Kɛwalew 19 - LAYIDUKURA

Pɔli bɛ kɔsegi Efɛzi

¹ Ka Apolɔsi to Korɛnti, Pɔli ye Azi jamana kulu yɔrɔ cɛtigɛ ka taa se Efɛzi. A ye kalanden dɔw sɔrɔ yen.

² A y'u nyininga ko: “Aw kɛra kalandenw ye ka la Yezu la tuma min na wo, aw ye Nii Senuman sɔrɔ wa?” U y'a jaabi ko: “Ee! Nii Senuman wa? An m'ale koo mɛn ka ye.”

³ Pɔli y'u nyininga tugu ko: “O tuma na, aw batizera cogo di?” U ko: “Zan tun bɛ mɔgɔw batize cogo min na, an ta fana kɛra ten.”

⁴ O tuma na, Pɔli ko: “Mɔgɔ minw sɔnna k'u sɔɔn yɛlɛma ka faran u ka kojuguw la, Zan tun bɛ olu batize. A tun b'a nyini jama fɛ ko mɔgɔ min bɛna na ale kɔ, ko u k'u jigi la ale kan. O ye Yezu koo ye.”

⁵ U ye Pɔli lamɛn ka ban tuma min na, u batizera Matigi Yezu tɔgɔ la.

⁶ Pɔli y'a bolo lala u kuun na, Nii Senuman jigira u kan, u y'a daminɛ ka siyakan wɛrɛw fɔ, ani ka kiraya kuma fɔ.

⁷ Olu tun bɛ mɔgɔ tan ni fila nyɔgɔn bɔ.

⁸ O kɔ, Pɔli tora ka taa Alabatoso kɔnɔ, ka to yen n'a bɛ mɔgɔw kalan Ala ka masaya koo la fɔɔ kalo saba. A tun bɛ jija waasa ka se a lamɛnbagaw kɔrɔ.

⁹ O bɛɛ n'a ta, dɔw tun ye tulogwɛlɛnw ye jama cɛma, olu y'a daminɛ ka to ka Matigi ka sira lɔgɔbɔ mɔgɔ bɛɛ nyana. O tuma na, Pɔli ye olu ye k'u to yen ka taa n'a ka kalandenw ye danna ka to k'u kalan loon o loon Tiranɔsi ka kalanso kɔnɔ.

¹⁰ A y'a kɛ ten saan fila fɔɔ Azi jamana mɔgɔw bɛɛ, Zuwifu fara girɛkiw kan, u bɛɛ ye Matigi ka kibaru diman mɛn.

Seva deenw ka koo

¹¹ Ala tun bɛ Pɔli dɛmɛ ka kabakow kɛ kosɛbɛ,

¹² fɔɔ mɔgɔw tun bɛ na ni musɔrɔw, walima faniw ye waasa k'o maga Pɔli la, ka taa o maga banabagatɔw la, u bɛ kɛnɛya. Ni jinatɔ lo, jina bɛ bɔ.

¹³ Zuwifu dɔw tun bɛ yaalayaala k'olu bɛ jinaw gwɛn ka bɔ mɔgɔw la, u tun b'a fɛ ka jina gwɛn ka bɔ mɔgɔ dɔw la ni Matigi Yezu tɔgɔ ye. U y'a fɔ jinaw ye ko: “Pɔli bɛ Yezu min koo fɔ, ale barika la, an b'a fɔ aw ye ko aw ka bɔ mɔgɔ nunu na.”

¹⁴ Mɔgɔ minw y'o kɛ, olu tun ye sarakalasebaga Seva ka dencɛ wolonwula nunu ye.

¹⁵ Nga jina y'u jaabi ko: “Ne bɛ Yezu lɔn, ka Pɔli fana lɔn. Nga aw do? Aw ye jɔnw ye?”

¹⁶ Jinatɔ nin girinna u kan, a fanga sera u bɛɛ kɔrɔ. A y'u mandimi fɔɔ u bɛɛ lakolon bɔra ka boli.

¹⁷ Efɛzikaw bɛɛ y'o kibaru mɛn, Zuwifu fara girɛkiw kan. U bɛɛ siranna. O seen fɛ, mɔgɔw ye bonya la Matigi Yezu tɔgɔ kan.

¹⁸ Mɔgɔ minw tun lara Yezu la Efɛzi, u caaman tun bɛ na u ka kojugukɛninw fɔ jama nyana k'a yira k'u tɛ o kɛ tugu.

¹⁹ Minw tun bɛ jinamoriya kɛ, olu caaman nana n'u ka sɛbɛ ye k'u jɛni jama bɛɛ nyana. U y'o sɛbɛ nunu sɔngɔ jati, k'a ye ko a bɛ darakimu wari waa tan bɔ.

²⁰ O cogo la, Matigi ka kuma tun bɛ yiriwa a yɛrɛ ka sebagaya fɛ.

Mankanba bɛ wili Efɛzi dugu kɔnɔ

²¹ O kɛnin kɔ, Pɔli tun b'a fɛ ka taa Maseduwani ani Akayi mara la, ka sɔrɔ ka segi ka na Zeruzalɛmu. A tun ko n'ale taara o yɔrɔ nunu na ka ban, ko a ka kan ka se Ɔrɔmu fana.

²² A y'a ka dɛmɛbaga fila ci Maseduwani mara la. Olu tun ye Timote ni Erasiti ye. Nga ale Pɔli tora Azi mara la ka lafila kɛ yen tugu.

²³ O waati yɛrɛ la, mankanba wilila Matigi ka sira koo la.

²⁴ Cɛɛ dɔ le tun bɛ yen, a tɔgɔ ko Demetiriyusi, numu tun lo. Ale tun bɛ to ka Efɛzikaw ka joba min tɔgɔ ko Aritemi batoso jaa fitinimanw lalaga ni warigwɛ ye. Minw tun b'o baara nin na a fɛ, u tun bɛ nafa sɔrɔ o la kosɛbɛ.

²⁵ A y'o baaraden nunu lajɛn, ani minw bɛɛ tun b'o baara nin nyɔgɔn kɛ dugu kɔnɔ, k'a fɔ u ye ko: “N badenw, aw yɛrɛ b'a lɔn ko an ka hɛrɛ bɛ bɔ baara nin le la.

²⁶ Nga Pɔli tɔgɔla nin bɛ min fɔra, ani a bɛ min kɛra, aw b'o mɛnna, aw b'o yera fana. A ko adamadenw bɛ fɛɛn minw lalaga n'u bolo ye, k'olu tɛ batofɛn nyanamanw ye. A jijara fɔɔ ka mɔgɔ caaman kuun yɛlɛma n'o ye. O ma kɛ i n'a fɔ Efɛzi kɔnɔ yan dɔrɔn lo! Nga a bɛ nyini ka Azi mara bɛɛ sɔrɔ!

²⁷ O bɛna kɛ sababu ye k'an ka baara nagasi, a tɛna dan o dɔrɔn ma, nga a bɛna kɛ sababu ye fana k'an ka joba nin sanga burun, o min ye Aritemi ye. K'a sɔrɔ Azi mara bɛɛ, ani dinyɛ bɛɛ b'a bato.”

²⁸ Mɔgɔ nunu ye nin mɛn dɔrɔn, u dimininba y'a daminɛ ka to ka pɛrɛn ko: “An Efɛzikaw ka Aritemi bɔnyɔgɔnko joba tɛ sɔrɔ!”

²⁹ Mankan nin bonyana fɔɔ ka dugu bɛɛ nyagami. Mɔgɔw tora ka mankan ci ka girin ka dugu ka nyɔgɔnlajɛnyɔrɔba sɛgɛrɛ. U ye Pɔli ka taamanyɔgɔn fila dɔ minɛ ka taa n'u ye yen. O tun ye Gayusi ani Arisitaaki ye. Maseduwanikaw tun lo.

³⁰ O la, Pɔli tun b'a fɛ ka ta'a yɛrɛ di, nga kalandenw y'a bali.

³¹ Hali mara nin ka mɔgɔba minw tun ye Pɔli teriw ye, u ye cii sama a ma ko a kana taa nyɔgɔnlajɛnyɔrɔba nin na, ko farati b'a la.

³² Mɔgɔ ka fɔtaw tun tɛ kelen ye. Mankan bonyana haali! Caaman yɛrɛ ma nyɔgɔnlajɛn nin kuun lɔn.

³³ Zuwifuw ye Alɛkisandiri tɔgɔ dɔ bila u nyafɛ janko a ka dɔ fɔ u ye. Alɛkisandiri nana a bolo kɛ, k'u ka je. A y'a daminɛ ko a bɛ kuma jama fɛ,

³⁴ mɔgɔw nana a lɔn ko Zuwifu lo dɔrɔn, u ye mankan daminɛ tugu. Bɛɛ tora ka pɛrɛn ko: “An Efɛzikaw ka Aritemi bɔnyɔgɔnko joba tɛ sɔrɔ!” U tora k'o kaan kelen nin fɔ fɔɔ lɛrɛ fila nyɔgɔn.

³⁵ Cɛɛ min tun bɛ to ka dugu ka nyɔgɔnyebaw kunnafoniw sɛbɛn, ale sera ka mɔgɔw fɛnkɛ u jera. A ye kuma ta k'a fɔ ko: “N badenw, an ka joba, min ye Aritemi ye, mɔgɔ jumɛn bɛ yen n'a t'a lɔn ko a juu maranin tɛ an Efɛzikaw fɛ? A jaa min bɔra sankolo la ka ben an fɛ yan, jon t'o kala ma Efɛzi?

³⁶ Ni bɛɛ b'o lɔn, n'o sɔsɔbaga tɛ yen, aw y'aw dusu suma, an kana koo dɔ kɛ n'an ma miiri min na.

³⁷ Aw ye mɔgɔ nunu minɛ ka na n'u ye yan ka sɔrɔ u ma cɛnni kɛ an ka jobonw si kɔnɔ, u ma kumajugu fɔ an ka joo koo la fana.

³⁸ Ni koo dɔ le bɛ Demetiriyusi n'a ka baarakɛnyɔgɔnw ni mɔgɔ dɔ cɛ, kiti tigɛlon bɛ yen, faamaw bɛ yen, u ka kan ka taa u ka koo nyanabɔ olu le fɛ.

³⁹ Ni kuma wɛrɛ le do bɛ aw fɛ n'an ka kan ka min nyanabɔ, aw bɛ na an ka nyɔgɔnyeba kɛlon na.

⁴⁰ N'an m'an yɛrɛ minɛ, u bɛna an jalaki bii koo nin kama, bari, kuun tɛ an ka nyɔgɔnlajɛn nin na, n'o nyaa bɛ se ka fɔ mɔgɔ ye.”

⁴¹ A ye kuma nunu fɔ ka ban minkɛ, a ko jama ka jɛnsɛn.