Kɛwalew 23 - LAYIDUKURA

¹ Pɔli lɔra ka kititigɛla nunu filɛ furutututu k'a fɔ ko: “N badenw, ne ye n ka kɛtaw bɛɛ kɛ ni kɔnɔgwɛ ye Ala nyana fɔɔ ka na se bii ma.”

² Sarakalasebagaw kuntigiba y'a fɔ ko Pɔli gɛrɛfɛ mɔgɔw k'a daa gosi. Pɔli y'a fɔ a ye ko:

³ “E kogogwɛ nin, Ala le bɛna e fana gosi! I bɛ sigi yan ko i bɛ ne kiti ka kɛnyɛ ni sariya ye, k'a sɔrɔ e k'u ka ne gosi, o do ma fɔ sariya la.”

⁴ A gɛrɛfɛ mɔgɔw y'a fɔ a ye ko: “I bɛ sarakalasebagaw kuntigiba le nɛni wa?”

⁵ Pɔli ye olu jaabi ko: “Aa! ne m'a lɔn ko sarakalasebagaw kuntigiba lo. Bari a fɔra Ala ka kuma na, ko i man kan k'i ka siya nyamɔgɔ nɛni.”

⁶ Ayiwa, Pɔli y'a lɔn ko kititigɛlaw faan kelen ye Sadusenyɛw ye, faan dɔ ye Farizinyɛw ye minkɛ, a pɛrɛnna ko: “N badenw, ne faa ye Farizinyɛ ye, ne yɛrɛ ye Farizinyɛ ye. An jigi bɛ suuw kununko min na, o jigi nin kama u ye ne minɛ.”

⁷ Pɔli y'o kuma nin fɔ tuma min na, mankan wilila Farizinyɛ ni Sadusenyɛw cɛ. Jama tilanna fila ye.

⁸ Sadusenyɛw kɔni ko suuw tɛna kunun dinyɛ labanlon, ko mɛlɛkɛ tɛ yen, ko suja koo ye galon ye fana. Nga Farizinyɛw lanin b'o bɛɛ la.

⁹ Mankan nin bonyana haali. Sariya karamɔgɔ minw tun ye Farizinyɛw ye, olu dɔw wilila k'a fɔ ko: “An ma jalakiyɔrɔ si ye cɛɛ nin na, n'a sɔrɔ suja, walima mɛlɛkɛ dɔ le kumana a fɛ.”

¹⁰ Mankan nin bonyana fɔɔ sɔlidasi kuntigi siranna ko mɔgɔ nunu bɛna Pɔli halaki, a ko a ka sɔlidasiw ka Pɔli minɛ ka taa n'a ye kaan kɔnɔ.

¹¹ Suu nana ko, Matigi y'a yɛrɛ yira Pɔli la k'a fɔ a ye ko: “I jaa gwɛlɛya, i ye ne koo fɔ Zeruzalɛmukaw ye ka ban, fɔɔ i ka taa ne koo fɔ Ɔrɔmukaw ye fana.”

Zuwifuw b'a fɛ ka Pɔli faga

¹² Dugu gwɛra tuma min na, Zuwifu dɔw bɛnna Pɔli fagako la. U ye dajuru ta k'u tɛna dumuni kɛ, k'u tɛna minni kɛ n'u ma Pɔli sɔrɔ k'a faga.

¹³ Mɔgɔ minw bɛnna o la, u tun ka ca ni mɔgɔ bi naani ye.

¹⁴ U taar'a fɔ sarakalasebagaw, ni cɛkɔrɔbaw ye ko: “An ye dajuru ta ko n'an ma Pɔli sɔrɔ k'a faga, an tɛna dumuni kɛ abada.

¹⁵ O la do, aw ye bɛn ni kititigɛla tɔw ye, k'a nyini sɔlidasi kuntigi fɛ ko a ka Pɔli sama aw ma waasa aw k'a ka koo jatiminɛ kosɛbɛ. Anw bɛna labɛn k'a faga sira la n'a ma se aw fɛ yan.”

¹⁶ Pɔli belenden y'o kuma nin mɛn, a taara kaan kɔnɔ ka Pɔli lasɔmi.

¹⁷ O la, Pɔli ye sɔlidasiw nyamɔgɔ dɔ wele k'a fɔ o ye ko a ka kanbelen bila sira sɔlidasi kuntigi fɛ, ko kuma b'a fɛ k'a fɔ a ye.

¹⁸ Sɔlidasi nin ye kanbelen bila sira u ka kuntigi fɛ k'a fɔ a ye ko: “Kasoden Pɔli y'a nyini n fɛ ko n ka kanbelen nin bila sira i fɛ, ko kuma b'a fɛ k'a fɔ i ye.”

¹⁹ Sɔlidasi kuntigi ye kanbelen bolo minɛ ka bɔ n'a ye kɔfɛ k'a nyininga ko: “Mun b'i fɛ k'a fɔ ne ye?”

²⁰ Kanbelen y'a jaabi ko: “Zuwifuw bɛnna a la k'u bɛna Pɔli dali e fɛ sini, janko kititigɛlaw ka se k'a ka koo nyanabɔ kosɛbɛ.

²¹ Kana sɔn k'a d'u ma, bari mɔgɔ bi naani ni kɔ labɛnnin lo waasa k'a faga sira kan. U ye dajuru ta k'u tɛna dumuni kɛ, k'u tɛna minni kɛ n'u ma Pɔli sɔrɔ k'a faga. Olu kɔni y'u ka ;naniya bɛɛ ta ka ban, u bɛ ele kɔnɔna.”

²² Sɔlidasi kuntigi y'a fɔ kanbelen ye ko: “I kan'a fɔ mɔgɔ si ye ko i ye koo nin lakali ne ye dɛ!” O kɔ, a ye sira d'a ma ko a ka taa.

Sɔlidasi kuntigi bɛ Pɔli sama Sezare

²³ O tuma na, sɔlidasi kuntigi y'a ka sɔlidasiw nyamɔgɔ fila wele k'a fɔ u ye ko: “Aw ye sɔlidasi kɛmɛ fila, ni sobolila bi wolonwula, ani tamantigi kɛmɛ fila labɛn. Surafana dumunin kɔ, n bɛna aw ci Sezare.

²⁴ Aw ye soo dɔw labɛn fana k'u kɛ Pɔli ka yɛlɛfɛn ye, k'a bila sira ka ta'a don masacɛ ka lasigiden Felikisi bolo Sezare, a nyama kana nɔgɔ.”

²⁵ A ye bataki sɛbɛn k'a don u bolo. A y'a fɔ o kɔnɔ ko:

²⁶ “Ne Kulodi Liziyasi bɛ sɛbɛ nin ci ele kɔrɔ Felikisi ma. E min ye masacɛ ka lasigiden ye, n b'i fo.

²⁷ Zuwifuw tun ye cɛɛ nin minɛ, u tun b'a fɛ k'a faga, ne nan'a mɛn ko Ɔrɔmuka lo, ne ni n ka sɔlidasiw sera k'a bɔsi u bolo.

²⁸ N tun b'a fɛ k'a minɛkun lɔn u fɛ minkɛ, n y'a nyini u ka kititigɛlaw fɛ k'u k'a kiti.

²⁹ Ayiwa, n y'a faamu o seen fɛ, ko a minɛkun ye olu yɛrɛ ka landa koow ye, a do t'a fagakun bɔ, a tɛ se ka kɛ kasoden ye fana.

³⁰ U nana n lasɔmi ko Zuwifu nunu b'a fɛ halibi k'a faga dogo la. O kama, ne y'a sama i ma teliya la k'a yira a jalakibagaw la ko n'u mako b'a la, u ka taa i fɛ yen.”

³¹ Sɔlidasi nunu ka kuntigi y'u ladi cogo min na, u y'a kɛ ten. Sufɛ, u taara ni Pɔli ye Antipatirisi.

³² O dugusagwɛ, sɔlidasi minw tun b'u seen na, olu kɔsegira kaan kɔnɔ, sotigiw taara ni Pɔli ye Sezare.

³³ U sera yen dɔrɔn, u ye sɛbɛ nin di lasigiden ma ka Pɔli fana yira a la.

³⁴ A ye sɛbɛ nin kalan ka ban tuma min na, a ye Pɔli nyininga ko a bɛ bɔ mara jumɛn na. Pɔli ko ale bɛ bɔ Silisi mara la minkɛ,

³⁵ lasigiden ko: “Ayiwa, n'i jalakibagaw nana tuma min na, i bɛna i ka fɔta fɔ.” Erɔdi tun ye masaso min lɔ yen, a k'u ka taa Pɔli mara o kɔnɔ.