Kɛwalew 14 - LAYIDUKURA

Pɔli ni Barinabasi taako Ikɔniyɔmu

¹ Pɔli ni Barinabasi sera Ikɔniyɔmu, u donna Zuwifuw ka Alabatoso kɔnɔ fana ka mɔgɔw waaju, fɔɔ Zuwifuw ni siya wɛrɛw caaman lara Matigi la.

² Nga Zuwifu minw tun ma la a la, olu ye siya wɛrɛw kɔnɔnasu ka bila kalandenw na.

³ O le y'a to Pɔli ni Barinabasi ye dɔ fara u ka lafilabɔ kan yen. U jigi tun bɛ Matigi kan. A tun bɛ see d'u ma ka kabako ni taamasinyɛw kɛ k'a yira k'u ka waajuli ye tinyɛ ye, n'o ye a ka nɛɛma koo ye.

⁴ Dugu mɔgɔw tilanna, dɔw tugura Zuwifuw kɔ, dɔw tugura cidenw kɔ.

⁵ Zuwifuw ni siya wɛrɛw, ani u ka nyamɔgɔw labɛnnin tun lo ka Pɔli ni Barinabasi nunu bon ni kabakuruw ye k'u faga.

⁶ U bɔra u ka nanbara kala ma minkɛ, u dɛnna ka taa Lisitɔrɔ ni Dɛribe ani u lamini na Likawɔni mara la.

⁷ U y'a daminɛ ka Matigi ka kibaru diman fɔ o yɔrɔ nunu na.

Pɔli ni Barinabasi bɛ cɛmurukunin dɔ kɛnɛya

⁸ O y'a sɔrɔ cɛɛ dɔ tun bɛ Lisitɔrɔ, a murukunin tun lo kabini a wolotuma, a ma taama ka ye.

⁹ Cɛɛ tun b'a tulo malɔra Pɔli ka waajuli la. Pɔli y'a filɛ! A y'a lɔn ko cɛɛ lara a la ko Yezu bɛ se k'ale kɛnɛya.

¹⁰ O la, a y'a kaan kɔrɔ ta k'a fɔ a ye ko: “Wili ka lɔ i seen kan!” Cɛɛ panna ka lɔ, ka taama.

¹¹ Mɔgɔw ye Pɔli ka koo kɛnin nin ye minkɛ, u pɛrɛnna likawɔnikan na ko: “Joow y'u yɛrɛ yɛlɛma mɔgɔw ye ka jigi an fɛ.”

¹² U ye Barinabasi tɔgɔ la ko Zusi, o kɔrɔ ko joba, ka Pɔli tɔgɔ la ko Ɛrimɛsi, bari ale le tun bɛ to ka kuma.

¹³ Joo min bɛ dugu donda la, n'o tɔgɔ ko Zusi, o murutigi taara ni turaw ye o joso daa la. Yirifeerenw kɛnin tun bɛ k'o tura nunu masiri. Murutigi ni jama tun b'a fɛ ka Barinabasi ni Pɔli bato bari, u tun ko joow y'u yɛrɛ yɛlɛma mɔgɔw ye.

¹⁴ Ciden Barinabasi ni Pɔli y'o faamu tuma min na, u y'u kuun minɛ ka pɛrɛn ka boli u sɛgɛrɛ k'a fɔ u ye ko:

¹⁵ “Eee! Aw bɛ mun le kɛra yan ten? Anw fana ye mɔgɔw ye i n'a fɔ aw. Anw nana kibaru diman fɔ aw ye, janko aw ka faran kofufafu nunu na, k'aw nyasin Ala yɛrɛ ma, o min ye sankolo, ni dugukolo, ani kɔgɔji n'u kɔnɔnafɛnw bɛɛ dan.

¹⁶ Fɔlɔfɔlɔ, Ala tun ye siyaw bɛɛ to yen, u y'u sago kɛ.

¹⁷ O bɛɛ n'a ta, a tun b'a yɛrɛ cogoya yira u la, n'a ka konyumanw ye. A bɛ sanjinyuman di aw ma, suman bɛ sɔrɔ, aw dusu bɛ diya.”

¹⁸ Ciden fila nunu ka kuma n'a ta bɛɛ, a kɛra baara ye ka sɔrɔ ka se ka mɔgɔ nunu bali k'u kana olu sɔn i n'a fɔ joo ye.

¹⁹ Zuwifu dɔw nana ka bɔ Antiyɔsi, ani Ikɔniyɔmu o tuma na, olu ye jama hakili yɛlɛma fɔɔ u ye Pɔli bonbon ni kabakuruw ye, o kɔ, u y'a kooro ka ta'a fili dugu banakɔ, u ka miiri la ko a sara.

²⁰ Nga kalandenw nana lɔ k'a lamini tuma min na, a wilila ka don n'u ye dugu kɔnɔ. O dugusagwɛ, ale ni Barinabasi taara Dɛribe.

Pɔli ni Barinabasi bɛ kɔsegira Antiyɔsi

²¹ Pɔli ni Barinabasi ye kibaru diman fɔ Dɛribekaw ye, ka kalanden caaman sɔrɔ. O kɔ, u segira ka taa Lisitɔrɔ, ka bɔ yen ka taa Ikɔniyɔmu, ani Antiyɔsi.

²² U tun bɛ to ka kalandenw jaa gwɛlɛya k'u ka banba k'u jigi la Yezu kan kosɛbɛ. U tun b'a fɔ kalandenw ye ko: “Wajibi lo fɔɔ an ka tɔɔrɔ kosɛbɛ ka sɔrɔ ka don Ala ka mara kɔnɔ.”

²³ U ye nyamɔgɔw bɔ ka sɔrɔ ka suun don ka Ala dali, k'u kalifa Matigi ma, u jigi lanin bɛ ale min kan, k'u sigisigi dugu kelen kelen bɛɛ ka Ala ka jama kunna.

²⁴ O kɔ, u ye Pisidi jamana cɛtigɛ ka se Panfili jamana na,

²⁵ ka Ala ka kuma fɔ Pɛrizekaw ye. O kɔ, u taara Atali

²⁶ ka kurun ta o yɔrɔ la ka taa Antiyɔsi, u tun y'u kalifa Ala ma o yɔrɔ min na ka sɔrɔ ka taa baara nin kɛ.

²⁷ U sera yen tuma min na, u y'o yɔrɔ jama senuman lajɛn. Ala y'u dɛmɛ ka koo min bɛɛ kɛ, a ye sira di siya wɛrɛw ma cogo min na u ka la Matigi la, u y'o bɛɛ nyafɔ u ye.

²⁸ U ye waati dɔ kɛ o yɔrɔ kalandenw fɛ.