bɛ cogoya nyini k'a sama masacɛ ma.”

²² Agiripa y'a fɔ Fɛsitusi ye o tuma na ko: “Ne b'a fɛ k'o cɛɛ nin lamɛn.” Fɛsitusi y'a jaabi ko: “I bɛn'a lamɛn sini yɛrɛ.”

²³ A dugusagwɛ, Agiripa ni Berenisi nunu nana don nyɔgɔnkunbɛnyɔrɔ la mɔgɔbaya la. Sɔlidasi kuntigiw ni dugu nyamɔgɔw tun b'u bilara sira. Fɛsitusi y'a fɔ k'u ka na ni Pɔli ye. U nana n'a ye.

²⁴ O kɔ, Fɛsitusi ye kuma ta, a ko: “Masa Agiripa, ani aw minw bɛɛ bɛ yan, aw ye hakɛ to. Zuwifuw bɛɛ lajɛnnin tun nana ne fɛ Zeruzalɛmu, ani yan fana, ka muruti ko cɛɛ nin man kan ka to nii na, o min lɔnin ye aw nyafɛ.

²⁵ Ne kɔni fɛ, ne ma fɛɛn ye, n'a ye min kɛ n'o b'a fagakun bɔ. Nga a tun y'a fɔ ko ale b'a fɛ Ɔrɔmu masacɛ le k'ale kiti. O la, n fana ko n bɛn'a sama ka taa yen.

²⁶ Ayiwa, ne bɛn'a ka koo kuun nyafɔ cogo min na masacɛ ye sɛbɛ kɔnɔ, ne m'o lɔn. O kama, ne nana n'a ye aw cɛma, waasa ele masa Agiripa k'a lamɛn ka dɔ lɔn a ka koo la, janko n ka se ka sɛbɛ nin ci.

²⁷ N'o tɛ, n y'a ye ko ka kasoden sama ten i m'a jalakikun fɔ ka l'a kan, o bɛ kɛ kuntanya ye.”