Kɛwalew 16 - LAYIDUKURA

Timote bɛ fara Pɔli ni Silasi kan taama na

¹ Pɔli nunu sera Dɛribe, ka taa Lisitɔrɔ. Kalanden dɔ tun b'o yɔrɔ la, a tɔgɔ tun ko Timote. A bamuso tun ye Zuwifu ye, min nana kɛ kretinyɛ ye. Nga a facɛ tun ye girɛki ye.

² Kalanden minw tun bɛ Lisitɔrɔ ani Ikɔniyɔmu, u tun b'a tɔgɔnyuman fɔ.

³ Pɔli tun b'a fɛ k'a kɛ a taamanyɔgɔn dɔ ye. O la, a y'a kɛnɛkɛnɛ o mara Zuwifuw kama. Bari, bɛɛ tun b'a lɔn ko Timote facɛ ye girɛki ye.

⁴ Zeruzalɛmu cidenw ni cɛkɔrɔbaw tun ye koo minw ;naniya ta, Pɔli ni Silasi tun mana se dugu min na, u b'o nyafɔ o yɔrɔ kalandenw ye, k'a nyini u fɛ k'u k'o kuma nunu labato.

⁵ Ala ka jama jigi tun bɛ sabatira ka taa nya. Loon o loon, dɔ tun bɛ fara u mɔgɔda kan.

Ka Pɔli to Torowasi, Matigi b'a ci Maseduwani mara la

⁶ Nii Senuman ye Pɔli ni Silasi nunu bali ka Ala ka kuma fɔ Azi mara la. U tɛmɛna ka taa Firizi ni Galati mara nunu yaala.

⁷ U sera Mizi mara faan fɛ, u tun b'a fɛ ka tɛmɛ ka taa Bitini mara la, nga Nii Senuman ma sira d'u ma.

⁸ O la, u ye Misi mara cɛtigɛ ka taa Torowasi.

⁹ Ayiwa, loon dɔ sufɛ, Pɔli ye Maseduwanika dɔ ye sigo la. Cɛɛ nin ye Pɔli dali kosɛbɛ ko a ka sabali ka na bɔ olu fɛ Maseduwani ka olu dɛmɛ.

¹⁰ O kɔ, an y'a lanyini o yɔrɔnin bɛ ko an bɛ taa Maseduwani, bari an lanin tun b'a la ko Ala le b'an welela o yɔrɔ la, waasa k'a ka kibaru diman fɔ yen.

Pɔli bɛ taa Maseduwani mara la

¹¹ An ye kurun ta Torowasi k'an kuun sin Samotarasi mara la. O dugusagwɛ, an sera Neyapolisi.

¹² An bɔra o yɔrɔ la ka taa Filipi. Filipi le tun ye Maseduwani mara duguba ye. Ɔrɔmukaw le tun siginin bɛ o yɔrɔ la. An ye tile damani kɛ yen.

¹³ Lafinyɛlon sera, an bɔra dugu banakɔ ka taa kɔɔ dɔ faan fɛ. An y'a miiri ko an bɛna Zuwifuw ka Ala batoyɔrɔ sɔrɔ yen. An taara muso dɔw lajɛnnin sɔrɔ yen, an sigira, k'o muso nunu waaju.

¹⁴ Muso dɔ tun bɛ olu cɛma, o tɔgɔ tun ko Lidi, jagokɛla tun lo. A tun bɛ fani sɔngɔgwɛlɛnw le jago. Tiyatirika tun lo, a tun bɛ siran Ala nya. Matigi barika la, a y'a tulo malɔ Pɔli ka kuma na ka nya.

¹⁵ Ale n'a ka somɔgɔw bɛɛ batizenin kɔ, a y'a fɔ an ye ko ni an y'a lɔn ko ale lanin bɛ Matigi la tinyɛ na, an ka sɔn ka na jigi ale ka luu kɔnɔ. A laban, a sera an kɔrɔ.

U bɛ Pɔli ni Sila don kaso la Filipi

¹⁶ Loon dɔ, an tun bɛ taara Ala batoyɔrɔ la, jɔnmusonin dɔ y'an kunbɛn. Lagwɛlikɛla tun lo. A ka lagwɛli baara tun kɛra sababu ye ka to ka nafoloba ladon a kuntigiw fɛ.

¹⁷ A tugura an ni Pɔli nunu kɔ ka to ka pɛrɛn ko: “Mɔgɔ nunu ye Setigi Ala ka baarakɛlaw ye, u bɛ kisili sira le fɔra aw ye.”

¹⁸ A tora o la fɔɔ tile damani. A laban, Pɔli ma se k'a munyu. O la, a y'a nyaa yɛlɛma k'a fɔ muso nin ka jina ye ko: “Yezu Krista tɔgɔ barika la, ne b'a fɔ i ye, bɔ muso nin na.” O yɔrɔnin bɛ, jina bɔra muso la.

¹⁹ Lagwɛlikɛla nin ka kuntigiw y'a ye k'u ka dumuniyɔrɔ nagasira minkɛ, u ye Pɔli ni Silasi minɛ ka taa n'u ye u ka jama kafoyɔrɔ la, u ka nyamɔgɔw fɛ.

²⁰ U y'a fɔ olu ye ko: “Mɔgɔ nunu bɛ nyagaminin donna an ka dugu la. Zuwifuw fana lo.

²¹ U bɛ mɔgɔw kalanna u ka landaw le la fana. An Ɔrɔmukaw fɛ, an man kan k'o mɛn, an man kan k'o sira taama.”

²² O la, jama murutira Pɔli nunu ma. Faamaw ko k'u ka faniw bɔ k'u bugɔ ni golokamiw ye.

²³ U y'u bugɔ ka ban tuma min na, u y'u don kaso la. U y'a fɔ kasobon kɔlɔsibaga ye ko a k'u kɔlɔsi ka nya kosɛbɛ.

²⁴ O kuma nunu kɔsɔn, ale y'u bila kasobon juguman le kɔnɔ ka tila k'u seen don jɔrɔkɔ la.

U bɛ Pɔli ni Silasi bila ka bɔ kaso la

²⁵ Dugutilama, Pɔli ni Silasi tun bɛ dɔnkili lara ka Ala tando. Kasoden tɔw tulo malɔnin tun bɛ u fɛ dɔrɔn.

²⁶ O yɔrɔnin bɛ, dugukolo yɛrɛyɛrɛla, boon bɛɛ lamagara, daa nunu bɛɛ yɛlɛla, kasodenw ka jɔrɔkɔw ni kurunw bɛɛ tigɛra u seenw na.

²⁷ Kasobon kɔlɔsibaga kununna ka daa nunu yɛlɛnin ye dɔrɔn, a y'a miiri ko kasodenw bolila. A y'a ka murujan sama ka bɔ ko a b'a yɛrɛ faga.

²⁸ Nga Pɔli pɛrɛnna ko a kana foyi kɛ a yɛrɛ la, ko u bɛɛ bɛ yen.

²⁹ A ye fitinɛ mana ka boli ka don n'a bɛ yɛrɛyɛrɛ, ka ta'a kunbiri gwan Pɔli ni Silasi kɔrɔ.

³⁰ A bɔra n'u ye kɛnɛma k'u nyininga ko: “Kɔrɔw, ne ka kan ka mun kɛ janko ne bɛ kisi?”

³¹ U y'a jaabi ko: “E ka la Matigi Yezu la dɔrɔn, e n'i ka somɔgɔw bɛɛ bɛna kisi.”

³² U ye Matigi ka kuma fɔ ale n'a ka somɔgɔw bɛɛ ye.

³³ A taara u ka joliw furakɛ o suu nin bɛ la. O kɔ, ale n'a ka somɔgɔw bɛɛ batizera.

³⁴ Ayiwa, a ye dumuni d'u ma a ka soo. Ale n'a ka somɔgɔw bɛɛ nisɔn diyara, bari u lara Ala la.

³⁵ Dugu nana gwɛ tuma min na, kititigɛlaw ye ciradenw bila ka ta'a fɔ a ye ko kasoden minw dira a ma kunu, ko a k'u bila.

³⁶ A fana taara o fɔ Pɔli nunu ye ko: “Kititigɛlaw ka kira nana ko n k'aw bila. O tuma na, aw ye bɔ ka taa ni hɛrɛ ye.”

³⁷ Nga Pɔli y'a fɔ u ye ko: “U y'an bugɔ jama nyana k'an don kaso la k'a sɔrɔ an ye Ɔrɔmukaw ye. Jalakikun fana ma sɔrɔ an na. Anhaan! Sisan, u b'a fɛ k'an bɔ kaso la dogodogo la. O tɛ kɛ! Fɔɔ olu yɛrɛ ka na an bɔ.”

³⁸ Ciraden nunu taara o kuma nunu fɔ faamaw ye. Olu bɛɛ kɔnɔ gwanna bari u ko Ɔrɔmukaw lo.

³⁹ U nana hakɛto nyini Pɔli nunu fɛ, k'u dali k'u ka dugu bila.

⁴⁰ Pɔli ni Silasi bɔra kaso la tuma min na, u taara Lidi ka soo. U ye kalandenw ladi k'u jaa gwɛlɛya. O kɔ, u sɔrɔla ka taa.