Kɛwalew 1 - LAYIDUKURA

Ala ye fɛɛn min layidu ta

¹ Tewofili, n ka sɛbɛ fɔlɔ kɔnɔ, Yezu ye koo minw bɛɛ kɛ, ka mɔgɔw kalan koo minw bɛɛ la, k'a ta o daminɛ ma

² fɔɔ ka taa se a kɔrɔ talon ma ka taa arijana na, n y'o bɛɛ lakali o kɔnɔ. Ayiwa, yan ni a ka yɛlɛ ka taa arijana na, a tun ye mɔgɔ minw woloma k'u kɛ a ka cidenw ye, a y'u kalan tugu, ka kangari la u ye Nii Senuman barika la.

³ Yezu sanin kɔ, ka kunun, a y'a yɛrɛ yira a ka cidenw na cogo caaman ani sinyɛ caaman na tile bi naani kɔnɔ janko u k'a lɔn ko ale tɛ suu ye tugu. A tora n'u ye n'a b'u kalan Ala ka masaya sigiko la.

⁴ K'u to nyɔgɔn fɛ dumuni na loon dɔ, a y'a fɔ u ye k'a gwɛlɛya ko: “Aw kana aw yɔrɔ janya Zeruzalɛmu na, n Faa tun y'a daa di koo min na, aw ye to yen k'o makɔnɔ. Ne tun ye o kuma fɔ aw ye ko

⁵ Zan ye mɔgɔw batize ni jii ye, nga yan ni tile damani, aw bɛna batize ni Nii Senuman ye.”

Yezu ka yɛlɛko arijana na

⁶ Kalandenw lajɛnnin tun bɛ Yezu kɔrɔ. U y'a nyininga ko: “Matigi, sisan lo i bɛna Isirayɛli ka masaya sigi kura ye wa?”

⁷ A y'u jaabi ko: “O masaya nin koo nyanabɔli t'aw ka sira la, o koow bɛ n Faa kelenpe le bolo.

⁸ Nga ni Nii Senuman jigira aw kan tuma min na, aw bɛna fanga sɔrɔ ka se ka ne ka koow fɔ Zeruzalɛmu, ni Zude mara bɛɛ la, ani Samari mara la, fɔɔ ka taa se dinyɛ faan bɛɛ la.”

⁹ Yezu y'o kuma nunu fɔ ka ban minkɛ, a kɔrɔ tara u nyakɔrɔ ka taa arijana na. K'u to filɛli la, Sankaba dɔ donna u cɛ k'a dogo u la.

¹⁰ K'u nyaa basanin to sankolo la, u barila ka cɛɛ fila dɔ ye u gɛrɛfɛ fanigwɛ tun bɛ minw kaan na.

¹¹ Cɛɛ fila nunu y'u kaan to u ma ko: “Galilekaw! A kɛra di aw lɔnin bɛ ka sankolo filɛ ten? Aw ye Yezu min yɛlɛtɔ ye arijana na dɛ, a bɛna segi ka na ten ka bɔ o yɔrɔ la.”

Cidenw ka jɛnkulu

¹² O tuma na, cidenw jigira ka bɔ kulu nin kan, o min tɔgɔ ko Olivuyirikulu, ka taa Zeruzalɛmu dugu kɔnɔ, o furancɛ nin tɛ kilo kelen bɔ.

¹³ U sera dugu kɔnɔ tuma min na, u tun bɛ sangaso min kɔnɔ ka kɔrɔ, u yɛlɛla yen. Minw tun bɛ yen, u tɔgɔw filɛ: Piyɛri, ni Zan, ni Zaki ani Andere, Filipi, ni Toma, Baritelemi ani Matiyo, Alife dencɛ Zaki, ni Simɔn Zelɔti ani Zude min faa tɔgɔ ko Zaki.

¹⁴ U ka miiri bɛɛ tun ye kelen ye. U lajɛnnin tun bɛ jɛn nyɔgɔn fɛ tuma bɛɛ ka Ala dali. Muso dɔw tun bɛ n'u ye. Yezu baa Mariyamu tun bɛ u cɛma, ani Yezu dɔgɔninw.

Matiyasi bɛ bila Zuda nɔɔ na

¹⁵ O waati la, kalanden mɔgɔ kɛmɛ ni mugan nyɔgɔn lajɛnnin tun bɛ yen. Piyɛri wilila ka lɔ u cɛma loon dɔ k'a fɔ ko:

¹⁶ “N badenw, Ala ka kuma kɔnɔ Dawuda tun ye min fɔ Nii Senuman barika la Zuda koo la, wajibi tun lo fɔ o ka kɛ. Ale Zuda le nana kɛ sababu ye u ye Yezu minɛ.

¹⁷ Zuda tun ye an dɔ ye. Baara min tun kalifara an ma, o nyɔgɔn le kalifara a fana ma.

¹⁸ A ye baarajugu kɛ k'o sara ta ka taa foro san. A do benna o le kɔnɔ k'a yɛrɛ cɛn pepewu.

¹⁹ Zeruzalɛmukaw bɛɛ y'o kibaru mɛn fɔɔ u ye foro nin tɔgɔ la u ka kaan na ko Akɛlidama. O kɔrɔ ko Joli foro.

²⁰ A sɛbɛnnin bɛ Ala tando dɔnkiliw kitabu kɔnɔ ko: ‘A ka soo ka kɛ tomo ye. Mɔgɔ kana sigi yen.’ A sɛbɛnnin bɛ yɔrɔ wɛrɛ ko: ‘Mɔgɔ wɛrɛ ka bila a nɔɔ na.’

²¹ “O kama, mɔgɔ minw tun tugunin b'an kɔ kabini Matigi Yezu bɛ n'an ye,

²² k'a taa Yezu batizelon ma Zan fɛ, fɔɔ ka ta'a bila a kɔrɔ talon ma arijana na ka bɔ an cɛma, wajibi lo, olu dɔ ka Zuda nɔɔ ta, ka kɛ an dɔ ye ka Yezu koo fɔ.”

²³ U ye mɔgɔ fila bɔ, kelen tɔgɔ ko Yusufu ni dɔw b'a wele ko Barisabasi, dɔw fana b'a wele ko Zusitusi. Tɔ kelen tɔgɔ ko Matiyasi.

²⁴ O kɔ, u ye Ala dali ko: “Matigi, e min bɛ mɔgɔ bɛɛ kɔnɔnako lɔn, n'i b'a fɛ mɔgɔ fila nunu na min ka kɛ i ka baarakɛla ye, o yira an na.

²⁵ Zuda taar'a yɛrɛ kunfɛ ka cidenya baara min to, o tigi ka se k'o kɛ.”

²⁶ U ye kala bon, min y'a yira ko Matiyasi lo. O la, ale farala ciden tan ni kelen nunu kan.