Heburuw 7 - LAYIDUKURA

Mɛlikisedɛki ka koo

¹ Mɛlikisedɛki tun ye Salɛmu dugu masa ye, ani Masaba Ala ka sarakalasebaga. Ibrayima kɔsegitɔ ka bɔ masa dɔw kɛlɛyɔrɔ la, o y'a sɔrɔ kɛlɛ diyara a la, Mɛlikisedɛki y'a kunbɛn ka duba kɛ a ye.

² Ibrayima ye fɛɛn minw bɛɛ sɔrɔ kɛlɛkɛyɔrɔ la, a y'u jaka d'a ma. Mɛlikisedɛki kɔrɔ ko “masatilennin.” Salɛmu masa tun lo, o kɔrɔ ko “hɛrɛ masa.”

³ Faa t'a fɛ, baa t'a fɛ, buruju t'a fɛ, wololon t'a fɛ, a ma sa fana. Sarakalasebaga lo tuma bɛɛ i n'a fɔ Ala Dencɛ.

⁴ Mɔgɔba lo dɛ! An faa Ibrayima ye fɛɛn minw sɔrɔ kɛlɛkɛyɔrɔ la, a y'o bɛɛ jaka d'a ma!

⁵ Sarakalasebagaya dira Levi kɔmɔgɔw ma, sariya ko u ka jaka minɛ jama fɛ, o minw ye u badenw ye. K'a sɔrɔ u bɛɛ bɔra Ibrayima la.

⁶ Mɛlikisedɛki ye jaka nin minɛ Ibrayima fɛ k'a sɔrɔ Levi kɔmɔgɔ dɔ tɛ. O kɔ, a ye duba kɛ Ibrayima ye, Ala y'a daa di ale min ma.

⁷ Siga t'a la ko dubakɛbaga ka bon ni dubasɔrɔbaga ye.

⁸ Levi kɔmɔgɔ minw bɛ jakaw minɛ, olu bɛ sa. Nga jaka min minɛna Ibrayima fɛ, a fɔra k'o minɛbaga ma sa.

⁹ Levi kɔmɔgɔw minw bɛ jaka minɛ, olu yɛrɛ tun ye jaka bɔ u bɛma Ibrayima barika la, n'a bɛ se ka fɔ ten.

¹⁰ Bari Mɛlikisedɛki taara k'a bɛma Ibrayima kunbɛn tuma min na, o y'a sɔrɔ a tun ma wolo fɔlɔ.

Sarakalasebagakura

¹¹ Sariya min sigira Isirayɛlidenw ye, o juu siginin tun bɛ Levi kɔmɔgɔw ka sarakalasebagaya koo kan. N'u ka baara tun dafanin lo, kuun tun t'a la sarakalasebaga wɛrɛ ka na tugu, o min tɛ i n'a fɔ Arɔn, nga o min bɛ i n'a fɔ Mɛlikisedɛki.

¹² Ayiwa, ni yɛlɛmani donna sarakalasebagaw ka baara la, wajibi lo fɔɔ yɛlɛmani ka don sariya la fana.

¹³ Sarakalasebaga min koo fɔnin bɛ yan, ale faaw si ma deli ka kɛ sarakalasebaga ye.

¹⁴ A gwɛnin lo ko an Matigi buruju bɔra Zuda la. K'a sɔrɔ Musa ka sɛbɛ nunu si t'a yira k'o soo mɔgɔw niin bɛ sarakalasebagaya la.

¹⁵ Ayiwa, n'a fɔra ko sarakalasebaga wɛrɛ bɛ yen min bɛ i n'a fɔ Mɛlikisedɛki, a gwɛnin lo ko

¹⁶ ale ma sigi o baara la a bɛmaw barika la. Nga a kɛra o ye bari see b'a ye ka to sii la tuma bɛɛ.

¹⁷ Tinyɛ na, a fɔra Ala ka kuma na ale koo la ko: “Ele, i kɛra waati bɛɛ sarakalasebaga ye Mɛlikisedɛki cogo la.”

¹⁸ O b'a yira ko fɔlɔfɔlɔ ka koo kɛcogo nunu tɛ jati tugu, k'u benna. Bari barika tun t'u la, u tun tɛ foyi nya.

¹⁹ Sariya ma se k'an dɛmɛ ka kɛ mɔgɔdafaninw ye, nga sisan, an jigi bɛ fɛɛn min kan, o ka fisa, o sababu la an bɛ se ka gwɛrɛ Ala la.

²⁰ Ka fara o kan, Ala y'a daa di fana. Tɔ nunu kɛra sarakalasebagaw ye k'a sɔrɔ Ala m'a daa di u si ma.

²¹ Nga Yezu kɛra sarakalasebaga ye Ala ka dadili seen fɛ, a ko: “Matigi y'a fɔ ka ban, a tɛna yɛlɛma. Ele, i kɛra waati bɛɛ sarakalasebaga ye.”

²² O kama, Yezu ye jɛnnyɔgɔnya min sigi anw ni Ala cɛ, o ka fisa ni fɔlɔta ye.

²³ Ayiwa, danfara wɛrɛ bɛ yen. Sarakalasebaga caaman tɛmɛna, bari u tun bɛ sa.

²⁴ Nga Yezu tɛ sa abada, o la, a ka sarakalasebagaya tɛ se ka bɔ a bolo ka ye.

²⁵ O kama, mɔgɔ minw bɛ gwɛrɛ Ala la ale sababu la, see b'a ye k'olu kisi bii ani sini, bari a bɛ yen tuma bɛɛ ka Ala dali u ye.

²⁶ O sarakalasebaga nyɔgɔn le bɛ se k'an mako nya. A ka nyi, jalakiyɔrɔ t'a la, a ka koo gwɛnin lo, a daan bɔnin bɛ kojugukɛlaw la, a kɔrɔ tara fɔɔ ka taa sankolo daan na.

²⁷ Sarakalasebagaw kuntigiba tɔw tun bɛ saraka lase loon o loon, u tun bɛ kɔn k'u yɛrɛ ka kojuguw yafa saraka bɔ fɔlɔ, ka sɔrɔ ka jama ta lase. Nga Yezu y'a yɛrɛ saraka jama ka kojugu kɔsɔn sinyɛ kelenpe, saraka wɛrɛ man kan ka bɔ tugu.

²⁸ Musa ka sariya ye adamaden barikatanw le kɛ sarakalasebagaw kuntigibaw ye. O kɔ, Ala y'a daa di koo min na, a y'o kɛ k'a Dencɛ kɛ sarakalasebagaw kuntigiba ye, ale ka koow bɛɛ dafanin lo tuma bɛɛ.