Kɛwalew 11 - LAYIDUKURA

Zeruzalɛmu kalandenw bɛ Piyɛri jalaki

¹ Cidenw, ni kalanden minw tun bɛ Zeruzalɛmu, olu y'a mɛn ko siya wɛrɛw fana sɔnna Ala ka kuma na.

² Piyɛri kɔsegira Zeruzalɛmu tuma min na, Zuwifu minw tun lara Yezu la, olu ye Piyɛri jalaki

³ ko: “I taara don siya wɛrɛw ka soo, o minw ma kɛnɛkɛnɛ, fɔɔ ka dumuni kɛ n'u ye.”

⁴ O la, koo nin kɛra cogo min na, Piyɛri y'a daminɛ k'a bɛɛ nyafɔ u ye kelen kelen.

⁵ A ko: “N tun bɛ Ala dali la ka n to Zope dugu kɔnɔ, Ala ye fɛɛn dɔ yira n na. O fɛɛn nin bɔnin tun bɛ fanibelebeleba dɔ ma n'a bɛ jigira ka bɔ sankolo la fɔɔ ka na se ne kɔrɔ. Juru sirinin tun bɛ a dakun naani nunu na.

⁶ N y'a filɛ furutututu, n ma sɔn ka n nyaa bɔ a kan. N ye sogow ye a kɔnɔ: seen naani fɛɛnw, ni seen fila fɛɛnw, ani minw bɛ fofo u kɔnɔ kan.

⁷ O tuma na, n ye kumakan dɔ mɛn ka bɔ sankolo la ko: ‘Piyɛri, wili ka nunu dɔ faga k'a nyimi.’

⁸ Ne y'a jaabi ko: ‘Abada, Matigi, fɛɛn min man kan ka dumu ne ma deli k'o don ne daa la ka ye, n tana lo.’

⁹ A kumana tugu ko Ala ye fɛɛn min saniya, ko n kan'a fɔ k'o man nyi ka dumu.

¹⁰ A kumana ten fɔɔ sinyɛ saba. O kɔ, fɛnbelebeleba nin fosira ka yɛlɛ sankolo la.

¹¹ O waati yɛrɛ la, an tun bɛ luu min kɔnɔ, ciraden mɔgɔ saba nana lɔ o daa la. Mɔgɔ dɔ le tun y'u ci ne fɛ ka bɔ Sezare.

¹² Nii Senuman y'a fɔ n ye ko ne kana sigasiga ka taa n'u ye. Ayiwa, mɔgɔ wɔɔrɔ nunu fana ye n bila sira Sezare. An sera ka don cɛɛ ka soo.

¹³ A y'a fɔ an ye ko mɛlɛkɛ dɔ y'a yɛrɛ yira ale la a ka soo k'a fɔ ale ye ko a ka mɔgɔ ci Zope, ka taa cɛɛ dɔ wele min tɔgɔ ko Simɔn n'u b'a wele ko Piyɛri.

¹⁴ Ko a bɛna kuma dɔw fɔ i ye min bɛna kɛ sababu ye, e n'i ka somɔgɔw bɛɛ ka kisi.

¹⁵ Ayiwa, ne y'a daminɛ ka kuma n'u ye dɔrɔn, Nii Senuman jigira u kan i n'a fɔ a tun jigira anw kan koow daminɛtuma na cogo min na.

¹⁶ O tuma na, ne hakili jigira Matigi ka kuma nin na ko: ‘Zan ye aw batize ni jii ye, nga aw bɛna batize ni Nii Senuman ye.’

¹⁷ Ni Ala yɛrɛ ye Nii Senuman d'u ma i n'a fɔ anw, bari an lara Matigi Yezu Krista la, ne ye jon ye, ni ne bɛna Ala sɔsɔ o la?”

¹⁸ Kuma nunu y'u dusu mala. U y'a daminɛ ka Ala tando ka to k'a fɔ ko: “Aa, tinyɛ na, Ala ye sira di siya wɛrɛw fana ma u ka se k'u sɔɔn yɛlɛma ka sini hɛrɛ sɔrɔ.”

Ala ka jama min bɛ Antiyɔsi, o ka koo

¹⁹ Tɔɔrɔ min tun daminɛna Etiyɛni fagalon na, o tun kɛra sababu ye kalanden dɔw taara Fenisi ni Sipɔrɔ jamana na, ani Antiyɔsi dugu kɔnɔ. Nga u tun tɛ Yezu ka kibaru diman fɔ siya wɛrɛw ye fɔɔ Zuwifuw dɔrɔn.

²⁰ O bɛɛ n'a ta, kalandenw dɔw bɔra Sipɔrɔ, ni Sirɛni ka taa Matigi Yezu ka kibaru diman fɔ siya wɛrɛw ye.

²¹ Ala y'a ka sebagaya d'u ma fɔɔ mɔgɔ caaman sɔnna Matigi ma.

²² Ala ka jama min tun bɛ Zeruzalɛmu, olu y'o kibaru mɛn, u ye Barinabasi ci u fɛ Antiyɔsi.

²³ Ala y'o mɔgɔ nunu dɛmɛ cogo min na, Barinabasi sera yen k'o ye, a nisɔn diyara. A y'u jaa gwɛlɛya k'u ka banba ka nɔrɔ Matigi kelen na.

²⁴ Barinabasi tun ye mɔgɔnyuman ye, Nii Senuman tun b'a fɛ, a lanin tun bɛ Yezu la kosɛbɛ. Mɔgɔ caaman lara Matigi la o cogo la.

²⁵ O tuma na, Barinabasi taara Sɔli yɔrɔ nyini Tarisi.

²⁶ A y'a ye, u nana nyɔgɔn fɛ Antiyɔsi. U ye saan kelen kɛ nyɔgɔn fɛ n'o yɔrɔ kalandenw ye. U ye mɔgɔ caaman kalan ni Ala ka kuma ye. Ka Yezu ka kalandenw wele kretinyɛw, o kɔrɔ Krista ka mɔgɔw, o daminɛna Antiyɔsi le.

²⁷ O waati la, kira dɔw bɔra Zeruzalɛmu ka taa Antiyɔsi.

²⁸ U dɔ tɔgɔ tun ko Agabu, o wilila k'a fɔ Nii Senuman barika la ko kɔngɔ bɛna don dinyɛ yɔrɔ bɛɛ. Tinyɛ na, o kɔngɔ nin donna masacɛba Kulodi ka tile la.

²⁹ Ayiwa, Antiyɔsi kalandenw ye ;naniya ta k'u bolo farafara nyɔgɔn kan ka kɛnyɛ n'u bɛɛ seko ye, k'u b'o ci u baden Zudekaw ma.

³⁰ U y'a kɛ ten. U y'o bolomafara nunu don Barinabasi ni Sɔli bolo k'u ka taa u di Zude mara kretinyɛ nyamɔgɔw ma.