Heburuw 8 - LAYIDUKURA

An ka sarakalasebagaw kuntigiba

¹ Ayiwa, an ye min bɛɛ fɔ ka tɛmɛ sisan, a kunba filɛ nin ye: an k'a lɔn k'o sarakalasebagaw kuntigiba nyɔgɔn le b'an fɛ. A taara sigi Masaba kinibolo la sankolo la.

² A b'a ka baara kɛ yen Ala ka yɔrɔ senuman yɛrɛ yɛrɛ la. Mɔgɔ bolo m'o min lɔ, fɔɔ Matigi Ala.

³ Sarakalasebagaw kuntigibaw bɛɛ sigira ka sɔnnifɛn ni sarakaw di Ala ma. O la, fɔɔ Yezu fana ka dɔ sɔrɔ k'o di Ala ma.

⁴ N'a tun bɛ dinyɛ na, a yɛrɛ tun tɛ se ka kɛ sarakalasebaga ye do, bari sarakalasebagaw bɛ yen ka kɛnyɛ ni Musa ka sariya ye.

⁵ Olu b'o baara min kɛra ten dinyɛ na, o ye arijana ta jaa ye. Min bɛ kɛra yan, o tɛ foyi ye ni Musa ka tile ta tɛ. O kɔsɔn, sanni Musa ka Alabatoyɔrɔ fɔlɔ lɔ, Ala y'a fɔ a ye ko: “Ne ye cogo min yira i la kulu kan, e jija a bɛɛ ka kɛ o cogo la.”

⁶ Nga baara min dira Yezu ma sisan, o ka bon ni sarakalasebaga tɔ nunu ta ye. Bari Yezu ye Ala ni mɔgɔ ka jɛnnyɔgɔnya lakuraya, o min ka fisa ni fɔlɔta ye, o min juu sigira layiduw kan minw fana ka fisa ni fɔlɔta ye.

Jɛnnyɔgɔnyakura koo

⁷ Jɛnnyɔgɔnya min tun bɛ Ala n'a ka jama cɛ, ni finyɛ tun ma don o la, Ala tun tɛn'a lakuraya.

⁸ Ala tun y'a ka mɔgɔw jalaki. O la, a ko: “Loon dɔ bɛna se, ne Matigi le ko ten. Ne bɛna n ka jɛnnyɔgɔnya lakuraya ni Isirayɛli mara mɔgɔw ani Zuda mara mɔgɔw ye.

⁹ O ni kɔrɔman nin tɛna kɛ kelen ye, n y'o min sigi n'u faaw ye loon min na ne y'u minɛ ka bɔ n'u ye Ezipiti jamana na. Nga, u ma ne ka jɛnnyɔgɔnya labato minkɛ, o la, ne fana ye n mako bɔ u la. Ne Matigi le ko ten.

¹⁰ O loonw tɛmɛnin kɔ, n bɛna jɛnnyɔgɔnya min sigi ni Isirayɛlidenw ye, o filɛ nin ye. Ne Matigi le ko ten. Ne yɛrɛ bɛna n ka sariya koo don u dusu la, n koo ka to u kɔnɔ. Ne bɛna kɛ u ka Ala ye, olu bɛna kɛ ne ka mɔgɔw ye.

¹¹ O tuma na, u si tɛna na u baden, walima u tɔnyɔgɔn kalan ne koo la tugu. Bari, u bɛɛ bɛna ne lɔn, k'a ta denmisɛnw ma fɔɔ ka ta'a bila mɔgɔkɔrɔbaw ma.

¹² Ne bɛna u ka hakɛw bɛɛ to u ye. Ne tɛna u ka kojuguw koo to n dusu la tugu.”

¹³ Ni Ala ye jɛnnyɔgɔnyakura koo fɔ, o b'a yira ko fɔlɔta nin tɛ jati tugu. Ni fɛɛn min do tɛ jati, o bantuma sera.